نص كلمة السيد القائد مقتدى الصدر (اعزه الله) خلال لقائه بأئمة الجمع بتاريخ21-12-2015

أعوذ بالله من الشيطان اللعين الرجيم
توكلت على الله رب العالمين وصلى الله على خير خلقه محمد وآله أجمعين
بسم الله الرحمن الرحيم
في البدء أشكر مجيئكم وتلبيتكم للدعوة التي طالما انتظرتها وتأخرَت ، فجزاكم الله خير جزاء المحسنين ، فكل واحد منكم داعية الى الله وكل دعاة الله ان شاء الله يتقبل عملهم ويجزيهم خير الجزاء ، فهذا المجتمع بحاجة كبيرة وماسّة الى مثل أمثالكم الخيرين الطيبين .
لي عدة نقاط أطرحها على مسامعكم لو سمحتم
المسألة الأولى : قبل جمعة أو جمعتين إنبريت لصلاة الجمعة بنفسي ،ولعلكم تعلمون ذلك ، مرات آني الظرف مايسمح لي فما أروح ، ومرات الظرف يسمح لي فأكون في خدمتكم في صلاة الجمعة كإمام ، لكن كان الملحوظ جداً وبعد نهاية الخطبة إن الخطبتين كانت نسبة خمسة وتسعين بالمية دينية ، لكن مقدمة صلاة الجمعة أو( قبل البدء) مثل ما أسميهه وكلكم تدرون كانت شوية سياسية ولعله آنه كتبتهه بالوقت الضايع أصلا ما كانت من ضمن الخطبة ولا من ضمن أولوياتي ، فالمجتمع شسوه ؟ شال الخطبتين ذبهن بالزبالة وركّز بس على المقدمة السياسية تركيا وما تركيا وما أعرف شنو ، فَعلَيه المجتمع ميّال الى السياسة ميّال الى الأمور السياسية ويبتعد شيئا فشيئا عن الأمور الدينية ، فهذه الأسباب مو وقت طرحها ، في مورد آخر ان شاء الله نطرحها ، لكن ملخص الحجي أنه التقصير من الطرفين ، من المجتمع ومن الحوزة العلمية ، لكن مو العيب أن يكون المجتمع مقصر، هذا ما تعودنا عليه الآف السنين مع الأنبياء والأولياء والأوصياء وما شابه ذلك لكن العيب أن الأولياء والأوصياء يكونون مقصرين حبيبي ، أن الحوزة العلمية تكون مقصرة ، حوزة رسول الله الناطقة التي يقول السيد الوالد : ان رسول الله منها تكون مقصرة أمام مجتمعها وهدايته هذا هو العيب وهذه هي الكارثة والطامة العظمى ، وخوفي أنه ليس المجتمع فقط هو من ينجر الى السياسة ويحب السياسة ويبتعد عن الدين ، خاف إحنه هم راح ننجر الى السياسة ونعوف الدين وإذا فَسُد العالِم فسد العالَم ، فعَليه يجب أن تنتبهوا وأن ترتبوا وضعكم وأن تقووا شوكتكم ، وأن تقووا وحدتكم ، آني أتصور إنتو الله العالم ما أعرف ما متابع كلش بالضبط بس لعله يجوز شهر على شهر محد يشوف واحد اللآخ مثل هسه آنه مدري إنتبهت هم فد شي عجيب وآني جاي أصلي قسم منكم يصلي قصر، أنتم طلبة والنجف المفروض يكون موطنكم ، مو صحيح ، الحوزة العلمية والنجف الأشرف وإن كنتم أئمة جمعة أنتم طلبة حوزة علمية يجب انه يكون بقائكم هنا حبيبي ، محافظاتكم بحاجة الكم ضروري وهذا سنناقشه أيضا بأنه يجب أن يعطي قسطا لدراسته وقسطا لمجتمعه وإلا يروح للمجتمع وهو( مطفّي ) اذا ميروح أحسن ( كول لا) خلي يدرس خلي يغذي نفسه بالعلم بالثقافة هسه مو شرط فقه وأصول، خل يدرس أي نحو من العلوم المفيدة الى مجتمعه ويتوكل بالله ويركب سيارته ويروح لمجتمعه ، أما انه شهر على شهر ما شايف الحوزة وما شايف الكتاب وما شايف المناهج التدريسية فهذا عيب أمام الله سبحانه وتعالى إدرسوا حبيبي الدرس ضروري أكثر من الجمعة ، وحدة من مشاكل المجتمع اللي ماردت اكولهه اللي بعدتهم عن الدين هيه هاي أنه يكلك هذا لا دارس ولا يدرس ولا كذا وكاعد يخطب فوك راسنه شكو نكعد جوه منبره ، وحقهم حبيبي آني ما أكول الجميع ، بس آني جاي أحجي على نحو الإجمال ، فيكم العالم وفيكم المثقف وفيكم اللي يعرف شيسوي إن جاز التعبير وشيريد المجتمع من ناحيه دراسته بالحوزة كون ما تمنعه عن علمه بمجتمعه وما يريد هم مو يطب لمجتمعه بالمحافظة الفلانية بالعمارة بالبصرة بديالى بأي مكان يصعد على المنبر ويكوم يخطب له خطبه والناس أصلا مو يم هذه الخطبة باعتبار لايعرف مشاكلهم وهموهم وحاجياتهم يجب أن يتعايش مع المجتمع أكثر حتى يعرف معاناتهم - زين - ولذلك أكرر: المجتمع يجب أن لايبتعد عن الدين وينغمس بالسياسة وهذا شلون بأننا نحن كأئمة جمعة لا نبتعد عن الدين وننغمس بالسياسة وإذا صلح العالِم صلحَ العالَم وعليه يجب أن تتوفر بعض الشروط بإمام الجماعة إذا توفرت هذه الشروط صار هذا إمام الجماعة صالحاً لمكانه ومكانته إنتو لتستهينون بانفسكم حبيبي إمام الجمعة صوت ،منبر ، داعية الى الله ، يجب ان يكون شي مهم ، هذه إيران روح راجعهه ، كل امام جمعة عنده مكتب ويزوروه ويكعدون ويقدموله النذور ويقدموله الإحترام والطاعة ، لتستصغرون من أنفسكم لا تطلبوا الدنيا، مو أنه تروحون تكعدون بالمكاتب وعلى كرسي هذا هم خطأ ، بس يعني يجب أن تعرفوا قيمة أنفسكم ، يجب أن تعرفوا مدى حاجة المجتمع إليكم ، إنته أب والمجتمع أبن ، مرّات الأب يربي أولادة بالخطأ شيطلعون أولاده مخطئون (هسه منزيّد على هذا ) يطلعون بالخط المو صحيح بالطريق الغير مستقيم ، بس إذا الأب كان تربيته تربية صالحة ، المجتمع أيضاً يطلع شنو؟ تربية صالحة وعلى الخط المستقيم .وعليه يجب أن يكون إمام الجمعة مو كأي فرد عادي لا مو مجرد عنده ثقافة عادية أو دين عادي أو يصلي ويصوم وهاي هيه ، يجب أن يكون ورعا ، يتورع عن محارم الله في السر والعلن ، أكو الكثير ليس هنا فقط وفي أي مكان وأعذروني على الصراحة خالّه عمامة على راسه ، ويمشي بالشارع ، وسبحته بيده ومدنك أربعة وعشرين ساعة ويبسبس ، بس هو في السر لا يتقي الله ولا يتورع عن محارمه ، هذا شتسميه أقل ما تسميه منافق (كول لا) منافق مو أمامي وأمامك ، لا أمام الله وكأن الله لا يعلم ولا يرى بل يعلم ويرى فيعرفك أنته بالسر شنو، بالعلن شنو،الورع مهم التقوى مهمه ، ان تتقي الله في السر والعلن ايضا ، وان تكون مخلصا لدينك ومتيقناً به لا مشككا به خصوصا هالايام وانا اكرر اعتذاري للصراحة التيارات الالحادية والعلمانية شوية متفشية - هم - كول لا - ياليتها ان تكون متفشية في المستويات المتدنية بل هي متفشية بالمستويات العالية لعله وصلت الى الحوزة العلمية ونحن لا ندري.لا نحن ندري فيقينك بدينك وبربك والاحكام الشرعية والفقهية كلها يجب ان تلتزم بها رضيت بذلك ام لم ترضى ، اذا رضيت اهلا وسهلا بيك واذا ما رضيت دير وجهك والله ومحمد وعلي وياك والالحادية هم وياك ماشي روح ما محتاجينك نحن بحاجة الى ان نرجع المجتمع الى الله لا ان نرجعه الى الغرب والعلمانية والالحادية هذه الافكار اذا كانت موجودة بكلبك فحطهه بجيبك ولتطلعه حطهه بكلبك ولتطلعه محد يريده يجب ان يكون امام الجمعة بدرجة علمية معتد بها ولا اعني بدرجة علمية معتد بها في الحوزة فقط (بالعلوم الحوزوية فقط) بل هناك علوم كثيرة يجب ان يطلع عليها امام الجمعة ، صلاة الجمعة مكونة من خطبتين والخطبتين يجب ان تكون ذات ميزان ثقيل علميا مو يجيني امام جمعة يحجيلي اشياء تافهة ويدير وجهه ويروح وبالتالي شنو يصير تسقط قيمته امام المجتمع بالتالي هو شنو ممثل عن الحوزة العلمية تسقط قيمة الحوزة العلمية امامهم لا حبيبي انت تمثل جهة وعنوان عام يجب ان تكون كامل ومتكامل من جميع النواحي الايمانية والعلمية ، الاطلاع العام والشامل على حاجيات المجتمع كل بحسب مكانه نحن لا نتكلم عن المحافظات فقط الاقضية والنواحي كله يجب ان تعيش معاناتها حتى من تصعد وتخطب تعرف شتخطب تعرف شتحجي - زين - ولذلك يجب ان تكونوا متعايشين مع ناسكم اذا متتعايشون مع ناسكم ممكن ان يوصلولكم اخبار حتى تعرفون شتحجون هذا امر كلش.. كلش ضروري – زين- سمعة إمام الجمعة فوق كل ذلك وأهم من كل ذلك اذا سمعته في المجتمع طيبة فراح يكون مفيد لمجتمعه ، انت مجرب بالحوزة العلمية من تُكعد يم استاذ وانت مامقتنع بيه مراح تفهم منه شي أصلاً بس من تكعد وانت مقتنع بذاك الاستاذ راح شنو تتلقى منه بكل رحابة صدر ، فالمجتمع اذا كان انت سمعتك امامه طيبة راح يتقبل منك اللي ( تكوله ) ، سمعتك مو طيبة ماراح يتقبل اللي ( تكوله ) ولذلك اني السيد الوالد ( قدس الله نفسه الزكية ) كبل شيسوي من كان يريد ينصب إمام جمعة ينتظر وفود واعداد كبيرة من المجتمع تطلب هذا الشخص او ذاك الشخص ليش حتى يكون مرضي في مجتمعه مو يجي المجتمع ما يعرفه ولا شايفه ، ولأول مرة بعمره يطب عليهم ، كون يخطب وكون شنو كون يطيعوا وكون يسمعوا وكون يهتدون - لا - هاي كلهه بالاحلام ، ما راح تصير أصلاً .
شرط اخر من الشروط وهذا شرط متخصصٌ بكم ، حُب مُحيِّ الجمعات ، حب الشهيد الصدر الذي احيا الجمعات والشهيدين الصدرين ان لم نقل ال الصدر عموماً وانا اعددت نقطة ولكن مستعجل أريد أكولهه بسرعة قال – شكال- شهيد الجمعة (ان في ذكري منفعة )، ان في ذكره منفعة ، ان في ذكره منفعة - كول لا - تصعد تخطب اسبوع على اسبوع ويوم على يوم وساعة على ساعة وماتذكره أكول امر لاشراف الجمعة شيله وذبه بالزبالة هذا الامام الجمعة حاشا اللي يذكروه - زين - ماأحيا الجمعات الا هو - زين - واحنة ننساه ونخطب ساعة ونص نبقه براس الفُقرة ومانذكر محمد الصدر لا خلف الله على هيج إمام جمعة - زين - وعلى اشراف الجمعة يعزلوه بأسرع وقت ، ان في ذكره منفعة فاذكروه يرحمكم الله .
الامر الاخر برأيي والله العالم هل هو صحيح او خطأ مااعرف ان الجمعة ، ان صلاة الجمعة تنحرف شيئاً فشيئاً عن خطها الذي اسس لها ، وحدة من الامور انه جاي تتحول الى سياسية فالجمعة خُطت لهداية المجتمع ، من اول أهدافها هي هداية المجتمع ، والمجتمع شبي حبيبي هسه.... مهتدي ؟؟- لا - مُبتعد عن الله سبحانه وتعالى ، هذي اول ذنوب المجتمع ويتعلق بالعبيد أكثر مما يتعلق بالله سبحانه وتعالى ، اول ماتصيبه مشكلة إلمن يتنخه ، للسياسيين ، للقيادات ، يامقتدى تعال طلعني ، ذِكِر الله ، ذِكِر رسول الله بكعدته بصلاته بصومه بحجه ولا كأنما أكو فد شي يم الله ، رأساً يجي الى الاسباب ويترك مسبب الاسباب وهذه كارثة واذا نسِينا الله سوف ، أحسنت نسانا ، ينسانه الله سبحانه وتعالى وبالتالي شنو ينسلب التوفيق منا واذا انسلب التوفيق منا اقرأ الفاتحة على انفسنا ، ابتعد المجتمع احنه نطلب هداية المجتمع كأئمة جمعة والمجتمع ابتعد عن الله والمجتمع ابتعد عن الحوزة العلمية هم تشوف أكو مراجعين بالله بمكاتبكم وبهيئاتكم وحوزاتكم وكذا ، بعد ما كان مكتب السيد الشهيد يروج بالناس طلعه وطبه ومراجعين ولو للتبرك مو إلَّة يطلب مال او حاجة او فد شي من هذا القبيل، مكاتبكم فارغة ، صلوات الجمعة ايضاً راح تكون بالتالي ايضا شنو قليلة وفارغة والمأمومين قليلين وشيئاً فشيئاً الى ان تندثر الجمعة ، فالمجتمع ابتعد عن الله وابتعد عن الحوزة وانغمس بالملذات وسوف لن يذكر الحوزة ولا المكاتب ولا صلوات الجمعة ولا أي شيء ديني ، ونرى ان هناك كثير من الافكار المنحرفة في المجتمع هم إنبرى واحد منكم في خطبة او في كتاب او اي شيء للرد على هذه الشبهات وهذه الافكار المنحرفة ، يومية طالعتنه فكرة جديدة إلحادية وعلمانية واصحاب قضية -ووو- سطرهن وحدة ورة اللُخ ، يجب ان تقفوا امام هذه التيارات المنحرفة انتم منبرهداية واذا ماانهده المجتمع كولوا اذن احنه ما مهديين ، يجب ان تهدوا انفسكم قبل ذلك ، فصلاة الجمعة يجب ان تكون مقدمة لهداية المجتمع .
ثانياً/ لصلاح المجتمع والمجتمع الان في بحبوحة من الفساد هم كول لا مو فقط السياسيين ترى هواي ناس تلهث خلف الدنيا ومغرياتها وين راتبي وين مكاني الحكومي وين مدري كذا ولكن ما اتشوفلك واحد يجي يسال الك عن دينك عن هلالك هاي اول الشهر اخير الشهر ماكو أصلاً كلها انعدمت كلها السؤال عن شنو عن الدنيا وعن المناصب وعن الكراسي وشكد حصلنه وشكد الانتخابات وشكد مدري شنو بعضها مهمة ولكنها ليست الاهم ، الاهم هو أنه لا ننسى ذكر الله أذا ما أنسينه ذكره سوف يذكرنا واذا ذكرناه سوف نفلح والا لن نفلح زين والمجتمع غارق بالفساد الاخلاقي والمالي والسياسي وداشوفه انا حبيبي حملة الاصلاح جاي تكشف هواي ناس هواي ناس داتنكشف كلها ليش لمغريات الدنيا بس يحب المال هذا ماعنده شيء هو بس يحب المال يبيع نفسه يبيع دنياته و عائلته ومجتمعه وسمعته وعنوانه كلها من اجل كم فلس هاي كلشي لااكثر ولااقل وبعدين وين مايحصله غير متر بالكاع يندفن بيه اوفي مالله ولاياخذ فلوسه ولاياخذ ماله ولاياخذ عائلته ولاكلشي من ضمن الامور التي يجب ان تكون صلاة الجمعة مقدمة له هو طاعة الله وهذا ايضاً مندثر المجتمع في معاصي كبيرة وكثيرة وانتم تعلمون المفروض اكثر مني فيهم الخيرين فيهم اصحاب الافكار الحسنة والمنطقية احنه مانغبط اهل الذين متمسكين بدينهم لكن وصل الامر ان يكون الماسك على دينه كالماسك على جمرة من النار فعليه يجب ان نميز بين المخلص وما بين غير المخلص مابين المتدين وما بين غير المتدين والفاسق واللاهث خلف الدنيا ويجب ان تكون صلواتنا صلوات الجمعة مقدمة لهداية المجتمع و الى الرجوع الى الله وطاعته لااريد ان اطيل عليكم فالكلام كثير والعتب كثير والمجتمع بحاجة الى الكثير لكن نهاية المطاف قد اضع بين ايديكم بعض الاطروحات حتى تلقوها في صلاة الجمعة في خطبتكم في خطبتكم الاسبوعية التي يجب ان تنفع المجتمع بعض الاطروحات من شأنها تطوير الخطبة وهذه كخطوة اولى لان هذا لايكون ان شاء الله اذا بقيت في الحياة لايكون اللقاء الاخير تتكرر اللقاءات بيننا لايجب ان يكون هناك ابتعاد مابين المركز وائمة الجمعة مابين القيادة وائمة الجمعة ارجعوا الى مكاتبكم ارجعوا الى قيادتكم حبيبي
الاطروحة الاولى / ذكر رسول الله صلى الله عليه واله وسلم في كل بداية خطبة ذكراً مخصوصاً غير ماتقومون به من ذكر الائمة عليهم السلام واضح اصور حتى لاتكون علينا شنعة وسبة كما قال السيد الوالد سبة كما قال السيد الوالد اذكروا رسول الله اكثروا من ذكره اكو شيء اخر انتوا هم ناسيه بصلوات الجمعة الثالوث المشوؤم المحتل واذنابه جنا يومية انصيح كلا كلا احتلال هسه ماكو مع انه الاحتلال ترى بعده موعبالكم انسحب مو بعده بس هوهو واذنابه جاب جماعته هم يحاربونا والمجتمع هم راح اكوله جنا عبالنا صدام فد شيء كلش وحشي هو وحشي ودكتاتور وظالم بس المجتمع مماتحسن وراء سقوط الهدام عليه اللعنة والعذاب جابله الاشد منا جابله المحتل ادوره هم ماقام بواجبه وخضع للكثير منهم للمحتل اشجابله جابله دواعش اللي تكطعون رؤوس ويذبحون بعد هم ينتظر الله نكون على قدر المسؤولية لو منكون على قدر المسؤولية اذا ماكنا على قدر المسؤولية شيصيراستحقاقنه ماهو اشد من ذلك وانا ابشركم انتظروا اللي اشد من ذلك ،نقض الثالوث المشؤوم في بداية كل خطبة ولو على نحو الهتافات .
اتلاثه/ ذكر سيد الجمعة ومحييها في بداية كل خطبة وذكر بعض المقتطفات من كتبه اواعادة بعض خطبه ففي ذكره منفعة اكرر في ذكره منفعة لامنفعة عامة للمجتمع فقط بل حتى لقلوبكم وعقولكم جان واحد يكول احنة فيشتنا مال الله منو كبل بزمن السيد محمد الصدر الفيشة اذا انشلعت شيصير تشويش احسنت هاي تلفزيون بلا اي شيء بلا اي فائدة فاربطوا الفيشة يظهر بثكم امام الناس بعد تفهمون ماتفهمون مااعرف ما ادري .
ذكر مسألة شرعية في كل بداية خطبة بس مو اي مسألة شرعية طبعاً يجيبها ما كذا وكذا لاكون بيها فائدة ذكر مسألة شرعية في كل بداية خطبة طبقاً لفتاوي فتوى شهيد الجمعة ومحييها مو اجيبلي منا ومنا مراجع واصفطهم على راسي - كول لا- ترى موما اسمع ترى اسمع صرتم دعاة لغير محمد الصدر مسألة ابتدائية اومسألة مهمة ولا اجيبلي مسائل ما تقليد ابتدائي - ما تقليد ابتدائي ابتعد عن الشبهات حبيبي لاتورط مجتمعك كما انت متورط والابتعاد عن المسائل المستحدثة اومسائل التقليد الابتدائي وماشابه ذلك مو اني هاي كلتها مثال متعمد ترى لاتورطون نفسكم امام الله اني ابوي مو ابوكم حبيبي انا من اكول تقليد ابتدائي مو جائز يعني مو جائز ماتتعاطفون وي السيد اكثر مني .
نقطة اخرى ذكر معاناة المستضعفين والمظلومين في بقاع العالم كفلسطين وبورما ودول الربيع العربي وغيرها مما يعزز وحدة الجسد الاسلامي من اكول كرروها ، كرروها في كل جمعة مو تخطبلي خطبة ورة تسع سنين يللا تذكر المستضعفين في كل جمعة سويلك فد قطعة هيجي ولو كلمة ولو كذا هتاف يومية هتاف -لبيك يارسول الله- كلا يااحتلال - دعم لفلسطين- دعم للدول الاخرى المظلومة اخوتنا المسلمين في افريقيا وفي بورما جاي يذبحوهم مثل الخروف يصلخوهم وياكلوهم خاف انتوا ماتدرون يجب ان تذكروهم يجب ان تنصروهم حتى لو لم يكونوا شيعة - كول لا- هية المشكلة تورطنة بتيارات متشددة من الشيعة والسنة كاموا يعكسون امام الاخرين امام المسيح امام اليهود انه المسلمين ارهابيين كاموا يكطعوهم وكاموا ياكلوهم اعكسوا صورة وضاءة عن الاسلام حبيبي
النقطة الأخيرة/ ذكر مختصر لتعزيز الوحدة الاسلامية ونبذ الطائفية مو اربعة وعشرين ساعة مو كل خطبة بيها اشتايم وبيها فلان و فلان ومدري شنو وكذا لا، اذكر مايعزز الوحدة الاسلامية والحمد لله رب العالمين جزاكم الله خير جزاء المحسنين