قصيدة إلى المولى المقدس السيد الشهيد الصدر(سلام الله عليه)

قصيدة إلى المولى المقدس السيد الشهيد الصدر(سلام الله عليه)

لحد آخر نفس نصرخ الثار الثار ***** دمك ياصدر ما نگدر انعوفه
منبر جمعتك ليهسه يجري دموع ***** وصلاتك ننتظرهه بمسجد الكوفه
حزن كلشي إعله فگدك يالصدر مولاي ***** الوالد لو رحل متعوض اطيوفه
آمنه وتبعنه وإنته بينه تسير ***** تحت طاعة حوزتك كل محب شوفه
طب إعله الكفر طبت شمس عاللليل ***** وبعوچيه وچفن طشرهن اصفوفه
ثورة بجمعتك اندلعت بكل صوب ***** تزلزل بيهه عرش الطاغية وطوفه
ألف عام إنته هادم للكفر تخطيط ***** وكل اعماله صارت إلنه مكشوفه
عليك شگد حچوا راح ويهب الريح ***** نور إنته الغمام شتمنع طيوفه
شگد رادوا نعوفك يالصدر مولاي ***** لان دربك عدل ما يحوي أي لوفه
مضيف إنته اليگصدك ما يرد محتاج ***** سليل آل النبوة اليكرم ظيوفه
مثلك ياصدر وين أحنه تلگه اليوم ***** هم يحصل بعد بالدنيا وانشوفه
إنته الرجعت دين الله واهل البيت ***** وعلى شفاف الزغار أنذكرت احروفه
فتح سبعين منبر تحچي بسم الله ***** رغم ظلم الطواغي وحدة سيوفه
گلت المال عدهم واحنه عدنه الله ***** منو الاقوى حبيبي وهاي معروفه
زرع بينه الشجاعة بتربة الاسلام ***** وبدم نحره سگاهه ولمسة اچفوفه
سلاماً عالصدر مد البحر والماي ***** يمن يمك الجنة اتصير مألوفه

كلماتي / محمد العَـلوي البغدادي

تسلم وعطر الله انفاسك
كلمات رائعة ونظم شاعر موال مبدع
عظم الله لك الاجر ووفقك عزيزي

اللهم صل على محمد وال محمد وعجل فرجهم والعن عدوهم
عظم الله اجورنا واجوركم بذكرى استشهاد المولى المقدس محمد الصدر ونجليه قدس اسرارهم
ابيات رائعة بروعة ابداعك اخي المعطاء ابو باقر العلوي
بارك الله فيك
واسال الله لك دوام التوفيق

گلت المال عدهم واحنه عدنه الله ***** منو الاقوى حبيبي وهاي معروفه
زرع بينه الشجاعة بتربة الاسلام ***** وبدم نحره سگاهه ولمسة اچفوفه
سلاماً عالصدر مد البحر والماي ***** يمن يمك الجنة اتصير مألوفه

احسنت اخي وشاعرنا المبدع على هذه القصيدة الجميلة وفقك الله وجعلها في ميزان اعمالك
وجعلك من الثابتين على نهج السيد الولي الطاهر محمد الصدر ان شاء الله

اللهم صل على محمد وآل محمد وعجل فرجهم والعن عدوهم
عظم الله لك الأجر أخي الغالي وطيب الله أنفاسك
كلمات نابعة من القلب
وفقك الله بحق الولي الطاهر