خواني خلصوا من وكت !

خواني خلصو من وكت . يابوي يا امي اشعجب
لا تطفه نيران الحرب . خلفونه اشويه حطب

ياابوي ياامي اشعجب . اشكال بالدنيه اكو
غير البخور ومي ورد . خواني ماعدهم طلب
ياكاع اخوتي اشقصروا .. ما فاطر وعنهم صمت
ازغار مابيـــــهم ثكل . ضــهرج تعذر من وكت
وحتى اعله ضهرج لو بقوا. انه البقيت اشحصلت
كل شيء بعدهم ما ثبت. يومية للدنية شكل
ويه ضهر ابوي اتغيرت . ونقرضت ايام العدل

وياخير يرجعلج بعد .. يا هور هذا ويا كصب
الصيف يلهب والشته.. ولهسه ما طاح الرطب
وياهو اليفكر بالسلم .. ايهدمون بيته وفكرته
لا تطفه نيران الحرب . والوالي تبرد دلته
والوالي من نوع اليحب .. الضلمة والحجي الهمس

موضدهه بس عنده رأي. مايحب يواجهه اي شمس
ينصحني لا تحلم بعد. اني ادبرلك رغيف

الموت مو يعني السفر . سافر احسلك خفيف
ومن كلشي انه اتنازلت.عن حصتي حتى من الهوى
شو همه الاعزاز ومشوا ..بعيوني شيسوي الضوه

والناوي ما يرجع بعد .. المن وراه يترك اثر
همه اليدفنون اشعجب.. كل مره ينسون الصور.