النص الكامل للقاء السيد القائد مقتدى الصدر اعزه الله مع قناة الشرقية نيوز - برنامج " في متناول اليد " 24 / 2 / 2020

ا لمحاور : حياكم الله مشاهدينا الاكارم ارحب بكم في حلقة جديدة وخاصة من برنامج "في متناول اليد" ضيفي لحلقة هذه الليلة سماحة سيد مقتدى الصدر زعيم التيار الصدري ارحب بجنابك سماحة السيد
القائد السيد مقتدى الصدر(اعزه الله): اهلا وسهلا
المحاور : مرحبا بجنابك
القائد السيد مقتدى الصدر(اعزه الله):ومرحبا بك
المحاور: وشرفتنا بحضورك، الحمد لله على السلامة
القائد السيد مقتدى الصدر(اعزه الله): شكرا جزيلا
المحاور: الله يحفظكم ، الجماعة يكولون سماحة السيد خاف جاب كورونا وياه وهاي الاشاعات !!
القائد السيد مقتدى الصدر(اعزه الله): والله آنه الي اشوفه اكو هوايَ يتمنون ذلك الشيء
المحاور: عندك العافية ان شاء الله
القائد السيد مقتدى الصدر(اعزه الله): بس لا ان شاء الله ، سلامات لكل الشعوب الي اصيبت بهذا الوباء ، الشعب الصيني الشعب الايراني وغيره ، واني كنت احضر درس اهناك وعطلت الحوزة بناءً على هذا المرض وانتشاره ، واذا تعطيل كلت ارجع للعراق فترة الى ان نشوف يرجع الدرس ما يرجع الدرس
المحاور: الدرس يتزامن وي احداث مهمة بالعراق تطورات مهمة سماحة السيد قد كانت تحتاج وجودك في لحظة معينة
القائد السيد مقتدى الصدر(اعزه الله): صحيح
المحاور: من بدء المظاهرات وما بعدها من احداث ما كان ممكن تأجيل الدرس الى وقت آخر
القائد السيد مقتدى الصدر(اعزه الله): لا ما ممكن ، اصلا مقصود
المحاور: كيف مقصود يعني ؟
القائد السيد مقتدى الصدر(اعزه الله): حتى المظاهرات لا تكون مقتدائية ، اني كلتها كبل من طلعت من الخيمة وجفتة الخضراء ، كلتها الباقي على الشعب ، اني مالي دخل اني الي عليَ سويته اكثر من هذاك ما اكدر اسوي ، لا اكدر اكطع شارع ولا اكدر احرك تاير اني غير شكل اني عمامة على راسي واني اعرف شنو اتصرف ، همه شعب ويتصرفون ، هذا امر آخر
المحاور: البعض يعتقد ان مواقف سماحة السيد مقتدى الصدر لم تكن ثابتة من ثورة تشرين في البداية كان هناك انغماس كان هناك اشبه بالانصهار والدعم المباشر وربما توجيهات من بعيد تبدو واضحة في بعض الاحيان وفي بعض التغريدات ومن ثم انقلب الامر الى ما يشبه الجفاء وربما الجفوة ما بين الطرفين ما هو السبب في ذلك ؟
القائد السيد مقتدى الصدر(اعزه الله): صحيح ، انا اعتبر نفسي رقيب اب للجميع حتى للسياسيين ، بس مو اب ، انه اخ لان هم اكبار همه ، بس ذوله شباب ، الثوار والمتظاهرين شباب ، فاعتبر اب ، والاب مرة يمدح ، ابنك من يسويلك فد شي زين اتكله شكرا وجزاك الله خير وتطيه هدية وتساعده ، مرة يخطأ تنبهه مرة مرتين خمسة عشرة حسب خلكك وطولك وحسب الخطأ الي سواه فاذا تمادى تبسطه
المحاور: ممكن
القائد السيد مقتدى الصدر(اعزه الله): ما وصلت للبسط يعني نبهناه اكثر من اللازم على كولة كصكوصة تغريدة فرد شي من هالقبيل ما مشى الحال شويه ضبينه اكثر ، يجوز صار خطأ ، يجوز صار فد شي زيادة من الطرفين عاطفة من هذا الطرف من هذا الطرف ان شاء الله كلشي ينحل ويرجع بمكانه
المحاور: شنو الي اثار حفيظتكم، اتكول حضرتك انه المتظاهرين اخطأوا ، بماذا اخطأوا بالتحديد ؟
القائد السيد مقتدى الصدر(اعزه الله): انت تذكّر آني جمدت جيش المهدي ، ليش ؟ سُمعته ، كتلهم الا السمعة ، سمعة المجاهد وسمعة المقاوم الا هاي من وصل انه يساء الى سمعته جمدته ، جمّدت حتى سرايا السلام حتى كتلة الاحرار حتى السياسية حتى الكذا ليش ؟ من توصل للسمعة اكعد واسكت ، اهم شي عندي في كل شيء الجهاد الثوار السياسة الكذا ، السمعة ، من تصير السمعة على المحك لا ، ذاك الوكت يتغير تعاملي من اللين والابوية والحنية الا شويه الشدة
المحاور: شنو الي اثر على سمعتهم، شنو السلوك الي صار ؟
القائد السيد مقتدى الصدر(اعزه الله): صحيح ، سؤالك جدا جيد ، اولها مال اثر بي جدا الصلب مال ساحة الوثبة ، ولا تكلي تعامل فردي ، جان جواه بال 500 واحد الف واحد جو الهذا ويصيحيون ويهتفون وهذا سابقة خطيرة جدا لا يجب ان تتكرر واذا تكررت قد اعلن عدائي للثوار ، لان اكولها صراحة ، الحرق وقطع الطرق اني كتلهم اهواي وصلتلهم رسائل وكلتها بالتغريدات وكلتها بالتصريحات ، انه الحرق وقطع الطرق ما جاي يضر السياسيين بالعكس كاعدين بالخضراء ومتونسين ويبوكون ومحد يدري بيهم ويفسدون ومحد يدري بيهم ، المتضرر الوحيد من قطع الطرق منو ، ولا آني ولا انت ، آنه كاعد بدرسي بقم وهكذا ولا الاغنياء ولا الي مو وطنيين والتبعيين وما شاكل ذلك المتضرر الوحيد العامل والطالب والانسان العادي والمريض والكذا الي ما يكدر ايروح للمستشفى وكذا شرطي مرور ينبسط بالشارع ينّزع ملابسه ، شرطي المرور آني عندي مقدس ، كلشي لا شرطي المرور ، ماله علاقة هذا لا بدولة ولا بكذا ، ديقوم بواجبه ينظم لك السير ، حتى السير الي مال الثوار التكتك مالتهم والما ادري شنو ، شنو الربط انت تنزعه وتضربه ، لا هذا مو حق ، هذا مو ثورة ، آني لو جانت هذه الثورة باسمي لأوقفتها نفس اليوم بنفس اللحظة ، بس لانه مو اليَ سويت يعني عدة طرق عدة تغريدات وعدة تصريحات ضدهم ، هسه ما اكولها ضدهم ، لصالحهم
المحاور: طيب فيما يتعلق بقطع الطرق اني اذّكر تغريدة لجنابك في بداية الثورة كلت اني ضد قطع الطرق لكن السلطة اجبرت هؤلاء الثوار على المضي باتجاه قطع الطرق والتصعيد ، اذا ثوار ومعتصمين كاعدين بالساحات من اربع اشهر بدون ما احد يستمع الهم شنو برايك التصعيد والخطوات التصعيدية الي ممكن يروحون باتجاهها ؟
القائد السيد مقتدى الصدر(اعزه الله): لو منطيني فرصة جان كتلك ، آنه جنت اكول لمن حولي انا ما جنت اكدر اسوي بمظاهراتي وبخيمتي واعتصاماتي عنف ، همه ذوله ما عدهم يعني راس جبير يكدرون فمحد يجيني يكلي ليش هيجي سويت ولا احد ايكلهم ليش سويتوا ، يحتاج شيء من العنف لكن شيء من العنف مو ثلاثة اشهر اربعة اشهر ، لا ، لا اكل ولا شرب ولا مستشفيات ولا مدارس ولا جامعات حتى من نزّلنا اضربوا عن العمل اضربوا عن الكذا ، يوم يومين شهر شهرين كافي سويته ، انت وصّلت رسالتك بأدبية وبتعاطف ، خوفي من قلة التعاطف معهم الناس وياهم ، وفعلا قلّت ، كان قبل الاعداد كبيرة وهسه قليلة مو اقصد لأنه اني انسحبت او لانه اني ما ايّدت ، لا ، هو الاجواء العامة مو الاجواء التيارية والمقتدائية ، الاجواء العامة ، ها ليش يحركون ، ها ليش يكطعون ، فعلا ، هاي كلها اخاف اولاً تسيء لسمعتهم ثانيا يقل تعاطف الناس معهم
المحاور: تعاطف الناس فقط لو تعاطف سماحة السيد مقتدى الصدر ايضاً ؟
القائد السيد مقتدى الصدر(اعزه الله): آني اكدر انطي عهد اذا مشوا مثل هسه ومثل سابق مو هذه الوسطية مال الوثبة والحرق والقطع ، آني تعاطفي مستمر معهم 100 %
المحاور: طيب ، الثوار يعاتبون السياسيين وربما جنابك كلت اني بمثابة اب الهم ربما يعاتبوك من باب الابوة ، انه في الوقت الي كنا نُقتل بشكل ممنهج وبشكل يومي 600 شهيد وما الى ذلك وربما وصلوا 25 جريح بيهم معوقين ، لم يتم التعاطي اعلاميا مع هذه القضية مثل ما تعاطى الامر مع قطع شارع او حرق اطار او شيء من هذا القبيل ، ما تعتقد انه هاي المقاربة صحيحة الي همه يكولوها
القائد السيد مقتدى الصدر(اعزه الله): المقاربة صحيحة بس الها جواب
المحاور: شنهو الجواب
القائد السيد مقتدى الصدر(اعزه الله):
اولا: الها مدى
اثنين: آني ما اعتب على السياسيين شيسوون خلي يسوون لان همه متوقع منهم لو يكتلون يحركون ، متوقع ، همه فاسدين ، اشنعتب على الفاسد ، بس من تعتب عليهم تعتب عليهم لانه صالحين المفروض ، والفساد لا يُدرأ بالفساد ، زين ، الشي الثاني ، انت ابنك اذا انكتل او مات انت تجي اتكلي عظم الله لك الاجر ، تجي اتعزيني لو آني اعزيك ، آني ذوله اولادي لا استنكر ولا اعزي ، اني اعرف شلون اتصرف ، خل واحد يحمل عليهم سلاح اني اعرف شلون اتصرف ، خل واحد يعتقلهم اني اعرف شلون اتصرف ، ماكو واحد يُقتل ابنه يروح يطلع بيان استنكار انكتل ابني ، لا ، لو يرد لو ينتظر الناس يعزوه ، غير هيجي هاي عشائريا واجتماعيا ، مالها معنى اني استنكر قتل اولادي واخواني ، مو صحيح ، ولذلك حتى بالتيار من ينكتل شخص وكذا ما استنكر ، بعضهم يعتبون علي من تموت شخصية مثلا خارجية المجاهدة الكذا تستنكر بس اشو من ينكتل سرايا السلام واحد جيش المهدي ما تستنكر ، لان هذا ابني ذاك اخويه كذا صديقي ممكن استنكرله ، بس تجي تعتب علي ليش الثوار ينكتلون وما تستنكر ومثلا كذا ، لا ، عيب استنكر اني هذا مو .. اولادي ذوله
المحاور: بعد ، بعد 24 / 1 الي هو جان موعد التظاهرة الكبرى الي دعيتوا جنابكم الها
القائد السيد مقتدى الصدر(اعزه الله): هذا موضوع حساس ترا كلش
المحاور: هو موضوع حساس راح نحجي بيه احنه بس ضروري نحجي بيه ، هذه التظاهرة الي كانت ضد التواجد الامريكي والتنديد بالتواجد الامريكي
القائد السيد مقتدى الصدر(اعزه الله): نعم
المحاور: بعدها تحول تحولت العلاقة هسه ما اريد اتهم بشكل مباشر واكول تحول الخطاب اتحولت العلاقة ما بين سماحة السيد مقتدى الصدر بشكل عام وانصاره مع المتظاهرين والمحتجين وصل الامر الى صدامات في بعض الاحيان جرت في ساحة الصدرين جرت في المطعم التركي وساحة التحرير ، هذه الصدامات اتهمت فيها القبعات الزرق بشكل مباشر والبعض قال بان سماحة السيد في تغريدته كأنما اعطى الضوء الاخضر لهؤلاء من اجل الصدام والمصادمة بشكل مباشر
القائد السيد مقتدى الصدر(اعزه الله): اي بس القبعات الزرق فترة دافعوا من كانت الثورة سلمية وعلى مسارها الحقيقي غصباً علي وغصباً على القبعات الزرق يدافعون عن الثورة ، من شويه زلت كتلك لابد انجر اذان ، ما تقبل خطأ ، لان اهواي اكو مشاغبين بيهم ويحبون العنف يعني مدمنين اذا ما يحرك ما يظاهر اصلا ، فيجوز همه شويه ثارت حفيظتهم الثوار والقبعات الزرق تدري هم تيار صدري خوب ما يسكت عن كل شي صار شويه صدام خطأ اني راسا وكفته كتلهم قبعات الزرق بعد ماكو وفعلا هالاسبوعين الاخيرات لا اكو حرق لا اكو قطع لا اكو تعطيل دوام لا اكو كذا ، الحمد لله نجحت ، بخروقات سوف اتابعها حركة حركة ، وجزء جزء ، بالتفاصيل
المحاور: طالبت بتحقيق حول احداث ساحة الصدرين
القائد السيد مقتدى الصدر(اعزه الله): ولا زلت اطالب
المحاور: شنو المعلومات الاولية حول هذا الامر
القائد السيد مقتدى الصدر(اعزه الله): خلينه ننفيه هسه هالشي بس آني اذا الثورة نجحت او ما نجحت آنه اتعهد انه كل واحد ينكشف اني داكولك الي انكتلوا من الثوار اولادي واخواني والي انكتلوا من القبعات الزرق هم اولادي واخواني ولا بد ادافع عن كلا الطرفين ولن اسكت عن هذا الشيء ، قضية النجف وساحة الصدرين بعهدتي ولن اتنازل عنها ، وتدري اني الكصاكيص جاهزة ضد اتباعي فضلا عن غيرهم
المحاور: تمام ، الان كيف تنظر الى الثورة ، هل الثورة من الممكن ان تستمر من الممكن ان تحقق اهدافها اذا كانت قد حققت شيء في الفترات الماضية او في الاشهر الماضية الثوار ما مقتنعين بهاي الاشياء ، يعني من تكعد وياهم وتسألهم ايكلك ما حققناه هو لا يتناسب مع الدماء التي اعطيناها
القائد السيد مقتدى الصدر(اعزه الله): حقهم ، حقهم
المحاور: بالتالي تعتقد انه الثورة اكو ضرورة لاستمرارها لتحقيق كامل الاهداف
القائد السيد مقتدى الصدر(اعزه الله): طبعا وغصباً على اكبر واحد تستمر ، بعد ، لابد من ان تستمر
المحاور: اشلون تستمر، شنو الطريقة المناسبة ؟
القائد السيد مقتدى الصدر(اعزه الله): بسلميتها تستمر ، باوع انت اتّبعلي من تاريخ 1/ 10 والى الان ، بالبداية جانت سلمية ، حققت مطالب ، شويه زادت شويه زادت كامت تتلاشى ومحد يستجيبلها ومحد كذا حتى التعاطف الدولي فضلا عن التعاطف الداخلي اكو بعض جم قناة قناتكم غيرها ظلت تتعاطف وياهم ، بس غيرها ماكو، زين ، رجعت سلمية رجع التعاطف وياها وبعد محد يكدر يحجي عليها ، ذاك الوقت الي يحجي عليها اني اعرف اشلون اسكته
المحاور: طيب
القائد السيد مقتدى الصدر(اعزه الله): بسلميتها تستمر
المحاور: طيب ، تعتقد جنابك مثل ما واضح من التغريدة الي نُشرت قبل تقريبا 15 يوم من الان ، انه هذه الثورة انتجت تكليف لرئيس وزراء هو يقوم الان بتشكيل الحكومة
القائد السيد مقتدى الصدر(اعزه الله): طبعا همه لو ما خايفين ما يسوون هيجي شي ، صدكني لو ما خايفين من الثورة لو بعد اربعين سنة ما يسوون رئيس وزراء
المحاور : ما يسوون رئيس وزراء
القائد السيد مقتدى الصدر(اعزه الله): لا مو اربعين ، 400 سنة
المحاور: ما يسوون ولا قانون انتخاباتبهذه الطريقة
القائد السيد مقتدى الصدر(اعزه الله): ولا قانون انتخابات ولا اي شي ولا اي حركة
المحاور: طيب ، هل يعني ذلك ان السيد علاوي كُلّف من قبل الشعب
القائد السيد مقتدى الصدر(اعزه الله): بس كاموا يرجفون هيج من الثوار ، هيج رجف وخايفين خوفة المادري شنو ، اتكول نار وماي
المحاور: طيب انت تعتقد جنابك انه السيد ، واني داسالك سؤال مباشر سماحة السيد ، من الذي كلّف
القائد السيد مقتدى الصدر(اعزه الله): طبعا اني .. بين كلامك اخترت قناتكم لانه اعتبرها شويه صريحة ومعارضة لمواقفي فانت اسال شنو عندك اسأل
المحاور: هي مو معارضة لمواقفك ، ربما في بعض الاحيان نُتهم اننا صدريون من حيث لا ننتمي
القائد السيد مقتدى الصدر(اعزه الله): انت مو القناة
المحاور: طيب ، فيما يتعلق بتكليف السيد علاوي ، السيد محمد توفيق علاوي من الذي كلفه ، هل هو سماحة السيد مقتدى الصدر ام السيد هادي العامري ام الاثنين معا نفس طريقة عبد المهدي ، شنو طريقة تكليفه كانت ؟
القائد السيد مقتدى الصدر(اعزه الله): اولاً اكو طرفين ، ثوار والبرلمان ، الكتل ، الكتل السياسية خلي انسميها احسن من البرلمان
المحاور : كل الكتل السياسية بدون استثناء
القائد السيد مقتدى الصدر(اعزه الله): اجمالا
المحاور: اغلبها
القائد السيد مقتدى الصدر(اعزه الله): اجمالا اذا اختارت الكتل شخصية واختارت قصي وما قصي وغيره ما ادري الان نسيتهم ما ادري جم مرشح رشحوه
المحاور: محمد شياع السوداني ، الخ
القائد السيد مقتدى الصدر(اعزه الله): احسنت ، الطرف الثاني الثوار رفضوهم ، الثوار ما اختاروا اشخاص ، هسه هاي هم خلي شويه هم اتنزل وياك اختاروا مواصفات انطبقت على فلان وفلان وفلان ، اختاروهم ذوله رفضوا ، هذا يرفض هذا يوافق هذا يوافق هذا يرفض وهكذا ، الى متى ، كُلي ، يوم يومين ، شهر شهرين ، عشرة عشرين ، سنة سنتين ، شكد يعني ، والى متى
المحاور: صحيح
القائد السيد مقتدى الصدر(اعزه الله): يظل هاي ، طبعا هم عناد ، ترشح ذاك بالعناد يرفض وكذلك العكس ، فالى متى والعراق بهالوضع ، الحرك والصلب والقتل والسياسيين فاسدين وجاي يبوكون وجاي يقنصون والشهداء والدماء والاعتقالات والكذا ، والى متى هذا ، وشماتة الجيران وشماتة الاحتلال وشماتة الكذا ، كلها هاي وين ، الى متى يعني ، غير الها فترة ، علاوي اعتبرته حل وسط اضطراري ، ما وافقت بي سكتت عنه ، لأنه ادري قد يكون مو حل والله العالم
المحاور : بالتالي منو الي كلفه ، اكو آليات دستورية للتكليف سماحتك وتعرف جنابك ؟
القائد السيد مقتدى الصدر(اعزه الله): رئيس الجمهورية
المحاور : رئيس الجمهورية
القائد السيد مقتدى الصدر(اعزه الله): وجزاه الله خير ، مو معناته انه اني موافق على علاوي او رافضه اني ما اريد انطي بيه كشخص هو لا باس بيه حتى ما عليه يجوز ملفات فساد أو كذا ، بس ما ادري المرحلة صعبة يجب ان يقوّي قلبه ويجب انه يوكف وي المتظاهرين والثوار ، دمائهم معتقليهم ، ملاحقاتهم ، اختطافاتهم ، قناصاتهم وان جاز التعبير إلي ضدهم كل هاي كون تطلع ، ماكو واحد يقتل شعب ويطلع منها سالم ، مو الجيش والشرطة ، الجيش والشرطة من يكول لا تحركون ويعتقل واحد هذا اعتقال مشروع مثلاً أو يصلب واحد ويجي يعتقله هذا مشروع بس مواجهك بفانيلته وبنطرونه وتجي تضربه بطلقة هذا كون يُحاسب ، إلي يعتقل إلي يختطف إلي كذا
المحاور : مو فقط القوات الأمنية استهدفت هنالك من يسميهم بالطرف الثالث واحنه لحد الآن ما نعرف منو الطرف الثالث ، لم يُفسر لنا
القائد السيد مقتدى الصدر(اعزه الله): ولا آنه أدري ، الطرف الثالث أيجوز القبعات الحمر
المحاور : وربما القبعات الزرق أيضاً
القائد السيد مقتدى الصدر(اعزه الله): القبعات السود ، ما ادري ، لا ، القبعات شنو ميزتها القبعات الزرق ؟ عدها جبير الى أن تخطأ أكلها اوكفي ، تسوي زين اكلها شكراً أمشي ، بس ذولاكه ما إلها راس حتى لو أكو راس مضموم ليجوه ما يكدر ايكلها كافي
المحاور : كثير من الفترات البعض أعتبرهم همه طرف ثالث يعني هسه اني ما أرجع لهذا الموضوع لكن خلينه نتحدث بحكومة السيد علاوي ، قلت أن رئيس الجمهورية هو إلي كلفه ، موقف الكتل السياسية متباين على ما يبدو لغاية الآن
القائد السيد مقتدى الصدر(اعزه الله): كلش متباين
المحاور : سماحتك داعم ربما أو مثل ما كلت جنابك ساكت عنهم ، بشرط أن تكون الحكومة مستقلة ، في مجمل النواب وفي مجمل الكتل همه ما يرضون ربما بهذه الآلية وهذه الطريقة
القائد السيد مقتدى الصدر(اعزه الله): الشعب يحاكمهم
المحاور : ما هو الموقف المناسب اذا لم تمرر الحكومة هذا الاسبوع ؟
القائد السيد مقتدى الصدر(اعزه الله): والله اني يعجبني ، اكررها ، اسطولة زبالة ونذبهم بيها ، وكل واحد ما يوافق انذبه بيها ، لا بد من انهاء المحاصصة ، لا بد من انهاء المحاصصة وإلا العراق ينتهي ، ينتهي بكل المعايير وبكل المقاييس
المحاور : حكومة علاوي انهت المحاصصة الطريقة التي اختار وزرائه
القائد السيد مقتدى الصدر(اعزه الله): اذا شويه تعاونوا السنة والأكراد وأتمنى منهم ان يتعاونوا وكفاهم محاصصة ما اكول ما يجيب كردي او ما يجيب سني ، يجيب كردي ويجيب سني لأن هاي مكونات فسيفساء عراقية لا بد منها ، بس مو تحزبيين مو فلان وفلان وفلان الكذائيين ما اريد اذكرهم ، أكراد يجيبهم أكراد ، سنة شيعة ، يجيبهم شيعة وسنة عادي ، بس مو من الحزب الفلاني ومن الجهة الفلانية ، الاحزاب لا تمثل الشعب ، شلع قلع لا تمثل الشعب ، فيجيبهم مستقلين يحكمون لا يتحكم بيهم الحزب ، يتحكم بيهم رئيس الوزراء فقط ، واذا صارت وتحكموا بيها الاحزاب ذاك الوقت آنه بعد ما اكدر اسكت ، اسوي الي ديسويه الشعب واكثر
المحاور : كلت حضرتك في التغريدة الأخيرة أن هناك اتجاه ربما اذا ما يتم بهذه النقاط خلال الاسبوع المقبل راح ننزل ونطوّق الخضراء باعتصامات ، تعتقد هذه التغريدة اعطت دافع أو حفزت السيد علاوي وقوت موقفه لو احرجته ووضعته بموضع ربما صعب أمام الكتل الأخرى ؟
القائد السيد مقتدى الصدر(اعزه الله): والله مو ناطق رسمي عنه ، بس ما أدري ، بس التوقع ، متخوف على شويه استفاد مرتاح أي نص ونص يعني تدري على كولتك مقتدى يجوز متقلب اليوم وياه يجوز بعدين ضده ، لأن آني مع الحق مع الفعل الصحيح افرض منو المالكي خل اجيبلك طاريه ، مشى عدل دزيتله كتاب شكر ، مشى خطأ نزلت بيه كصكوصة ، اني ما عندي اعادي شخص آني اعادي موقف أعادي قرار ، بصالح الشعب امدحه ، كتاب شكر
المحاور : جنابك انت اتكول عن نفسك اني متقلب وجماعتك يعاتبون الناس إلي يكولون سماحة السيد .. التقلب شنو إلي تقصده ؟
القائد السيد مقتدى الصدر(اعزه الله): يتصورون انه متقلب ، اكلك اني مثلاً اوكف وياك خل هيج اكول لأن انه انت ماشي عدل ، من تخطأ اكلك انت اخطأت هذا من اكلك انت اخطأت عبالهم كلبت عليك ، مو من اكلك خطأ آني اكلبت عليك ، بالعكس اني لأن مثلا احترمك واحبك كتلك هذا خطأ حتى اتصحح مسارك ، برأيي خطأ هسه انت برأيك مو خطأما اعرف
المحاور : ومن أصحح مساري ممكن مرة ثانية يعود التعاون بيناتنه
القائد السيد مقتدى الصدر(اعزه الله): ممكن ويجوز اكثر
المحاور : هذا إلي جرى بساحات الاعتصام وساحات الاحتجاج
القائد السيد مقتدى الصدر(اعزه الله): أحسنت ، ورا هاي الاسبوع مال القبعات الزرق والمشاكل وراها رجع وكذا وصار تنسيق ومشى الحال ، صحيح اكو انه ورا شويه من الطرفين اصحاب عنف شويه وعاطفة شديدة بس مع ذلك عادت المياه الى مجاريها اكدر اكول بصورة أو بأخرى
المحاور : نرجع لطريقة تشكيل حكومة السيد علاوي ، بعض الكتل السياسية يمكن يرد لمسامعك هذا الحديث تعتقد انه هذه الحكومة هي حكومة سائرون أو حكومة سماحة السيد مقتدى الصدر ، منْ يختار الوزراء ربما يختارهم سائرون تختارهم هنالك من يشيع مثل هكذا حديث بين الأوساط
القائد السيد مقتدى الصدر(اعزه الله): شنو الجديد ، من أياد علاوي ولليوم ، كل حكومة تشّكل اذا مو مقتدى ما تشّكل اني اكلك بس هسه بموافقته مو موافقته بس ما تشّكل اذا ما ادّخل بصورة أو بأخرى ، مرات تدري شسوي ، اكول ما اريده حتى هم يريدوه ويصير ، واضح ، اذا ما ادّخل ما تمشي ولذلك سكتت سكتت درسي بقم درسي بقم ما ادّخل ، ما ادّخل الى متى ، زين هاي بعد يجوز سنتين اتجر هل الاحداث ، ادّخلت شويه هيج شويه جدحة زغيره يعني شويه مشت الأمور ما أدري هسه راح تكمل تمشي ما تمشي ما اعرف
المحاور : يعني هل يعني ذلك ما يقال في الأوساط السياسية انها حكومة الصدريين وحكومة سيد مقتدى الصدر صحيح ؟
القائد السيد مقتدى الصدر(اعزه الله): هي حتى لو مو صدرية هم يكولون صدرية ، ميخالف ، هي مو صدرية ، بس كول صدرية ماشي
المحاور : العلاقة باختيار الوزراء ليس لكم علاقة مباشرة أو غير مباشرة
القائد السيد مقتدى الصدر(اعزه الله): حتى هاي ... عادل عبد المهدي والوزراء إلي همه مو صدريين بل كلتلهم ، شكلتلهم ؟ جيبوهم معادين لآل الصدر مو لمقتدى بس وجماله ما نعرفهم ولا شايفهم ولا ادري بيهم نهائياً حتى شكلهم ما اعرفهم ، ولا اسمه ، صدكني هسه لو تكلي لا الوزارة اعرفها ولا اسم ولا اسم الوزارة ولا اسم الشخص اعرفه ولا شايفه ولا كاعد وياه ولا ملتقي بيه اضافة الى انه كلتلهم يجب ان يكون معادي لآل الصدر وتجيبوه ، بس كون متخصص ، وهم قيل ان هذه الوزارات وزارات التيار ، ينكال ، ينكال ما منها ، خصوصاً بقناتكم ، عادي طبيعي
المحاور : على كل حال ، اعتراض السُنة والكرد على طريقة تشكيل الحكومة وبعض الشيعة ، بعض الشيعة ايضاً معترضين بهذا الاعتراض ممكن ان يعرقل الحكومة ، هل هناك حراك سياسي مع الاطراف والزعامات من اجل تنقية الاجواء وتمرير هذه الحكومة
القائد السيد مقتدى الصدر(اعزه الله): لا مو ممكن قافلين على المحاصصة ، لو مو مقتدى ايكلهم ، لو هسه ينزل وحي هم ما يقبلون
المحاور : معنى ان هذه الحكومة ربما لا تمر
القائد السيد مقتدى الصدر(اعزه الله): خل نتمنى انه تمر ، عسى ان تكون حل ، ما ادري هسه يجوز حل يجوز مو حل ما ادري ما اعرف ، بس اذا انتهت المحاصصة هذا هدف كبير للإصلاحيين والثوار ، كلش اجبير ، بلكي انه هاي الانتخابات هم خلال السنة هذه تصير انتخابات مبكرة وهذا أمر واجب من قبل ، واجب ليش ؟ لأن المرجعية دعتله ، الشعب يدعو له ، اني ادعو له ، كل عاقل يدعو له ، فإذا تحققت هذه الحكومة على عوائهنا خل انكول بدون محاصصة وصارت انتخابات مبكرة ، الثوار راح طبعاً مو الثوار بما همه ثوار راح يحصلون حكومة جديدة بانتخابات جديدة تفيدهم وتحقق مطالبهم وتحقق اهدافهم ما بيها تزوير ما بيها كذا ، هذا فد نجاح اجبير جداً للثورة
المحاور : فنياً وتقنياً هل هنالك استعداد لإجراء الانتخابات في خلال السنة الحالية ، يعني تعتقد هو هذا الموعد منطقي انكول نهاية السنة الحالية ؟

القائد السيد مقتدى الصدر(اعزه الله): أي رئيس وزراء يجي مؤقت أي رئيس وزراء يجي مؤقت ما يحقق الانتخابات نشيله ، الانتخابات المبكرة ، نشيله المفروض بعد ما يبقى
المحاور : طيب ، ما هو المطلوب تحديداً والمهام المطلوبة من هذه الحكومة اضافة الى تحديد موعد الانتخابات المبكرة إلي حضرتك تفترض ان يكون في نهاية هذه السنة على الأقل والبعض يفترض انه ربما يكمّل دورته لأنه فنياً قد لا يكونوا مستعدين
القائد السيد مقتدى الصدر(اعزه الله): لا لا ماكوهيج
المحاور: هذا الموضوع لا يمكن
القائد السيد مقتدى الصدر(اعزه الله): لا لا هذا الفلم شيله
المحاور: اها
القائد السيد مقتدى الصدر(اعزه الله): اي
المحاور: يعني شريطة بقاء الدعم هو انتخابات مبكرة في نهاية هذه السنة
القائد السيد مقتدى الصدر(اعزه الله): هو مؤقت وانتخابات مبكرة
المحاور: في نهاية هذه السنة
القائد السيد مقتدى الصدر(اعزه الله):
اولاً : انتخابات مبكرة
ثانياً : حكومة مؤقتة ، حماية الثوار وحقوقهم ، معتقليهم شهدائهم مختطفيهم كذا كذا كون كل هاذي تنحل ، عدم متابعتهم عدم ملاحقتهم لا من المليشيات لا من الحشد لا من الجيش لا من الشرطة لا من القوات الأمنية لا من أي شخص لا من مقتدى لا من قبعات الزرق لا من السرايا لا من التيار ، شلع قلع محد يتابعهم ، يجوز اكو مذنبين واحد اثنين عشرة عشرين هذا اكو قضاء وهو يتعامل وياهم لا آني اتعامل وياهم ولا انت ولا أي واحد
المحاور: طيب ، هاي المهام فقط ؟ اعتقد ذكرت ..
القائد السيد مقتدى الصدر(اعزه الله): خدمات ، يحاول بعض الخدمات الأمور الخدمية الكذا ، ها محاسبة الفاسدين ، الروس الكبار بالخصوص مو يجي على الروس الزغار فلان وفلان الي بايكله ورقة ورقتين ، لا ، ابو المليار والمليارين أبو المليارات يروحلهم ، الروس الكبار
المحاور: وليش ننتظر من الحكومة سماحة السيد كزعامات سياسية ؟
القائد السيد مقتدى الصدر(اعزه الله): تريدني احاسب
المحاور: لا لا
السيد القائد : مو تكلي مليشياتوقحة
المحاور : لا ، لا حالياً هي الحكومة من نروح نسألهم انتوا ليش ما سويتوا تكول احنه احالينا ملف للقضاء
القائد السيد مقتدى الصدر(اعزه الله): اخي ، استاذ حسام ، جاهز آنه تريد احاسبهم؟
المحاور: توكل .. اذا عليَ القصة ، من عندي توكل
القائد السيد مقتدى الصدر(اعزه الله): ها مو تكولون ها مو انت مو قاضي انت مو حاكم انت مو رسمي انت مو حكومة ، هو لو تخلونا نتصرف وتسكتون لو همه يصّرفون
المحاور: الي اقصده في بعض الأحيان من نخاطب نحاور رئيس الوزراء وأحد بالحكومة ليش ما حاسبتوا الفاسدين يكول هذا اختصاص القضاء احنه صعّدنا ملفاتهم الى القضاء
القائد السيد مقتدى الصدر(اعزه الله): القضاء اشويه يرادله دفعة
المحاور : يرادله دفعة
القائد السيد مقتدى الصدر(اعزه الله): اي ، مستعد ادفعه ، مو ادفع فلوس ، مستعد ادفعه اذا يشد حيله مستعد آني ، ما اكول يبدي بالتيار بس خل يشمل التيار ، مو دائماً هاي المشكلة من آنه أطالب وين يجون؟
المحاور: على التيار
القائد السيد مقتدى الصدر(اعزه الله): وسائرون واحرار
المحاور : ويعوفون الجماعة
القائد السيد مقتدى الصدر(اعزه الله): ويخلصون والبقية يعوفوهم ويتفلش منانا ومناك كلشي ماكو
المحاور: طيب ، واحدة من الأشياء المهمة الي ذكرتها حضرتك اكثر من مرة واليوم ما ذكرتها ما اعرف ليش ، الي هو حصر السلاح بيد الدولة ؟
القائد السيد مقتدى الصدر(اعزه الله): صحيح هذا مهم جداً
المحاور: هل تتمكن..
القائد السيد مقتدى الصدر(اعزه الله): هذا آني ابدي بيه ، هذا آني ابدي بيه ، مستعد
المحاور: شلون ؟
القائد السيد مقتدى الصدر(اعزه الله): اذا تجي الحكومة المؤقتة او الجديدة ، هسه المؤقتة بعد ميفيد ، الجديدة تجي وتلم السلاح من خارج الدولة ، آني اذا يعتبروني من خارج الدولة كسرايا وما سرايا آني مستعد اسلّم
المحاور: كسرايا تسلمها اوكي ماكو مشكلة ...
القائد السيد مقتدى الصدر(اعزه الله): بس بشرط يكون الجيش والشرطة يصيرون صدك ، مو يخافون ، مو مثل تسليم الموصل ايام فلان الفلاني ولا كذا ما اريد احجي بعد ازيد
المحاور: السلاح الي هو خارج اطار السلطة ليس فقط في يد مثلا لو افترضنا سرايا السلام
القائد السيد مقتدى الصدر(اعزه الله): آني البقية ما عندي سلطة عليهم بعد ، آني ابدي كسنة حسنة آني ابدي مستعد اسلم السلاح للدولة الغير محاصصاتية الي طالبت بحقوق شعبها الي خدمت شعبها الي مو تبعية مو للشرق مو للغرب مو للجنوب مو للشمال ، مستعد
المحاور: الحكومة..
القائد السيد مقتدى الصدر(اعزه الله): ابوية ؟ بالخدمة مو اسلمها سلاحي اسلمها نفسي
المحاور: الحكومة المؤقتة قادرة الي سميناها مؤقتة خليها نفترض انه حكومة السيد علاوي قادرة بشكل فعلي وعملي على حصر السلاح بيد الدولة ؟
القائد السيد مقتدى الصدر(اعزه الله): اني افضل تمّهد ، وثم الحكومة الي بعد الانتخابات المبكرة هي الي تستلم الأسلحة
المحاور : الامر بالغ الصعوبة لهذا الحدسماحة السيد
القائد السيد مقتدى الصدر(اعزه الله): لا ، يرادله فترة كون نلح على انه هاي حكومة مؤقتة ، خل تلتهي بالانتخابات ، ما بعد الانتخابات النزيهة مو بس سلاح نلم ، نلم حتى المليشياويين والتبعيين هم نلمهم
المحاور: والوقحة ايضاً
القائد السيد مقتدى الصدر(اعزه الله): وكلها وكلها
المحاور: طيب ، قبل ما انتقل الى محور آني اعتبره مهم الي هو محور تشكيل الحكومة السابقة حكومة سيد عبد المهدي وظروفها بشكل عام
القائد السيد مقتدى الصدر(اعزه الله): ليش اكلبت على عبد المهدي
المحاور: مو ضروري سماحتك صارلك مدة طويلة ما طالع وما موضح هاي التفاصيل ، التغريدة الأخيرة ذكرت بيها للمرة الأولى ربما الطائفيون والفاسدون والعرقيون ، هسه الطائفيون والفاسدون دائما تكول ، بعض المراقبين افتهموا من العرقيون انك تقصد الكرد هل هذا التفسير صحيح ؟
القائد السيد مقتدى الصدر(اعزه الله): اي
المحاور : صحيح
القائد السيد مقتدى الصدر(اعزه الله): الاحزاب الكردية
المحاور: الأحزاب الكردية ، انت يعني...
القائد السيد مقتدى الصدر(اعزه الله): رجائي منها انه لا تلح زايد على المحاصصة ، كافي يعني اتضرر العراق وهمه اتضرروا وما نريدهم يتضررون اكثر وما نريد نفترق اكثر ، انا لا زلت أتذكر سلام المالكي وزير النقل اجه كلي اريد ابني مطارات ، ابدي بالنجف كلي كتله لا تروح تبنيها بكردستان ، المطار الأول بكردستان ، حتى احنه للجميع مو انه للشيعة بس تبني مطار وهناك ما تبني ، وفعلاً راح لهناك كمّله ، لا مو كمّله قصدي بدا بيه بالمشروع ، فأحنه ما نكره الاكراد بل نحبهم ، بس ساسة لا يلحون زايد على المحاصصة وعلى انه يكون فلان ويكون من حزبي ويكون من جهتي ويكون من كذا ، كردي ويداري الاكراد وكردي ويداري الشيعة وشيعي يداري السني وسني يداري الكرد وهكذا ، ابوية ، هذا المثال الابوية ، بعد ماكو كردي يشتغل للكرد وسني يشتغل للسنة وشيعي يشتغل للشيعة ، ابداً المفروض ماكو هيج شيء ، اذا صار كون ينعزل
المحاور: متى جرى اخر اتصال بينك وبينك السيد مسعود برزاني؟
القائد السيد مقتدى الصدر(اعزه الله): أتوقع يعني اذا ما ناسي بأيام عادل عبد المهدي وتشكيل الحكومة
المحاور: يعني بالمظاهرات ورا تشرين ما صار هذا الامر
القائد السيد مقتدى الصدر(اعزه الله): لا ، لا
المحاور : لم يحصل هذا الامر، ماهي الرسالة الي تريد توصلها للزعامات الكردية ربما وحتى السنية فيما يتعلق بهذا الامر
القائد السيد مقتدى الصدر(اعزه الله): الى الاخ مسعود انه لا يتعاطف مع الامريكان ميفيدوه واحنه نفيده اكثر ويجب ان يخرج الاحتلال بأي صورة من الصور ، كافي لعب بمقدراتنا كافي تفريق بيناتنه ، آني كشيعي اعتبر روحي كردي اني كشيعي اعتبر روح سني كأقليات تركماني مسيحي أيزيدي كل شي صابئي
المحاور: عراقي
القائد السيد مقتدى الصدر(اعزه الله): عراقي ، ما أخدم الشيعة بكد ما اخدم الصابئة والكذا والمسيحيين ، ما ..عندي نفس الشي كلهم أولادي كلهم اخواني كلهم آبائي ، ما .. من هاي الناحية ما راح يفيده الاحتلال راح افيده آني وامثالي
المحاور: راح نحجي عن الاحتلال بالتفصيل سماحة السيد لكن
القائد السيد مقتدى الصدر(اعزه الله): ما أظن ؟!
المحاور : لا راح نحجي بيها ، لا اوعدك
القائد السيد مقتدى الصدر(اعزه الله): انت تتحمل المزاح
المحاور: البعض يعتقد في مقابل ما تعتقد ان أزمة تشكيل الحكومة بشكلها ..
القائد السيد مقتدى الصدر(اعزه الله): بس دقيقة ، بس دقيقة ، هاي رسالتي للأكراد هاي للاخ مسعود ، الى الاخ ساشوار شويه يشد حيله بالمظاهرات هم بلكي يفيدنه مو بس الشيعة يظّاهرون خلي شويه يشدون حيلهم السنة هم شوية يظّاهرون ، احنه ترا مو بس الشيعة فاسدين ، سياسي الشيعة مو بس همه الفاسدين اكو هواي اطراف اخرى من غير الشيعة هم فاسدين هم يحتاج الهم جرة اذن شويه
المحاور: طيب ، في قبالة هذا البعض يعتقد ان أزمة الحكومة بشكلها الحالي ربما تدفع بعض التيارات والاطراف الكردية الداعمة لتأسيس دولة كردية تحفزها من جديد لطرح هذا الموضوع على اعتبار انه ..
القائد السيد مقتدى الصدر(اعزه الله): من ترفض كون تنقسم بعد مو ؟
المحاور: هيجي يفترضون البعض
القائد السيد مقتدى الصدر(اعزه الله): ما اعتقد يكدرون ينقسمون
المحاور: ليش ؟ شنهو الموضوع
القائد السيد مقتدى الصدر(اعزه الله):
اولاً: ما نريدهم ينقسمون ، اخوتنا ومنا وبينا
ثانياً: لن نسمح بأن ينقسموا ، لا همه لا الاكراد لا السنة ولا حتى الشيعة ولا اقليم شيعي ، لن أسمح بذلك ، العراق لا يجب ان يُقسّم بهذه الفترة ، يُضعف من العراق اكثر ويجعله لقمة للغرب والشرق والجنوب والكذا
المحاور: طيب ، خلينه نحجي عن فترة حكومة السيد عادل عبد المهدي ، لماذا اختفت ملامح الفترة الي أسستولها ، المرحلة الي اسستولها جنابكم ومن ضمنها كلمة الحكومة الابوية التي ..
القائد السيد مقتدى الصدر(اعزه الله): والله كون آنه أسأل مو انت تسأل ، بس يالله اسأل ..
المحاور: والله تسأل براحتك
القائد السيد مقتدى الصدر(اعزه الله): هو ليش ما اعرف ، ما ادري
المحاور: هو شلون .. وسماحة السيد مقتدى الصدر ما يعرف ، منو يعرف ، المن اسأل ، المن ألتجأ آني
القائد السيد مقتدى الصدر(اعزه الله): لأنه الظاهر لأن ما تابعت ردت اروح للدرس والكذا آنه انطيت مهلة لعادل عبد المهدي سنة
المحاور : اي
القائد السيد مقتدى الصدر(اعزه الله): خلصت السنة جرخته بتغريدة ، طلعت مظاهرة كلتلهم كون يستقيل فعلاً ما سوه الي عليه ، بارد شويه ، رجال بارد كوة ، هو مو أكول مو زين ، بس بارد يعني ما عنده هيجي ..حرارة الشباب
المحاور : شنو الي كان عليه ان يسويه في غضون سنة وحدة سماحة السيد
القائد السيد مقتدى الصدر(اعزه الله): محاسبة الفاسدين الخدمات الكهرباء الماي ، هواي هواي اشغال ، مو هي المشكلة تركات الحكومات السابقة وخصوصاً الاسبق كانت كبيرة ، حل بعضها الاخ العبادي وان كان بالأخير هم كام شويه يخرّبط ، على عادل هم جان كون يحقق قسم كبير منها ، ما كدروا الظاهر
المحاور: ما دام هي تراكمات للحكومة السابقة ، يكدر يحلها بسنة ب10 اشهر ب11 شهر
القائد السيد مقتدى الصدر(اعزه الله): سنة بعد شنو اكثر من سنة يعني ، شكد تنطيه
المحاور : هو تعهد ...
القائد السيد مقتدى الصدر(اعزه الله): هي كلها اربع سنين بعد شتنطيه ثلث سنين، شبقى ؟!
المحاور: هو تعهد بهذا الشيء ، يعني هو كانت عنده رؤيا قدمها ..
القائد السيد مقتدى الصدر(اعزه الله): لا ، بيني وبين نفسي وبين ربي وبيني وبين شعبي انطيته مدة سنة اشوفه اذا نجح نجح واستمر بدعمه ، اذا ما نجح اكوله انت ما نجحت
المحاور: ماكو تبريرات هسه لو تفترض انه عدم تقديم الخدمات هو فشل
القائد السيد مقتدى الصدر(اعزه الله): مو بكيفه ، مو بكيفه
المحاور: هسه من تسأله يكلك انه احتاج وقت هذا الامر ، بُنى تحتية
القائد السيد مقتدى الصدر(اعزه الله): دولة عميقة ، دولة عميقة ومتحكم بيها احزاب مو بكيفه ، شنو يبني شنو كذا ، هسه ولو مو لطيفة ، بعض الوزراء الي ينتمون النا ، في فترات سابقة بس يريدون توقيع من فلان لو فلان علمود بناء مشروع ما يوّقع ، مو بكيفه الحزب مالته رافض ما يوّقع
المحاور: اكو دولة عميقة ..
القائد السيد مقتدى الصدر(اعزه الله): حتى لا تصير مغنم لمقتدى لا تصير مغنم للوزير الفلاني للجهة الفلانية للحزب الفلاني ، صراعات ابيناتهم ، مو دولة
المحاور: طيب ، هذه الصراعات تنسحب على زمن ..
القائد السيد مقتدى الصدر(اعزه الله): احجيلك فد شي ، مو دولة مزعطة ، يعني بالصريح مزعطة ، ناس بس تريد تلملم فلوس، هي حتى هيجي ، يجيني واحد عادي ها والله اني فقير وعندي شهداء اثنين وما عندي فلوس وما عندي رواتب تعال عيّني ، زين آني مثلاً مفتّح دار يتامى ، التعيين للمتخصص لو لفقير ، ماله معنى ، هو هاي أصل الفكرة هو كون تعيّن وزير فقير او ابن شهيد او ابن كذا هذا خطأ، اسلوب خاطئ ، كون اتجيبه واحد بالعكس مليان شويه ما يدوّر فلوس عنده تخصص عنده فكر عنده سياسة عنده ادارة تخليه بهذا المكان ، المنصب ، ما تصير هيجي ، الموازين اختلفت كلها
المحاور: طيب ، السيد عادل عبد المهدي ظروف تسميته وظروف الاتيان به كمرشح لرئيس الوزراء هناك من يعتقد ان الامر كان محصورا ً ما بين سماحة السيد مقتدى الصدر والسيد هادي العامري بسرعة سحب الدعم عنه او ربما التخلي في بعض الاحيان ووصفه البعض انه هو تخلي كان مفاجئ او لم يكن ممهد له بالسابق بدون سابق انذار بطريقة او اخرى
القائد السيد مقتدى الصدر(اعزه الله): الحقيقة آنه جنت حاط ابّالي صورة لعادل عبد المهدي احسن ، يعني يكدر يقدّم اكثر ، فوجئت بعدم امكانيته ، اعترف
المحاور: بشنو هو فشل ؟
القائد السيد مقتدى الصدر(اعزه الله): بكل شي
المحاور: بكل شي ، لم ينجح بشيء
القائد السيد مقتدى الصدر(اعزه الله): شويه بعلاقاته وي الاحزاب نجح يجوز ، اكثر من هذا ماكو
المحاور: طيب ، وحدة من الملامح الاساسية ..
القائد السيد مقتدى الصدر(اعزه الله): اذا تسميها اتفاقية الصين نجاح مو نجاح قد تكون ، ما ادري
المحاور: تعتبرها نجاح جديد ..
القائد السيد مقتدى الصدر(اعزه الله): ما ادري ما اعرف ولا ردت اطّلع عليها اصلاً
المحاور : ليش؟
القائد السيد مقتدى الصدر(اعزه الله): لأنه تجي هناه تنباك!
المحاور : يعني ممكن تدخل في بيئة الفساد وتُسرق اصلاً بشكل او بآخر
القائد السيد مقتدى الصدر(اعزه الله): حتى لو ناجحة هم تفشل
المحاور: وحدة من أساسيات الملامح الي رُسمت بالفترة بعد انتخابات 2018 هو تحالفي الاصلاح والبناء على سبيل المثال جنابك جنت مصر على ..
القائد السيد مقتدى الصدر(اعزه الله): رحمه الله!
المحاور: جنابك جنت مصر ان تكون هناك تحالف عابر للطوائف ، كنت مصر ان يكون تحالف عابر للطوائف حتى يضرب المحاصصة بالصميم
القائد السيد مقتدى الصدر(اعزه الله): أكلك شي ، يعني آني ينعتب عليَّ لأنه توافقت وي هادي العامري الاخ هادي العامري علمود انجيب رئيس وزراء ، جا هو العبادي ما كتل روحه للتحالف وي الحشد كبل الانتخابات ، جان من المقرر نتحالف آنه وياه قبل الانتخابات وندخل بالانتخابات وجان طلعنه فوك ال 150 كرسي آني وياه ، راح مقنّعيه الحشد أنه يتحالفون وياه وقبل يوم من الانتخابات كلبوا عليه وضحكوا عليه خلي نكول هيج ، وضاعت وراح الامر ، ما تعتب على العبادي راد يتحالف وي الحشد وي هادي العامري ، ليش بس العتب عليَّ
المحاور: اني يعني اذا كان اكو عتب ، العتب راح يكون بالطريقة الاتية
القائد السيد مقتدى الصدر(اعزه الله): آنه أكلك شي آخر ، أكلك شي آخر ، بصورة او بأخرى وصلت الرسائل تهديد انه نحرك العراق اذا يصير رئيس وزراء خارج عن نطاق التحالف ..
المحاور: الشيعي ..
القائد السيد مقتدى الصدر(اعزه الله): الحشداوي وي سائرون
المحاور : منو يحرك العراق ؟
القائد السيد مقتدى الصدر(اعزه الله): بعد ما ادري آني ما اكدر اكوله
المحاور: وآني هم ما ..
القائد السيد مقتدى الصدر(اعزه الله): في حينها أصرحه ويجي وكته ، خفت على العراق ، ما تحالفت وي هادي العامري ، كتله فلان الفلاني تقبل بيه لو لا ، كال اي اقبل ، كتله هايهيه نمشي
المحاور: فقط؟
القائد السيد مقتدى الصدر(اعزه الله): فقط ، كتله وياه كشخص هادي عامري مالي علاقة بحشد ، بعد انت تقنّع ناسك يصوّتون ما تقنّع ناسك يصوّتون آني ما الي علاقة آني هذا .. كنت ارتجي بيه شي ، وفعلاً وافق ومشى الامر ، خلص
المحاور : تحالف الاصلاح ما استمر ..
القائد السيد مقتدى الصدر(اعزه الله): تحالف الاصلاح العبادي جان يريد روحه يريد يسوّي روحه هو رئيس الوزراء ، مو جان اكو رفض آنه ما كدرت امشي بيه ، سيد عمار الله يحفظه عده توجهاته الخاصة ما كدرت اندمج وياه لأن صعبة
المحاور : شنهي هاي التوجهات الي ما كدرت..
القائد السيد مقتدى الصدر(اعزه الله): تعذرني ، ما اريد انطي بيه ، حتى لو انطه بي هم ما اريد انطي بيه
المحاور: هو دنحجي على السياسة مو كأشخاص ، نكول شنهي السياسات...
القائد السيد مقتدى الصدر(اعزه الله): اي مع ذلك ، يزعل ، ما اريد اذكرها ، بعدين ان شاء الله تجي ..
المحاور: ما تريد تزعّله
القائد السيد مقتدى الصدر(اعزه الله): اي ما اريد ازعّله
المحاور: طيب ، هذا السبب الي خلَ تحالف الاصلاح ما يستمر وهمه يكولون سائرون انفردوا باتخاذ القرار
القائد السيد مقتدى الصدر(اعزه الله): ماكو .. يجوز يجوز اخطاء من سائرون آنه ما اريد اعصم سائرون ولا اعصم نفسي صارت اخطاء مناه ومناه ولاصت ، بس ما اكدرت يعني .. آراء كلش مختلفة ، آراء كلش مختلفة ما اكدرت اجمع بينها
المحاور: سماحة السيد كنت تمثل مشروع وطني مهم البعض كان يعتقد من كل طوائف العراق انه سماحة السيد مقتدى الصدر قد يكون هو .. يعني هو الاساس للعبور الى منطقة مشروع وطني مهم ، هذا المشروع الوطني اتفتت ، البعض اصيب بخيبة من هذا التفتت ، البعض يحمّل جنابك المسؤولية ، يكول انت ما مشيت للنهاية بهذا المشروع الوطني
القائد السيد مقتدى الصدر(اعزه الله): شلون أمشي للنهاية مثلاً؟
المحاور: ما مشيت للنهاية في هذا المشروع الوطني باعتبار انت تركت التحالف العابر للطوائف ..
القائد السيد مقتدى الصدر(اعزه الله): مو الاصلاح ..
المحاور: ورحت مرة ثانية لتفعيل التحالف الشيعي بطريقة او بأخرى
القائد السيد مقتدى الصدر(اعزه الله): مو كتلك هذا يريد هو يرشح نفسه وهو مرفوض ، هذا زيّد طلباته ، شلون يعني ، المعادلة حلياها ، مو شلون اتنازل
المحاور: اذن المعادلة صعبة
القائد السيد مقتدى الصدر(اعزه الله): يعني لو العبادي لو ما يصير ويانه ، وانشقوا عنه وطلع عنه الفياض وطلع عنه الكذا والعدد صار قليل وما يفيد ، يعني السياسة هاي ما تاكل هيجي بس رمزيات ، ككتلة اصلاح مثلاً شكد عددهم شكد صفى بيهم ، دون ال 100 ، شلون اصوّتلي على رئيس وزراء ، وذولاكه ما يقتنعون ، ومناكه .. آسف بعثية وما ادري شنو وداعشيين وكذا خميس الخنجر وما خميس الخنجر ، حرام عليك تتحالف وياهم ، وي هادي العامري حرام تتحالف لأن انه وياه وقحين ومدري منو هم ما يصير مدري منو ما يصير جا شلون تمشّي حكومة ، غير برلمان ، سقّط برلمان تعال نسقّط برلمان ، هي غير تصويت غير تحصّل 166 صوت ، شلون احصّل 166 صوت وكتلة الاصلاح ما بيهم دون ال 100 ، 50 سائرون 55 ، ما ادري 20 سيد عمار وكذا كذا لو 100 لو 110 غايتها ، شلون تحصّل اصوات 166 اذا ما تتحالف وي فلان وفلان وفلان ، جهة فاسدة جهة بعثية جهة ملشياوية جهة كذا ، جا شلون تمشّي حكومة ، مستحيل فلابد تختار لك ، اخترنا اكبر وحدة حتى تنحل بأسرع وقت
المحاور: بعدك سماحة السيد مؤمن بمشروع وطني عابر للطوائف ، الشعارات الي رُفعت في ما قبل الانتخابات الماضية ، بعدك مُصرّ او ربما مؤمن بيها لو تجربة 2018
القائد السيد مقتدى الصدر(اعزه الله): انت تدري خو سائرون الي هي متعاطفة وياي ، الكتلة الاكبر ، وجان أكدر ألح انه رئيس الوزراء مني والوزراء مني ، مع ذلك تنازلت لا رئيس وزراء مني ، تدري بيه مجلس أعلى ودولة عميقة وكل الي وياهم سووهم مجلس أعلى ، المهم لا الوزراء يشهد الله لا اعرفهم ولا يعرفوني ، مدراء العامين كلهم شلعوهم مال سائرون ومال احرار وطلّعوهم وكذا كذا وآنه الكتلة الاكبر وكل شي اكدر أسوّي ، مع ذلك كلت ماكو محاصصة ماكو تحزّب ماكو عرقية ماكو كذائية ومستمر على هذا الشي الى الممات ، ولن يستقر العراق مع المحاصصة
المحاور: شنهي المساحة المقبلة للتيار الصدري ، اذا التيار الصدري اقتنع في فترة ما بالتحالف مع المدنيين الوطنيين والشيوعيين والدخول في الانتخابات
القائد السيد مقتدى الصدر(اعزه الله): شوف اكلك فد شي ، لو هذا الدعم لهؤلاء الثوار الحاليين من 1/10 ليومنا هذا جان بأيام الخيمة الخضرة وبأيام الاعتصامات جان هسه العراق غير شكل صاير ، جان منتهي الفساد وانتهى ، بس شكيتوا بينا وهوايا شككوا بينا وأنه احنا دنسقّط خصومنا ودنسقط كذا وخلافات سياسية وخلافات طائفية ومقتدى عنده مغانم خاصة بيه ، لو هذا الدعم جان الدولي والداخلي والتعاطف ويانا بحينها هيجي جان نجحنا هسه والدولة غير دولة ، بس آني كاعد بالخيمة انتظر ناس تظّاهر ماكو ، خو مو آني الشعب كله
المحاور: اي بس كان العدد لا بأس بيه في وقت الاعتصامات
القائد السيد مقتدى الصدر(اعزه الله): الاعتصامات ، بس اثناء آني بالخيمة .. يعني تيارية ، التيار لأنه عدده لا بأس بيه تشوفه لا بأس بيه ، بس الفرشة السودة العامة
المحاور : بالاعتصام ب 2016 ما كانوا بس تياريين
القائد السيد مقتدى الصدر(اعزه الله): نسبة 95 الى 99,09 تياريين ما اجذّب عليك ولا اجذّب على نفسي ، وماكو غير التيار يظّاهر أكلك حتى ذوله الي جاي يظّاهرون هم 75% الى 85% منهم تياريين ، بعد ، يجوز بعضهم ما مقتنعين بيه او طلعوا عني او بعضهم مقتنعين بيه ويحبوني وبعضهم يحبون بس السيد الصدر والشهيد الاول والشهيد الثاني بعضهم اختلفت أفكارهم الى علمانية الى كذا بس صدرية ، اتحدى اكبر واحد يكول لا
المحاور : بالأصل همه صدريين
القائد السيد مقتدى الصدر(اعزه الله): بالأصل صدريين
المحاور: تفاجأت بعد انسحاب انصارك من الساحة بالعدد الي بقى بساحة التظاهر؟
القائد السيد مقتدى الصدر(اعزه الله): لا ما اسحبناهم ، بس كلنلهم راح نؤمر بالانسحاب بس لا تنسحبوا
المحاور: بس ما انسحبوا

القائد السيد مقتدى الصدر(اعزه الله): ما انسحبوا بس شويه كتلك جرة اذن، ما ينسحبون
المحاور: هو بالحقيقة بقوا ما انسحبوا
القائد السيد مقتدى الصدر(اعزه الله): سراً كلنالهم ابقوا ، شويه هيج طلّعنه جم واحد والبقية حتى صورياً حتى قناة الحرة تجي تصّورها على كونه انسحاب ، مو الشرقية
المحاور: المساحة الانتخابية والتحالفية المقبلة للتيار الصدري او للسيد مقتدى الصدر
القائد السيد مقتدى الصدر(اعزه الله): يا واش ، ماكو ، ما أدّخل بالانتخابات حرام عليَّ الى يوم الدين
المحاور: ولا قائمةولا كذا
القائد السيد مقتدى الصدر(اعزه الله): آنه كشخص ما أدّخل
المحاور: ولا تدعم قائمة ولا شي من هالقبيل ؟
القائد السيد مقتدى الصدر(اعزه الله): نهائياً نهائياً
المحاور: يعني ولا مشروع جديد
القائد السيد مقتدى الصدر(اعزه الله): طكت روحي كافي ، هي شنهي ، هي يومية ، هم جمالة جنا كل اربع اسنين هسه صارت كل 6 اشهر كون انتخابات وتعال يا عمي طلعني ، ما الي خلك هيجي سوالف
المحاور: البرلمان الجاي ما بيه قائمة تابعة الك لجنابك
القائد السيد مقتدى الصدر(اعزه الله): لا ما ..
المحاور: ابداً
القائد السيد مقتدى الصدر(اعزه الله): أبداً
المحاور : هذا قرار خروج من ال ..
القائد السيد مقتدى الصدر(اعزه الله): هسه آنه حجيتها وتعالي بعد شكد ما أدري ، بعد سنة بعد اربع سنين
المحاور : سيد هذا القرار خروج من العملية السياسية يبدو
القائد السيد مقتدى الصدر(اعزه الله): كشخص ، اي ، التياريين بما همه تيار يردون يدخلون حقهم عراقيين كما ان المدنيين حقهم كما ان الشيوعيين حقهم كما ان باقي الاحزاب حقهم وآني هم .. وهمه هم حقهم ، بس آني كشخص كافيني لحد الان بعد ما اتحمل ، كلشي اله صبر
المحاور: والتياريين من راح يدخلون يأتمرون بأمر جنابك وبالتالي ..
القائد السيد مقتدى الصدر اعزه الله: بكيفهم يردون يأتمرون بامري اعرف شلون اجرجر اذاناتهم ، ما يأتمرون بامري بعد تحملوهم انتوا وشويه .. وقوتهم وحبهم للوطن
المحاور: طيب ، خلينه ننتقل لمحور التواجد الامريكي الي وعدت جنابك انه راح نحجي بيه
القائد السيد مقتدى الصدر اعزه الله: ها .. جزاك الله خير
المحاور: الله يحفظك ، التواجد الامريكي في العراق امنيا وفنيا هناك راي يقول بان وجودهم ضروري القوات الامنية غير مستعدة الى غاية الان لحماية البلد ، هذا جانب ، الجانب الآخر همه مو محتلين
القائد السيد مقتدى الصدر اعزه الله: اكلك همه شنو جاي يحمون البلد؟! ، همه جاي يقصفونه ويضربونه
المحاور: سماحتك اكو رأي ..
القائد السيد مقتدى الصدر اعزه الله: لا لا اذا الجيش والشرطة ما مقتنعين بيهم ما مؤهلين ، همه جاي يحمونه الاحتلال لو جاي يأذونه ؟ ، شو سووا عركة ويه ايران سووا عركة ويه مدري منو سووا ساحة العراق ساحة للصراع ، شو كاموا يقصفون وكاموا ينقصفون وكاموا كذا .. فشتصير الفتنة ، ساء العراق بوجودهم وما تحسن ، اذا الجيش مو زينين همه هم مو زينين ، خو خل يطلعون اثنينهم ، يالله ...
المحاور: بالمقابل اكو رأي يكول خروج القوات الامريكية قد يعيد داعش من جديد بعد 6 اشهر
القائد السيد مقتدى الصدر اعزه الله: خلي مستعدين لداعش ، موجودين ، جاهزين ، بس خلي يرجعون يشوفون شنسوي بيهم
المحاور: منو هو الجاهز يعني الجيش جاهز قصدك لو منو ؟
القائد السيد مقتدى الصدر اعزه الله: الشعب كله جاهز ، التيار الصدري يصير شسمه كله دماء من اجل تخليصكم من داعش ، مستعدين وآني واحد منهم
المحاور: يعني اكو قدرة عسكرية لمواجهة داعش اذا ما انسحبت القوات الامريكية بآلياتها
القائد السيد مقتدى الصدر اعزه الله: وسفة !! التيار شتدري بيه ؟! ما يكدر على داعش ؟!
المحاور: بس ما عنده غطاء جوي ، ما عنده ...
القائد السيد مقتدى الصدر اعزه الله: ما الك علاقة ، احنه اندبر حالنا ! ، ما الك علاقة
المحاور: هذا تعهد
القائد السيد مقتدى الصدر اعزه الله: غطاء جوي هم اكدر احصله ، بعد
المحاور: هذا تعهد
القائد السيد مقتدى الصدر اعزه الله: غطاء دولي هم اكدر احصله ، بعد ؟؟
المحاور: الغطاء الدولي ايضا انت تكدر تحصله منين ؟
القائد السيد مقتدى الصدر اعزه الله: انت شلك علاقة ، آنه بحينها اتصرف !
المحاور: ما بلغتوا الزعامات السنية والكردية الي كانوا معترضين على قرار ال....
القائد السيد مقتدى الصدر اعزه الله: اذا هم بعض القيادات السياسية السنية المتشددة تريد ترجّع المفخخات هم مستعدين احنه انرجّع غير شي
المحاور: شترجعون
القائد السيد مقتدى الصدر اعزه الله: وانت تعرف شني بعد !!
المحاور: ترجع البطة يعني
القائد السيد مقتدى الصدر اعزه الله: اذا يريدون مفخخات يرجعون انرجّع هواي اشياء
المحاور: طيب بلّغت ..
القائد السيد مقتدى الصدر اعزه الله: جيش المهدي مجمّد ترا ما ملغي ، يعني بشخاطة وحدة يموع
المحاور: ممكن يعود مرة ثانية
القائد السيد مقتدى الصدر اعزه الله: ممكن
المحاور: ممكن بأي وقت
القائد السيد مقتدى الصدر اعزه الله: آني هواي افكر بإرجاعه
المحاور: ليش
القائد السيد مقتدى الصدر اعزه الله: حتى ما ترجع المفخخات ، لا ترجع داعش ، جا شتسوي
المحاور: اذا ترجع داعش
القائد السيد مقتدى الصدر اعزه الله: حتى يطلع المحتل ، جا هذا شغله ، بعد جيش المهدي المن اسسته ، يدافع عني لو يدافع عن العراق ؟
المحاور: هو عمليا ليش نعتبره محتل اذا جاي بدعوة من الحكومة العراقية ، عمليا هو مو محتل ..
القائد السيد مقتدى الصدر اعزه الله: آني كنت بالحكومة من قدّمتله دعوة ؟ ، آني مو
المحاور: لا مو جنابك ، لكن ...
القائد السيد مقتدى الصدر اعزه الله: همه ما الي علاقة بيهم ، همه رأيهم الخاص بيهم ، آني لا أدعيته ولا ادعوه ، ولن ادعوه
المحاور: وحضرتك تعتبره محتل
القائد السيد مقتدى الصدر اعزه الله : محتل الى يومنا هذا الى هذه الثانية ، والى مدى الحياة مادام باقية ، اذا طلع لا وحّد ، والسفارة هم شويه ازيد من اللزوم ، ماكو سفارة بيهه 30 الف مدري 40 الف واحد ، هاي مو سفارة ، هاي لعب الزعاطيط ، سفارة كون سفارة من صدك ، اي مو محتلة ، المحتل ما نريد سفارته
المحاور: البعض يعتقد انه سماحة السيد مقتدى الصدر تغيّرت علاقته بايران بعد حادثة مقتل السيد قاسم سليماني وسيد ابو مهدي المهندس
القائد السيد مقتدى الصدر اعزه الله: رحمهم الله
المحاور: رحمهم الله ، الاخيرة ، يبدو ان هناك عمق اكبر لدور السيد مقتدى الصدر بعد هذه المرحلة ، بعد مرحلة سليماني والمهندس
القائد السيد مقتدى الصدر اعزه الله: شتشوف ؟!
المحاور: هي مو بس آني هيجي اشوف ربما المراقبين بعض الآخرين ، هل هناك دور معين للسيد مقتدى الصدر بالتنسيق مع ايران مع الجمهورية الاسلامية في ايران ؟
القائد السيد مقتدى الصدر اعزه الله: دولة جارة وانسّق وي السعودية وي ايران وي تركيا وي ... جيرانه ، انت جيرانك ما تدك الباب عليهم ؟
المحاور: لا آني ادك الباب
القائد السيد مقتدى الصدر اعزه الله: وآني هم ادك الباب عليهم ، شنو حرام يعني ؟!
المحاور: شنو طريقة ...
القائد السيد مقتدى الصدر اعزه الله: بس ما ادك الباب على المحتل ، اذا ايران او غيرها شويه زادت بتدخلاتها اكلهه آنه ، كدام هم اكلهم ، انتو زايد اتدخلتوا ، ما خايف منهم
المحاور: بلّغتهم
القائد السيد مقتدى الصدر اعزه الله: مئات المرات مو مرة ومرتين ، والهم وللسعودية بلغتهم .. لابن سلمان
المحاور: محمد بن سلمان
القائد السيد مقتدى الصدر اعزه الله: ولي العهد هم بلغته وكلهم بلغتهم ، وابو تركيا هم كتله انت محتل ترا ، محتل ومن الاراضي العراقية كون تطلع ، ما اخاف منهم ، بعقر دارهم مو هناه ، مو بتغريدة ، وآني كاعد يمه
المحاور: الدور المقبل للسيد مقتدى الصدر بالتنسيق مع ايران هو استيعاب كل ..
القائد السيد مقتدى الصدر اعزه الله: شمعنى ايران ؟! ، خو التنسيق وي السعودية وي تركيا وي الكويت شمعنى بس تدك على ايران ؟!! ليش ؟!
المحاور: مو آنه اول مرة اجيب طاري ايران سماحة السيد .... صارلنة ساعة ..
القائد السيد مقتدى الصدر اعزه الله: ما احجي عليك ، ليش هاي بس ايران ، خو
المحاور: آني اكلك ليش ..
القائد السيد مقتدى الصدر اعزه الله: خو رحت للسعودية ليش ما تكلي ....
المحاور: والله آني عندي سؤال اسالك عن الزيارات العربية بس فيما يتعلق بايران ، تكلي جنابك ليش ايران ...
القائد السيد مقتدى الصدر اعزه الله: ليش بديت بايران ؟!
المحاور: لانه الجارة الجبيرة الام الحنون ...
القائد السيد مقتدى الصدر اعزه الله: خلص بعد هاي هي ، انت افتتحتهم !
المحاور: الي اقصده جنابك ، ايران عدهه اذرع البعض يعتقد ان ايران لديها اذرع مسلحة
القائد السيد مقتدى الصدر اعزه الله: كلهه عدهه اذرع
المحاور: منو عنده اذرع ؟
القائد السيد مقتدى الصدر اعزه الله: السعودية عدهه اذرع
المحاور: عدهه مليشيات ؟!
القائد السيد مقتدى الصدر اعزه الله: وتركيا عدهه اذرع
المحاور: مليشيات ؟
القائد السيد مقتدى الصدر اعزه الله: بلي عدهه مليشيات
المحاور: معقولة ؟!
القائد السيد مقتدى الصدر اعزه الله: اي ، طبعا ، بس المليشيات السنية للدول السنية ، مو كلها طبعا ، وبعض المليشيات الشيعية للدولة الشيعية
المحاور: طرحت تصور معين على ايران وانت موجود هناك ...
القائد السيد مقتدى الصدر اعزه الله: هسه لا ، هسه بعد ما اتدخلت بالسياسة اصلا ، لا وياهم ولا بالعراق ، بس سابقا يعني حتى الله يرحمه حجي قاسم يعني جان متخبل مني !
المحاور: وبعد وفاة بعد مقتل السيد قاسم سليماني ما صار حديث فيما يتعلق بوضع العراق بعد هذه المرحلة ؟ شلون يتم التعاطي معها ؟
القائد السيد مقتدى الصدر اعزه الله: وياي لا ، بس صار حديث وي بعض الاطراف الشيعية ، اي بعد ما يريدون يتدخلون بالعراق
المحاور: همه ما يردون ...
القائد السيد مقتدى الصدر اعزه الله: كالوا ما نتدخل بصورة مباشرة من تحتاجولنه تعالوا كلولنه ، ما تحتاجولنه .... وفعلا هاي يعني شهرين صار او ثلاثة هواي خف بنسبة فوك ال 70% التدخلات ، اكو بس هواي قل
المحاور: اكو وين ؟ يعني وين بالضبط ؟
القائد السيد مقتدى الصدر اعزه الله: يعني ...
المحاور: يعني كبل جنه نسأل ايران شنو رايكم برئيس الوزراء الفلاني
القائد السيد مقتدى الصدر اعزه الله: هسه ما اتصور
المحاور: ما صارت ...
القائد السيد مقتدى الصدر اعزه الله: اتصور لحد الآن ما صارت ، انت دليلك اصلا محمد علاوي ما قابلين بيه
المحاور: همه ما قابلين ؟
القائد السيد مقتدى الصدر اعزه الله: يعني ، تفاجئوا بيه خل اكول مو ما قابلين بيه ، يعني مو رافضيه بس تفاجئوا بطرح هيجي اسم
المحاور: همه ما عدهم رغبة
القائد السيد مقتدى الصدر اعزه الله: ولا يعرفوه ها
المحاور: ولا يعرفوه
القائد السيد مقتدى الصدر اعزه الله: ولا سألوا ، ولا سألوا ، بس هيجي ناس خبّروهم انه فلان راح يصير ... ها ما ندري بيه اصلا ، يعني مو بالاجواء
المحاور: همه ما عدهم رغبة بالتدخل بالعراق
القائد السيد مقتدى الصدر اعزه الله: اي حاليا ما عدهم
المحاور: ربما مستقبلا
القائد السيد مقتدى الصدر اعزه الله: لانه دولتهم شويه عدهم خطية هم بلاءات سماوية هم بلاءات سياسية ضدهم هوايه ، فكون يقوّمون دولتهم
المحاور: لديك نية سماحة السيد لان تزور بعض الدول العربية ربما مستقبلا ربما في المدى القريب ويعني اجراء حوارات مع زعامات ..
القائد السيد مقتدى الصدر اعزه الله: يعني دول الجوار ؟
المحاور: دول الجوار او غير دول الجوار
القائد السيد مقتدى الصدر اعزه الله: لا ما اتصور ... يعني اذا صارت اكو مصلحة للشعب العراقي اروح لاي دولة كانت
المحاور: لكن على المدى المنظور ما ممكن
القائد السيد مقتدى الصدر اعزه الله: لا يوم يومين شهر شهرين ما عندي هيج موعد محدد ، بس جاهز اذا فيه خدمة للشعب العراقي جاهز ، بس ما اتصور هسه اكو فد شي يعني مورد مهم
المحاور: اعود للتواجد الامريكي ..
القائد السيد مقتدى الصدر اعزه الله: هي المرة الوحدة الي رحت مو لاجل الشعب العراقي مو ضده مال فاتحة الكويت دولة الكويت من صار تفجير بالمسجد رحت عزّيت وارجعت ، بس هاي ، وصار هم حديث عن العراق وكذا ، كله آنه اجيّره لصالح العراق ، ماكو شي لصالح العراق اكعد واسكت
المحاور: ارجع مرة ثانية للتواجد الامريكي وطريقة التعامل بالنسبة للبرلمان او بالنسبة للدولة العراقية بشكل عام
القائد السيد مقتدى الصدر اعزه الله: او يخابر رئيس الوزراء الجديد يكله كذا وكذا
المحاور: منو ؟ وزير الخارجية ؟
القائد السيد مقتدى الصدر اعزه الله: اي ، وزير الخارجية الامريكي ، هاي التدخلات مرفوضة
المحاور: هاي تعتبره تدخلات ؟
القائد السيد مقتدى الصدر اعزه الله: مرفوضة
المحاور: منو يكول ...
القائد السيد مقتدى الصدر اعزه الله: واذا تكررت او زادت قد ما نسكت ، نحجي
المحاور: حضرتك تريد نكطع العلاقة وي امريكا ؟
القائد السيد مقتدى الصدر اعزه الله: انحدّد العلاقة مع امريكا مو كمحتلة
المحاور: وشنو نوع هذا التحديد ؟
القائد السيد مقتدى الصدر اعزه الله: تطلع كمحتلة وتظل سفارة حالها حال السفارات الاخرى والتعامل بالمثل ، السفارة العراقية بامريكا هم كون 36 الف مدري 40 الف واحد او تقللها اثنيناتهه ، تعامل بالمثل ، ما يعاملونه زعاطيط صغار جوه ايديهم
المحاور: وحينذاك تستمر هذا التحديد
القائد السيد مقتدى الصدر اعزه الله: اذا مو محتلة
المحاور: واذا محتلة احنه عدنه خيارات
القائد السيد مقتدى الصدر اعزه الله: ما نتعامل وي المحتلة ، اي محتل آخر ، اسرائيل ، آخر ، كذا كذا ، اي دولة محتلة ما نرضى بيهه تجي تفتح سفارة عدنه
المحاور: طيب ، بيوم 24 / 1 لمن كانت التظاهرات قائمة ، حضرتك اصدرت بيان بيه مجموعة من النقاط طالبت بعدم إستهداف السفارة الامريكية وايقاف العمل العسكري الى حين استنفاذ الطرق السياسية والديبلوماسية ، هل هناك طرق سياسية وديبلوماسية قائمة الى غاية الان حسب ما يرد الى مسامعك ؟
القائد السيد مقتدى الصدر اعزه الله: شويه التهينه بتشكيل حكومة ، هاي مشكلة مال تشكيل الحكومة ، فبعد هيج شويه كعدوا الامور يعني ، والحمد لله يعني افراد الحشد الشعبي الفصائل شويه تعاونوا هم وياي ، هم جزاهم الله خير ، وله خو جان يكدرون يصعّدون ضد امريكا ، بس آني الي ابّالي انه العراق كافيه حرب ، نكدر انطلّع امريكا بغير طرق ، اذا ما كدرنه بغير طرق مستعدين انه نحارب من جديد ، وإنّا لله وإنّا اليه راجعون ، سيادة العراق مهمة عندي جدا
المحاور: الحكومة الانتقالية راح تبدي باجراءات انهاء التواجد
القائد السيد مقتدى الصدر اعزه الله: المفروض ، هاي من شروطها ، احسنت هسه انت ذكّرتني
المحاور: لو الحكومة الي بعدها
القائد السيد مقتدى الصدر اعزه الله: اثنينهم وهذا يمّهد ذاك يكمّل ، وهذا من المهم انه الدولة الي تجي جديدة مو تسقّط السابق ، تبني
المحاور: تكمّل
القائد السيد مقتدى الصدر اعزه الله: احسنت تكمّل ، مو واحد يعادي اللاخ ، هذا من حزب الكذائي يجي وراه حزب آخر كون يعادي ذاك وهو يسوي غير شكل ، لا ، واحد يكمّل الآخر ، هذا هم مهم
المحاور: وحدة من الاشياء الي طُرحت فنيا وعسكريا انه التواجد الامريكي قد يستمر 3 – 4 سنوات مقبلة الى حين ان تُستكمل التدريبات
القائد السيد مقتدى الصدر اعزه الله: جيش المهدي هم بشخاطة ينفك !!
المحاور: يعني هال 3 سنين اربعة ما تقبلون عليهه
القائد السيد مقتدى الصدر اعزه الله: لا
المحاور: اطلاقاً ؟ ، عدكم حد معين لانهاء ..
القائد السيد مقتدى الصدر اعزه الله: جاي انراعي شويه ظروف العراق هسه ، حكومة ما حكومة ومظاهرات ، شويه اذا هدأ لا ، نعرف شلون نتصرف ، ترا بعدنه ما نخاف
المحاور: ومستعدين للمواجهة
القائد السيد مقتدى الصدر اعزه الله: المواجهة ، الموت ، بس ما نريد نضرّر العراق والله مو اكثر من هاي ، شعبه خطيه جزع من حرب لحرب
المحاور: طيب الرأي الكردي والسني الى غاية الان قائم على ضرورة تواجد القوات الامريكية
القائد السيد مقتدى الصدر اعزه الله: ولذلك هسه دزيت رسالة للاخ مسعود كتله بقناتك انه كون ما يتعاطف وي الامريكان ، ما يفيدوه ، انفيده احنه
المحاور: هذا مو تعاطف هو الرجل كاعد يصدّر امور قد تكون واقعية على الارض
القائد السيد مقتدى الصدر اعزه الله: مثلا ؟
المحاور: مثلا ايكول احنه قدرتنا العسكرية غير قادرة على حماية هاذي الصحراء او الحدود ...
القائد السيد مقتدى الصدر اعزه الله: نتعاون آني وياه وغيره ونسوي ...
المحاور: هو وجد تعاون هسه خل يبدي التعاون ويكتمل الرؤيا
القائد السيد مقتدى الصدر اعزه الله: مو انت مو مليشيات ومدري بيشمركة وكذا وتريد تقوّي الجيش وشرطة ، حتى سرايا السلام هذا مو تقوية هذا اضعاف للجيش وشرطة ، تريد انحل البيشمركة والحشد الشعبي والكذا والكذا او نجمّده ونقوّي جيش وشرطة جاهز من هاللحظة ، بس مو ها .. حل السرايا بس والباقي يبقون ، لا هاي ما اسويهه ، اخير واحد آني احل السرايا اذا حلوها همه البيشمركة والحشد الشعبي
المحاور: والبيشمركة تعتبرها مليشيا ايضا ؟
القائد السيد مقتدى الصدر اعزه الله: مليشيا
المحاور: همه حرس اقليم
القائد السيد مقتدى الصدر اعزه الله: مليشيا
المحاور: مليشيا ؟
القائد السيد مقتدى الصدر اعزه الله: لا تخليني اكررها مرة اخاف يزعل ، ما دام مو جيش وشرطة (مليشيا) ، هسه رسمية مو رسمية هذا امر اخر
المحاور: الدستور يسميها حرس اقليم
القائد السيد مقتدى الصدر اعزه الله: حرس الاقليم جيش وشرطة ، شيعي يحمي الاقليم وكردي يحمي الجنوب ، بعد ، هو هاي الدولة ، مو انه الكردي يحمي الاكراد والشيعي يحمي الشيعة والسني يحمي السنة ، هاي مو دولة ، هاي خرط !
المحاور: بقالي دقيقتين فقط على اللقاء وآنه اتمنى انه يطول اللقاء اكثر ، اريد ارجع بهاي الدقيقتين على مساحة المتظاهرين بطريقة او باخرى ، الزعل بعده مستمر بيناتكم ؟ بين الثوار وبين سماحة السيد مقتدى
القائد السيد مقتدى الصدر اعزه الله: آني بالنسبة الي كشخص ما ازعل وياهم نهائيا وهمه سووا الي جوز آني ما اكدرت اسويه بالمظاهرات القديمة ، سووا هواي مطالب اتحققت ، شجعان ، شهدائهم شهدائي ، ولن انساهم ، دمائهم دمائي ، اخوتي ، بس انصحهم لا يزيدون بالعنف علمود سمعتهم ، علمود تعاطفي وياهم ، نجاح ثورتهم بسلميتهم ، وآنه معهم ، غصبا عليّ آنه وياهم ، حتى وان عاقبتهم ، حتى وان كان شويه صار صدام فآني أب أعتبر روحي مو اكثر من ذلك ، لا اتدخل بيهم ولا اريد ادخل على الخط لانه اذا دخلت على الخط راح تصير تيارية وآني ما اريد تصير تيارية ، التيار قام الي عليه سواه واكثر جزاهم الله خير ، الباقي خلي الشعب يسويه ، خلي العشائر تطلع ، خلي الكذا يطلع ، بس مو بالاجبار ، من تسد .. حتى وافقناهم على الاضراب ، الاضراب الطوعي ، مو تجي تكتل الاستاذ والاستاذة والطالبة ، تكلهم اله تطلعون وما اتداومون ، الي يريد ايداوم خلي ايداوم ما يريد ايداوم لا يداوم
المحاور: بهاي المناسبة الي سموه انصارك بوزيركم صالح محمد العراقي ، بالمناسبة من هو صالح محمد العراقي سماحة السيد ؟ البعض يكول جنابك ، هيج متنكر بهذا الاسم !
القائد السيد مقتدى الصدر اعزه الله: لا مو بالضبط ، هي صفحتي بالبداية ، آنه تدري ما عندي هيجي واهس بهيج امور هوايَ انطيتهه لواحد ايديرهه
المحاور: تكدر اتسويلي واسطة وي هذا الواحد اسوّي وياه لقاء ؟ لان شخص مهم صالح ...
القائد السيد مقتدى الصدر اعزه الله: انصحك لا تسوّي وياه لقاء
المحاور: ليش شمسوي ؟!!!
القائد السيد مقتدى الصدر اعزه الله: شويه هيج ، يعني شعبوثي ! ، اتجنبه احسن
المحاور: طيب ، صالح محمد العراقي كان هو الي رفع شعار "ماكو وطن ماكو دوام" بالبداية
القائد السيد مقتدى الصدر اعزه الله: كتلك ، مو كون فترة ، مو فد شي مفتوح ، اولا طوعي ، فترة محدودة ، كلنه الابتدائية استثنوها ، خو الابتدائية ما يتظاهر شتسوي بيه ، اساتذتهم محدودين ، ايداوم الصبح يتظاهر وياك العصر ، شنو المشكلة ؟ يعني ليش تدمروا الثقافة ليش تدمّر علم ، جريمة ، والناس تريد اولادها تنجح ، يعني باجر عكبه زين مظاهراتك .. والله لو تبقى 30 سنة اذا تبقى على الفاسدين ما يحققولك ولا مطلب ، ثم انت تقطع طريق شيتضرر السياسي ؟ ، روح اقطع عليه غير شي
المحاور: شيقطع عليه ؟
القائد السيد مقتدى الصدر اعزه الله: سمّيه تحريض
المحاور: لا والله خل نفتهم
القائد السيد مقتدى الصدر اعزه الله: اكو اشياء همه يفتهمونها ويدرون بيهه وسووهه وعادوهم اكثر من يقطعون طرق محد يجيهم ، خلوهم قاطعين طرق ، لانهم منو لانه يدرون ان التعاطف راح يقل وياهم ، اما من حاصروا بنك اشسووا بيهم ؟ طشّروهم اتطشر ، بعد انت افهم
المحاور: تمام ، قبل ما انهي ..
القائد السيد مقتدى الصدر اعزه الله: بس مو سرقة بنوك ها
المحاور: قبل ما انهي ايضا ، الخطوات التصعيدية الي مقبل عليها التيار الصدري في حال لم تمر الحكومة والي جنابك هددت بيهه او لوّحت الهه بشكل او بآخر راح تكتفي فقط بالاعتصام حول الخضراء ام ان هناك خطوات تصعيدية اخرى بهذا الاتجاه ؟
القائد السيد مقتدى الصدر اعزه الله: اذا علاوي جاب محاصصة اوكف ضده ، اذا الكتل رفضت الحكومة المستقلة ولحت عالمحاصصة اوكف ضدهم ، وهكذا ، آنه مدَ ادعم علاوي ، آني ادعم شي اسمه سيادة العراق وسيادة الحكومة العراقية باستقلاليتها عن الاحزاب ، ما اريد دولة عميقة بعد ، اذا حققه علاوي آني وياه ، ما حققه علاوي آني ضده ، بعد ؟
المحاور: وهاي الشروط ..
القائد السيد مقتدى الصدر اعزه الله: مو اله علاوي ، لو واحد من الحنانة صار رئيس وزراء وسوه محاصصة آني هم اعرف شلون اتصرف وياه ، تدري آني علاوي يمكن ما شايفه ، ما شايفه ، ما كاعدين كبل
المحاور: ولا صاير تلفون بيناتكم بعد التكليف
القائد السيد مقتدى الصدر اعزه الله: لا التلفون خابرته
المحاور: بعد التكليف
القائد السيد مقتدى الصدر اعزه الله: خابرته ، شويه يعني اريد اروزه اشوف شنو وضعه
المحاور: شنو جان رأيك ؟
القائد السيد مقتدى الصدر اعزه الله: الضغوطات كلش قوية عليه
المحاور: شستشفيت منه من اجوبته من شخصيته من وضعه ؟
القائد السيد مقتدى الصدر اعزه الله: هو كشخص آني ارغب بيه بس هل ينجح اداريا مع هالضغوطات الاحزاب والكتل ؟ الله العالم
المحاور: الخطوات التصعيدية المقبلة بالنسبة للتظاهر راح تكتفي فقط بتطويق المنطقة الخضراء اعتصام ام ان هناك امر ما ؟
القائد السيد مقتدى الصدر اعزه الله: تريدون اكثر بالخدمة جاهزين !
المحاور: انتوا شمفكرين ؟
القائد السيد مقتدى الصدر اعزه الله: آني المهم ما تصير محاصصة ، حكومة بعد كون يختارها الشعب ، كون انتخابات مبكرة ، صارت امشي ، ما صارت اصعّد
المحاور: سماحة السيد مقتدى الصدر آني آسف جدا انه الوقت انتهى وكنت اتمنى ان استمر ..
القائد السيد مقتدى الصدر اعزه الله: نتشرف ، ان شاء الله مو آخر لقاء
المحاور: ان شاء الله يتكرر مرة ثانية
القائد السيد مقتدى الصدر اعزه الله: ان شاء الله ما تاخذنه الكرونا ونستمر بهاي !
المحاور: عندك العافية وسلامات ان شاء الله ، شكرا جزيلا لتشريفك لجنابنا هذا اليوم وان شاء الله تتكرر اللقاءات مرة اخرى ، شكرا لحضرتك
القائد السيد مقتدى الصدر اعزه الله : ممنونين
المحاور : وانتم سادتي المشاهدين الكرام شكرا لطيب المتابعة ، التقيكم في حلقات مقبلة باذن الله تعالى

احسنتم وجزاكم الله تعالى خيرا