اجت زينب

بسم الله الرحمن الرحيم اللهم صل على محمد وال محمد وعجل فرجهم والعن عدوهم
اجت زينب دمعها يسيل وتحشم يجافلها
سمعها وكال عد عيناج كولي وامري يكلها


عد عيناج جاها يصيح وعينه من الزعل حمرة
ويوم الشافته بهالحال مختاض وطرد صبره
سبعة انعام كالت له وضمت راسها بصدره
وكالت يبن ابويه القوم وصلونا شبعد شلها


كالت يبن ابويه القوم وصلونا وهذوله القوم
ولا ناصر بقى ويه حسين غيرك وانسى راية تحوم
يالدكيت صدرك كوم حل وكت الزماط اليوم
هذي الراية هذا الجود هذا السيف كوم الها


تكله انهض يليث عداك واشوفن وصلوا حدودك
اعد سبعين الف عالماي واعد جيشين بزنودك
يخويه اوصيك ما تطلب ماي شبحت عينها لجودك
كال الها اجيب الماي واهتز حد مراجلها


مراجلها وبرز عباس طر قلب الصفوف وراح
لاخرها ورجع مختار ارد اسعى لجناح جناح
طشت من رعيد الصوت انه العباس لمن صاح
رد الها قلبها ردها خلى العالي سافلها


كردسها وحدا الحداي واطرب والدروب دفوف
واليوكع سلم وارتاح لون الماوكع مخطوف
رهب سبعين الف هالسيف ما وكفت بوجهه سيوف
يودي اولها لاخرها ويجيب اخرها لاولها


يجيب اخرها لاولها ويهب ردود عاصف ريح
والزلزال جدحت عين وبصوته الرعيد يصيح
بالطف صار ملج الموت وقلوب التشوفه تطيح
حي حزام ظهر حسين من اختار زلزلها


زلزلها ونوى على الكوم يكضيهم بلا ردة
سمع صوته واجاه حسين مسرع من عرف كصده
حط ايده على متنه وصاح خويه وغايته يهضده
يكله بالشهادة نفوز وبصبرك نحصلها


نحصلها وجموع الكوم من كل صوب اجت ليهم
طحنا بسيفه ابو السجاد والعباس يلهيهم
يفرشهم يرد حسين اخيه يكوم يطويهم
كرت عين داحي الباب بشبوله وفعايلها


مابين اليردها حسين والعباس بيها يجول
كالوا نفرد العباس وجموع السرايا تحول
ساعة ولنه يسمع صوت ادركني يخويه يكول
اجاها يصيح يا عباس هسه فرح عاذلها


محني الظهر يم عباس وبحرقة الدمع صبه
مرة يحبه بزنوده مرة بهامته يحبه
جر سهم الذي بعينه مثل ما جر سهم قلبه
لاوين المفر يا كوم صاح ودمعته يهلها