العودة   منتدى جامع الائمة الثقافي > قسم آل الصدر ألنجباء > منبر سماحة السيد ألقائد مقتدى الصدر (أعزه الله)

منبر سماحة السيد ألقائد مقتدى الصدر (أعزه الله) المواضيع الخاصة بسماحة سيد المقاومة الإسلامية سماحة القائد مقتدى الصدر نصره الله

إنشاء موضوع جديد  إضافة رد
 
Bookmark and Share أدوات الموضوع انواع عرض الموضوع
قديم 22-04-2018, 10:53 AM   #1

 
الصورة الرمزية خادم البضعة

الملف الشخصي
رقــم العضويـــة : 23
تـاريخ التسجيـل : Oct 2010
العــــــــمـــــــــر :
الـــــدولـــــــــــة : العراق الجريح
االمشاركات : 12,468

ختم النص الكامل لمحاضرة القائد السيد مقتدى محمد الصدر اعزه الله حول ركائز الأمر بالمعروف والنهي عن المنكر 19 / 4 / 2018

توكلّتُ على الله رب العالمين
وصلى الله على خير خلقه محمدٍ واله اجمعين
بسم الله الرحمن الرحيم
خروجاً عن الروتين السياسي أحببت أن أدخل المجتمع في طاعة الله سبحانه وتعالى وإرجاعه الى الله سبحانه وتعالى قدر المستطاع ولذلك أحببت أن ألقي على مسامعكم محاضرة لعلها تكون من جزئين أو أكثر، الله العالم ، لمسألة إبتلائية وموضوع متأزم جداً في المجتمع العراقي خاصة وفي العالم عامة الا وهو موضوع " الأمر بالمعروف والنهي عن المنكر " ، فهناك في المجتمع سوء تطبيق لهذه الشعيرة ، هم اكرر في المجتمع عموماً وفي التيار الصدري خصوصاً ، الأمر بالمعروف والنهي عن المنكر من الواجبات المنصوص عليها والمتسالم عليها ، حتى ورد :
بسم الله الرحمن الرحيم " وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولَئِكَ هُمُ الْمُفْلِحُونَ "
وفي الحديث : قال النبي صلى الله عليه وآله وسلم : " كيف بكم اذا فسدت نساؤكم وفسق شبابكم ولم تأمروا بالمعروف ولم تنهوا عن المنكر . فقيل له : ويكون ذلك يا رسول الله ؟ .. طبعاً زمن كبل يتعجبون ماكو هيجي شي .. قال نعم ، فقال : كيف بكم اذا امرتم بالمنكر ونهيتم عن المعروف ؟ فقيل له يا رسول الله : ويكون ذلك ؟ فقال نعم وشرٌ من ذلك .. يعني أكثر من ذلك بعد .. كيف بكم اذا رأيتم المعروف منكراً والمنكر معروفا ؟
فاذاً من هذه الآية والرواية نستنتج وجوب الأمر بالمعروف والنهي عن المنكر، لكن مو هذا الذي يجب ان نثبته بالمحاضرة وبالبحث ، لأنه الكل يعلم بوجوبه .
أستنبطتُ أو أتيت لكم بكلمات من كتب السيد الوالد قدس سره ، بتصرف مني سألقيها عليكم فأرجو الإصغاء .
فالأمر بالمعروف والنهي عن المنكر لم يكتسب أهميته فقط من الآيات والروايات بل إن نتائجه مهمة ، اذا قمنا به صَلُحَ المجتمع واذا تركناه فَسُدَ المجتمع ، لكننا وكأي شعيرةٍ أخرى نصطدم ببعض المشاكل ، شنو هي ؟ ، اكو مشكلة كبيرة هناه ، وهي وقوع هذه الشعيرة ( الأمر بالمعروف والنهي عن المنكر ) بين أمرين :
اما أن تقع في التشدد أو تقع بالتحرر الشديد ، اما ان نترك الأمر بالمعروف وهذا هو التحرر ، وأما يقوم بالأمر بالمعروف والنهي عن المنكر متشدد ويكطّع رقبة ويجلد ، يالله ، لو هاي لو هاي ؟! ، خير الامور الوسط حبيبي ، لا تترك الامر بالمعروف ويفسد المجتمع ولا تطبّقه بشدةٍ وعنف فأيضاً ينفر المجتمع ويفسد المجتمع ، والمتضرر الوحيد بهذه المشكلة منو ؟ هو الاسلام ، تتشوه سمعة الاسلام بين التشدد وما بين التحرر .
اذاً المشكلة ما هي ؟ وقوع هذا الامر بالمعروف والنهي عن المنكر بين امرين ، اما التشدد والجهل في كيفية تطبيقها فنكون – وآسف – دواعش الامر بالمعروف والنهي عن المنكر، والا همه هم ذولاك بالموصل والانبار وسوريا وغيرها هم يقولون احنه نقيم الامر بالمعروف والنهي عن المنكر والحدود ، جيبه واكطع رقبته ،بعدين هذا الي كطع رقبته اهتدى ؟ الله يتوب عليه ما يتوب عليه ، احنه نريد هداية مجتمع لو نريد قتل مجتمع ؟ احنه نريد هداية مجتمع لا نريد قتل المجتمع . اذا كان الامر بالمعروف والنهي عن المنكر مُنّفر للاخرين اتركه احسنلك ، فنكون دواعش الامر بالمعروف والنهي عن المنكر .
خلّوني اطلّع البكلبي ، داعش تقطع رقاب ، عليها اللعنة والعذاب ، عوفوها خل تولي ، مو من الاسلام راح نكول ، هم ميخالف مشيهه ، بس اكو ناس محسوبين علينا ، سمع باتصال اجاه – آسف خلوني احجي بصراحة – اجه اتصال ان فلان زانية ، راح على البيت بالاشتباه طب على جيرانها ، زينلهه صفر وطلع ، هاي شنو ذنبها ؟؟ امام مجتمعها وامام ناسها شنو ذنبها ؟ انت جاهل شدخلك بالامر بالمعروف والنهي عن المنكر ، روح تكتر اكعد ببيتك ، اكو من هم اهل الحل والعقد من يقومون بهذا الواجب مو انت تقوم بهذا الواجب ، كون الصراحة ما تزعلكم .
هذا التشدد من جهة ، عدنه التحرر من جهة اخرى ، مو بس بالغرب ها ، مو بس باوربا وامريكا سقط الامر بالمعروف والنهي عن المنكر ، هاي بغداد ليست عنك ببعيدة ، هاي المحافظات كلها ، شمال جنوب غرب شرق ، اذا الزمتلك واحد بنص مول ، سوك ، اي شيء ، وكتله ، مثلا شفته يفعل منكر ، وامرته بالمعروف ونهيته عن ذلك المنكر ، فاذا اكو جمع من الناس شراح يكلولك ، عوفه شني هالتخلف ، عوفه شلك علاقة هاي حرية شخصية ، هاي مو حرية شخصية حبيبي ، الذي يُذنب في المجتمع لا يؤذي نفسه فقط بل يؤذي الاخرين ايضاً ، كول لا ؟! ، فعليه ، امثلك مثال ، اذا واحد مريض ، صخونة بيه ، ما يعدي الاخرين ؟ بيتك ويم عائلته تكعده بغرفته تكله لا تجي يم الاطفال يم الكبار حتى لا تعديهم ، وتكعّده وتعزله ، زين احنه ، همه بالله ما يؤمنون بالمعنويات احنه ليش ما نؤمن بالمعنويات ؟ بالله المرض يعدي ، بس الآثام والذنوب والسفاح والمحارم لا تُعدي ؟! لا ، تُعدي اشو ، وهي ما صارت وما وصل المجتمع لهذه الدرجة من الرذيلة الا بهذه العدوى ، هم كول لا ؟! .
فاذاً هم اكو صخونة الهه دوه ، اكو ذنوب وآثام الهه دوه ، دوائها شنو ؟ الامر بالمعروف والنهي عن المنكر ، تطيه براسيتولة تهدّئه .
والثاني هو التحرر الكبير والتفسخ العظيم الذي ادى الى تركها وصيرورة فعل الحرام وترك الواجب امرا شخصيا من الحريات الشخصية التي لا يجب ان يتدخل الاخرون بها ، متناسين ان فعل الحرام وترك الواجب اذا صدر من شخص فقد يعم من ناحية الآثار المادية والمعنوية ، فهو ينتشر كانتشار النار في الهشيم ، هذه الآثام تنتشر بكل سهولة ، تروح تصلّي محد يصلّي وراك بس تروح تسوي موبقة بنص الشارع كلها وياك ! لان النفس الامارة بالسوء مزروعة في النفس حبيبي ، ونسينا ان الله يقول " حبّب اليكم الايمان وزينه في قلوبكم وكرّه اليكم الكفر والفسوق والعصيان " احنه صار بالعكس ، حبّب اليكم الكفر والفسوق والعصيان وكرّه اليكم الإيمان ، رأيتم المنكر معروفاً والمعروف منكرا ، ما يحجون عبط المعصومين تره .
امثللكم بعض الامثلة الاخرى للتوضيح
شرب الخمر من المحرمات شرعا ً وعقلاً وقانوناً ، هم كول لا ؟! بالله شيترتب عليها ؟ يترتب عليها الثمل السكران اذا صعد سيارة ، ونكر سويج وساق بالسيارة ، شكم واحد راح يخمط بطريقه ؟ اذاً اكو آثار مادية فضلاً عن المعنوية ، فانتو لا تتصورون انه .. هو شراح يكلك ، آني كاعد ببيتي وجاي اشرب خمر انت شلك علاقة بيه ؟ لا ، مو شلك علاقة بيه ، هذا شربك للخمر انت فرد من المجتمع واذا نظرنا الى ان هناك تكافل مجتمعي يجب ان يكون التكافل المجتمعي هكذا ، انه انت ما تُذنب حتى آني ما اُذنب ، انت تفعل الواجبات أنا افعل الواجب ، مو كلشي ما الي علاقة ، لا الي علاقة ، بس اكرر ، اي واحد ما يعرف بالامر بالمعروف والنهي عن المنكر خل يتكتر ، حرام عليه يتدخل ، آني هنانه ما جاي آمركم ان تأمرون بالمعروف وتنهون عن المنكر ، لا ، جاي أمركم انه تتعلمون اصول الامر بالمعروف والنهي عن المنكر ، واذا لم تتعلموها آني ووياكم نتكتر احسن النه ، حفاظاً لسمعة الاسلام والمسلمين ، صلّوا على محمد وآل محمد .
السكران طبيب اعتبره ، وبيده جوه ايده مريض ، واجه من الصبح سكران ، واجه يريد يسوّي عملية لهذا ، شيصير بيه هذا بالله ما يموت ؟ اكو آثار مو ماكو آثار ، مستحيل ماكو آثار ، لا يقنعوكم ماكو آثار .
مثال ثاني ، السفاح والعياذ بالله ، الزنى والعياذ بالله ، بالله شيترتب عليه ؟ بس هاي زنا وهايهيه ؟ هذا الفعل الشهوي القبيح ، لا حبيبي ، تترتب عليه اختلاط المياه والعوائل والانساب والقتل والعشاير ، كل هاي المصايب تترتب على هذا الأثم ، المجتمع يصل الى التفسخ والانحلال والتميّع والى ضياع الانساب ، السرقة ، عوفنه شرب الخمر والسفاح ، السرقة ، ضياع الاموال ، وانت هم لا تفرضهه انسرق منك مليون ومليونين دينار ، اكو تبييض بنوك ، مليارات الدولارات ، راح المجتمع كلها .. والدولار يصعد والفقراء يزيدون وكذا وكذا ، كل هاي آثار السرقة ، آثار الأثم ، فيوجد للآثام آثارٌ معنوية فضلاً عن المادية ، ومن هنا ولكي لا نقع بالمحذور احببت ان القي على مسامعكم بعض الكلمات ، منها :
ان الامر بالمعروف والنهي عن المنكر له ثلاثة ركائز ، ماهي ؟
الركيزة الاولى : هو الآمر بالمعروف والناهي عن المنكر .
الثاني : هو المأمور بالمعروف والمنهي عن المنكر.
الثالث شنو ؟ بالله هذا آمر وهذا مأمور ، ما يقال ، اي محتوى الامر بالمعروف والنهي عن المنكر ، وهذا المحتوى جدا مهم ، تَجَدُدْ ، ولذلك انا من هنا ادعو الى تجدّد الخطاب الديني لكي يتلائم مع مجتمعنا الحالي ، انا ليش صعدت على هذا المنبر، هم مو كوتره حبيبي ، اريد ادعم هذا المنبر اريد اعلّي شأنه ، هذا مو بس تصعد عليه بهتافات وبسبسه ، ما اريد اكول بعد ما اريد احجي ، كون تطيه حقه ، تطي حقه للمنبر، بخطاب متجدد يتناغم مع عقول الشباب الذين تتناغم شهواتهم مع الانحراف ويبتعدون عن الايمان ، كول لا ؟! .
فتجدد الخطاب سوف يؤدي الى كسب الاخرين الى الاسلام ، الاسلام ليس العنف ، الاسلام هو التسامح ، فيجب ان يكون الامر بالمعروف والنهي عن المنكر من هذا الباب ايضا ، ثلاثة ركائز للامر بالمعروف والنهي عن المنكر، الآمر والمأمور والمحتوى ، أما الآمر، المشكلة وين وصلنا ، هو شرطي هو جلّاد هو قاضي ، يجي يؤمره بالمعروف ، يثبت انه هذا يسوي المنكر، ما يحقق اصلا وياه ، جابه سحله ، يابه شنو ؟ شارب خمر، هم خلوني اطلع البكلبي ، جابه جره سحله ، يابه مو آني ، يابه دخيل الشهيد الصدر مو آني ، زين ؟ قام عليه الحد ، يعني شرطي ، يعني قاضي حكم عليه ، يعني جلاد طبق عليه ، كلولي شنو فرقه هذا عن الداعشي ؟! اكو عدكم جواب مقنع ؟ ماكو، مو هيجي الامر بالمعروف والنهي عن المنكر هذا قبيح هذا يشوه سمعة الاسلام هذا يشوه سمعة المعصومين سلام الله عليهم ، صحيح امير المؤمنين اقام الحدود ، ما اكول لا ، اقامها ، هو معصوم ، احسن من كل الخلق عدا رسول الله صلى الله عليه واله وسلم ،
من حقه يقيم الحدود ، بس شوف شلون قام الحدود ، تجيه المراة تُكله آنا زانية ، فيشيح بوجهه عنها مرة ومرتين وعشرة ويتعتعها ويدفعها ، يكلها روحي ، الف مرة صارت كدامه مورد لاقامة الحدود ، بالله شكم مرة طبق الحد واقامه فعلا وكم مرة عفا عنهم ؟ انا على يقين تسعة وتسعين بالمية عفا عنهم ، واحد بالالف ، هاي ما اريد ابالغ ، طبعا واحد بالعشرة الاف هم اكدر اكول ، واحد بالالف اقام الحد ، ما أصير داعشي ، تسعة وتسعين بالمية اقيم الحد والي عنده واسطة اعوفه ، واضح ؟ التفتوا ، على ان العفو والاسلوب بالأمر بالمعروف والنهي عن المنكر هو الذي يهدي الآخر، هو الذي يهدي المأمور بالمعروف والمنهي عن المنكر ، مو بس السوط والجلد ، لا بالعكس هذا ينفرّه ويخلّي منه اذا هو هسه مسلم يصير مو مسلم وينحرف وتكومون تصيحون كتلّوهم كتلّوهم ، لا هذا مو صحيح ، يجب ان يكون الآمر بالمعروف والنهي عن المنكر يتصف بصفة مهمة جدا ، انه آمرٌ لنفسه بالمعروف ومُطبقٌ للمعروف وناهيا نفسه عن الهوى وعن الذنوب وعن الآثام ، اما آني اجي مسوي آثام ومسوي منكر وتارك واجب واجي آمر بالمعروف والنهي عن المنكر ، هذا ما ممكن ، اصلا عند الله حرام ، من الكبائر، ولذلك اذا هم سامعين انتو باقامة الحدود ، انه الي عليه ذنب ما يقيم حد على الآخر، فالآمر بالمعروف والناهي عن المنكر يجب ان يكون صائناً لنفسه عن الحرام ، وموظبا نفسه على الواجبات يالله يؤمر بالمعروف وينهى عن المنكر، اذا مسوّي أثم هلكبره فليترك .
الركيزة الثانية : المأمور بالمعروف والمنهي عن المنكر ، الطرف الثاني يجب ان تُوصل له الخطاب بصورة صحيحة وواضحة وبآلية اخلاقية ولطيفة كلٌ بدرجته ، مرة تؤمرلك واحد مثقف شكل ، مرة تؤمرلك واحد عامي من عوام الناس باسلوب اخر وشكل اخر ، مرة تؤمرلك مسلم بأحكام شرعية وكذا وكذا بشكل ، مرة تاخذه من غير الاسلام وتريد تؤمره بالمعروف وتنهاه عن المنكر هذا هم باسلوب اخر وشكل واخر .
الركيزة الثالثة : محتوى الامر بالمعروف والنهي عن المنكر، وهذا قلت انا هنا اكرر، تجديد الخطاب الاسلامي لكي يتناغم مع عقول المجتمع الحالية والا لا يمكن ان ننشر الامر بالمعروف والنهي عن المنكر بين المجتمع اذا ما يصير تجديد بالخطاب ، ويقول السيد الوالد ، لا اريد اطيل عليكم كثيرا ، واما الاول اي الآمر بالمعروف ، يجي يطّينه مصاديق للآمر بالمعروف والناهي عن المنكر ،شنو هي المصاديق ؟ ان الله سبحانه وتعالى هو الآمر بالمعروف والناهي عن المنكر، وهو المشرّع لهذه الشعيرة ( الامر بالمعروف والنهي عن المنكر) ، هذا واحد .
2- الانبياء هم آمرون بمعروف وناهون عن المنكر، باعتبارهم المبلّغين والمبّشرين .
- وكذلك الثالث منو ، الاوصياء المعصومون سلام الله عليهم ، ائمة اهل البيت سلام الله عليهم ، ايضاً آمرون بالمعروف ناهون عن المنكر.
يُخصص رابعا : نبي الإسلام وليس فقط الانبياء عموما بل نبي الاسلام باعتباره هو المشرّع للاسلام .
- الفقهاء قدس الله الماضين وحفظ الله الباقين ، ايضا آمرون بالمعروف وناهون عن المنكر، يعني شنو عليه ؟ مو بس تشتم بالفقهاء والعلماء ، اترك شتم العلماء والفقهاء رجاءً ، مو اربعة وعشرين ساعة غيبة وكص بيهم ها ، يعرفون احسن مني ومنك همه .
بعد اطروحة اخرى ومثال آخر للآمر بالمعروف والناهي عن المنكر :
- المؤلفون للكتب باعتبارهم ينشروهه للثقافة ، للأمر بالمعروف والنهي عن المنكر.
ثامناً : اي آمر بالمعروف وناهي عن المنكر، بالشارع امرنه بالمعروف ، هذا هم مصداق للآمرين بالمعروف والناهين عن النكر.
تاسعاً : اي شهير او امير او مدير له مشروع للأمر بالمعروف والنهي عن المنكر، فكرة راجحة في المجتمع ، هذه هم احد مصاديق الآمرون بالمعروف والناهون عن المنكر.
العقل : وورد في الحكمة ان العقل نبي من الداخل ، فاذن العقل بما هو عقل حينما يفكر صحيح وبالمنحى الصحيح هو ايضا شنو ؟ مصداق للآمر بالمعروف والناهي عن المنكر.
غيره شنو؟
- الالهام ، الالهام هذا ما نكدر ندخل ونخوض باسراره ، علاقة الرب بعبده والعبد بربه ، اكو علاقات خاصة باطنية ، يلهمه الله بعض الكلمات ، بعض الامور، فهذا ايضاً أمر بالمعروف ونهي عن المنكر.
- جبرائيل سلام الله عليه ، هم يقول السيد الشهيد ( السيد الوالد ) انه ايضا مصداق وأحد مصاديق الآمر بالمعروف والناهي عن المنكر.
اطروحة اخرى للسيد الوالد
- اي شي من الخلق بما هو خلق بل اي آية من آيات الله هي شنو؟ امر بالمعروف ونهي عن المنكر (( وكأين من ايةٍ في السماوات والارض يمرون عليها وهم معرضون )) لا تمرون عليها معرضون بل دققوا النظر بما حولكم من اشخاص وآيات سوف تتعظون وسوف تُؤمَرونَ بالمعروف وتُنْهَونَ عن المنكر.
يضيف ايضا ، شوفوا هاي الملاحظة المهمة
- اعداء الله : هم ايضا آمرون بالمعروف وناهون عن المنكر، سامعين انتو " الظالم سيفي انتقم به وانتقم منه " كذلك اخذوا الحكمة من العدو ايضا ، انت من تشوفه يسوّي شي سيء لا تسوّي مثله ، وما فرعون عنا ببعيد ، وأي دكتاتور، هذا الهدّام عليه اللعنة ، الم نتعظ ؟ وين جان وين صار؟ ما اريد اتدخل بالسياسة اكثر خلّونا على فرعون احسن ، لانه الظَلَمَة ما شاء الله تترى ، من غرق وصاح الآن ، يريد التوبة ، انت هم لا يفوتك الآوان وتصيح الآن اريد التوبة ، زين ، البلاء الدنيوي ، نفس البلاء الدنيوي ، منْ صبر وظفر ، زين ، من يصبرعلى البلاء يكون البلاء له بمثابة أمر بالمعروف ونهي عن المنكر.
ما سامع " لك الحمد مهما استطال العذاب ومهما استبد الالم " شوف يريد بعد يستبد بيه الالم ، فلو صبرتَ على البلاء يكون ناهي لك عن المنكر وآمر لك بالمعروف .
هذه التي ذكرها السيد الوالد في بعض كتبه ، اضيف اليها :
- الشيخ في علم الباطن الذي يتخذه السالك شيخاً له ، الشيخ ايضا بالنسبة للسالك شنو؟ آمر بالمعروف وناهي عن المنكر ، علم الباطن نفسه والعرفان هم نفسه آمر بالمعروف لك وناهيك عن المنكر ، فلا يجون يكلولك احنه اهل الباطن وهو يفعل المنكرات ويترك الواجبات ، جذاب بنص عينه . بعد
- الوحي ، الي هو السيد الوالد يعبّر عنه بجبرائيل ، أنا اعممه ، لا غير وحي ، الي هو الالهام والكشف ايضا ، كله شنو؟ آمر بالمعروف وناهي عن المنكر

والحمد لله رب العالمين








 

 

 

 

 

 

 

 

توقيع »

التعديل الأخير تم بواسطة خادم البضعة ; 24-04-2018 الساعة 04:57 PM
خادم البضعة غير متواجد حالياً   رد مع اقتباس
قديم 22-04-2018, 05:11 PM   #2

 
الصورة الرمزية الاستاذ

الملف الشخصي
رقــم العضويـــة : 12
تـاريخ التسجيـل : Oct 2010
العــــــــمـــــــــر :
الـــــدولـــــــــــة : العراق
االمشاركات : 13,247

افتراضي رد: النص الكامل لمحاضرة القائد السيد مقتدى محمد الصدر اعزه الله حول ركائز الأمر بالمعروف والنهي عن المنكر 19 / 4 / 2018

أحسنتم وجزاكم الله تعالى خيرا على النشر

 

 

 

 

 

 

 

 

توقيع »
اللهم صلّ على محمد وآل محمد وعجّل فرجهم والعن عدوهم
الاستاذ غير متواجد حالياً   رد مع اقتباس
قديم 08-05-2018, 11:32 PM   #3

 
الصورة الرمزية الاقل

الملف الشخصي
رقــم العضويـــة : 211
تـاريخ التسجيـل : Apr 2011
العــــــــمـــــــــر :
الـــــدولـــــــــــة : العراق
االمشاركات : 12,641

افتراضي رد: النص الكامل لمحاضرة القائد السيد مقتدى محمد الصدر اعزه الله حول ركائز الأمر بالمعروف والنهي عن المنكر 19 / 4 / 2018

بارك الله فيكم

 

 

 

 

 

 

 

 

توقيع »
الاقل غير متواجد حالياً   رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة



All times are GMT +3. The time now is 04:14 AM.


Powered by vBulletin 3.8.7 © 2000 - 2024