النص المُنَضَّد للقاء سماحة القائد السيد مقتدى الصدر اعزه الله مع ائمة صلاة الجمعة بتاريخ 7 / 7 / 2021

اعوذ بالله من الشيطان اللعين الرجيم، توكلت على الله رب العالمين، وصلى الله على خير خلقه محمد واله اجمعين

بسم الله الرحمن الرحيم

السلام عليكم ورحمة الله وبركاته، ومرحبا بكم واهلا وسهلا، وشكرا لكم على مجيئكم، وتشرفنا بلقائكم، فانتم كما قال شهيدنا الصدر دعاة المجتمع وهداة المجتمع، كأئمة جمعةٍ لهم، وكما قال السيد الوالد قدس سره الشريف الجمعة مؤيدة بتأييد الله، اذا كانت الجمعة مؤيدة بتأييد الله فانتم كلكم مؤيدون بتأييد الله، لانه الجمعة سُقيت بدماءِ شهيدنا واستمرت بجهودكم وخطبكم واخلاصكم، فجزاكم الله خير جزاء المحسنين، فكلُ واحد منكم وتد من اوتاد الهداية وصلاح المجتمع وهداية المجتمع، فلا تستصغرون من انفسكم، وكل واحد منكم بمثابة .. باللغة الدارجة شنسميها؟ فضائية من الفضائيات، فمنبر الجمعة اكبر منبرٍ اعلامي حالي، وكلكم مخلصون لدينكم وعملكم وجمعتكم ومرجعكم، وهذا لا شك فيه على الاطلاق، لو سمحتم لديَّ بعض النقاط اضعها بين ايديكم فأرجو الاصغاء والاستماع.

من الوقائع التي وقعت في حياة السيد الوالد الله يقدس نفسه الزكية وفي صلاة الجمعة بالتحديد مهمتين، جدا مهمة، ولعلها وان كانت قديمة زمنا الا انها تنطبق على حاضرنا هذا ومجتمعنا هذا ونستفيد منه كحلول، لانه هو من گالها قبل سنوات يدري آنا اگلك يدري انه مشكلة متجذرة وليست آنية، ولذلك ركّز عليها في اكثر من مورد، فلا تتصورون ان كلام السيد الوالد يعني اي يوم چم يوم او چم شهر او چم سنة ويگضه، لا ماكو هيج شي، طويل الامد ما شاء الله، ولله الحمد، ولعل فيكم الكثير منْ ومتيقن بهذا الشي.

الامر الاول او الحادثة الاولى، هي المطالبة بارجاع الكهرباء في عموم العراق، شمعنى ما طالب بشيء اخر بالله؟ لانه مشكلة الكهرباء متجذرة، گول لا، منذ ذاك الزمن والى هذه اللحظة، فعليه انتم من السائرين على نهجه، انتم مستمرين على جمعته، استمروا على صلاة الجمعة ولو مات محمد الصدر، واقولها استمروا على صلاة الجمعة ولو مات مقتدى الصدر، صلاة الجمعة ما تنگطع، من ثوابتنا ولا يمكن الحياد عنها، فهي ارتوت بدماء شهيدنا، فابقوا مخلصين لشهيدنا ولجمعته.

عموماً، المطالبة بالكهرباء، ولازالت مشكلة الكهرباء موجودة وفعلية وضخمة والمجتمع متفاعل معها، فيجب ان تتفاعلوا معها بقدر المستطاع، واضح؟

هذا يعني واني سأكولها بعدين في نقاط اخرى، على امام الجمعة ان يندمج مع مشاكل المجتمع، بالله اكبر مشكلة في المجتمع حاليا شني هي؟ من اكبرها هسة اذا مو اكبرها، الكهرباء، وعدكم اسلوب مشى عليه السيد الوالد انتو هم امشوا عليه، حتى لو نفس كلامه استقطعه وعيده في كل جمعه، وهكذا، او انت من نفسك شوف المجتمع شيريد شوف شلون كيفية المطالبة، ايضا انتم مخولون بذلك، بحدود الشرع والاخلاق طبعا، بدون تعدي.

الدعوة الثانية، ولذلك اهنانه ايضا من اجتماعكم هذا، ووجودكم المبارك هذا، ايضا احنا ندعو الى ارجاع الكهرباء في عموم العراق. زين، اكو مطالبة ثانية ايضا صدرت من السيد الوالد شني هي؟دعوة الموظفين الى التوبة. شوفها، هاي هم مشكلة ثانية متجذرة، لعلي انا او انتم او الكثير من الناس كان يتصور انه اذا راح صدام وأجو موظفين ورى السقوط راح يصيرون ملائكة، مو هيجي جان عدنه تصور ولو خل انكول تصور ساذج، بسيط، اولي، شتسميه سميه، لا حبيبي، كانوا في زمن الطاغية فاسدين والان ايضا شنو؟ هم فاسدون، فعليه ايضا يجب عليكم المطالبة بطرق شرعية واخلاقية مطالبة الموظفين بالتوبة، نحن ملزمون بثابت وهو الاصلاح، الإصلاح مو مقتدى الصدر جابه، سيد الاصلاح، سيد اصلاح زمانه منو؟ هم مو مقتدى حبيبي، محمد الصدر، وانا وانتم نسير على نهجه، فعليه اذا كنتم مخلصون له ولي عليكم الاستمرار بالإصلاح، من ضمنها مطالبة الموظفين في الدولة ايا كان بصغيره وكبيره بالإصلاح والتوبة والرجوع الى الله سبحانه وتعالى، ولا اقل بانه يعتنون بشعبهم، راجعوه، انا راجعت الكلام بس ما ردت انقله كلام السيد الوالد، اريدكم انتم تراجعوه، راجعوه اقروه كما هو، وفي كل جمعة وطبّوا بعيونهم، بس بطريقة اخلاقية وشرعية كاملة بدون تعدي، انت امام جمعة وعلى راسك عمامة يجب ان انت تبقى محترم وصلاة الجمعة ومنبرها ايضا يجب ان يكون محترمون.

فالمطالبة بالكهرباء اولا، ولذلك في مجلسكم هذا المبارك ايضا نطالب كل موظفي الدولة شلع قلع بالتوبة وبالاصلاح .زين.

نقطة ثانية ، امر آخر ، الدنيا اختلفت كلش، هوايَ موازين انكلبت، هوايَ موازين اختلفت، هوايَ اشياء حلوة جانت لعله شيئا فشيء صارت سيئة، ما راح اكول سيئة راح اكول صارت فارغة من المحتوى، لا اثر لها، لا فائدة فيها، بل قد يكون وجودها اسوأ من عدم وجودها، وعدم وجودها احسن من وجودها.

انمثّل فد امور، مثلا من الامور اللي اتغيرت، هسه اذا آني اكلكم عبارة: التواصل الاجتماعي، شيجي ابالكم؟ فيس بوك، تويتر، مو هيجي؟ هاي الامور الاخرى وغيرها من التواصل الاجتماعي، واتس آب. التواصل الاجتماعي جان هيجي كبل بس اتكله جمعة مباركة لصديقك ولاخوك ولعائلتك ولامك ولابوك، او مثلا اتكله سلام وهاي هيَ وشلونك، او تدزله فد وجه او صورة، لو تروحله تتعناله من محافظة لمحافظة ومن بلد الى بلد وتكعد وياه وتداريه وتسلم عليه، هذي التواصل الاجتماعي الحقيقي الفعلي، منين اتحول؟ من شيء راقي الى شيء عادي، التواصل الاجتماعي هي شنو؟ السوشل ميديا صارت وخلص في امان الله في امان الله ، هذا مو صحيح ترى، يجب ان يكون التواصل الاجتماعي وخصوصا منكم يا ائمة الجمعة، فعلي وحقيقي، طبعا هسه يجوز اكو مثلا احنا في حالة وباء وجائحة، هذا فد شي ثانوي، بس بطريقة واخرى يجب ان تتواصلوا مع المجتمع، مو فقط بس ms هايهيه وفقط، لا، تواصل فعلي وحقيقي مع المجتمع.

مثلا، مثال اخر، وهو ايضا يُربط بصلاة الجمعة، الإعلام في العراق، فد شي ايضا صار خالي المحتوى، خالي الثمرة، ما بي نتيجة، لانه اكثره شنو؟ يجانب الصواب او كذب او ليس من الواقع، ليش انروح بعيد، هاي مثلا التمثيليات والمسلسلات العراقية، بغض النظر عن المحرمات الشرعية وغير الشرعية، شنو بيها؟ بالله بيها من الواقع شيء، اذا اكو فد.. مراح ابالغ فد 10 – 15 %، والا لا تحل مشاكل، لا تطرح مشاكل، لا تصوّر صورة رمزية عن المجتمع العراقي، وما شابه ذلك، ابدا، فعليه يجب ان لا تكون، يجب، وجوب شرعي هذا، مو فتوى مني، وانما قاعدة عامة شرعية فقهية، لا يجب ان تكون صلاة الجمعة خالية المحتوى، مو اكو... ترى اكو بينا شنو؟ كوة يحضر، كإمام او كمأموم، او يحضر للشهرة والمال، او يحضر لاقل تقدير إسقاط الواجب، صاير ماكو تفاعل بين الإمام والمأموم، يحضر جفيان شر، وهكذا، لا، يجب ان تُنشّط صلاة الجمعة، يجب ان تكون ملئى بالخير والهداية والصلاح، لا يجب ان تكون خالية المحتوى، انتم كلكم علماء ومتفقهين وعدكم كتب وعدكم مكتبة وعدكم ارث، طوروا انفسكم، وكاملوا انفسكم، شوفوا مجتمعكم شيحتاج، اطرحوه في خطبة الجمعة، حتى انت تستفيد امام الله ومجتمعك ايضا يستفيد منك، لذلك عليكم الاندماج وي المجتمع، الشعور بمشاكلهم وإحتياجاتهم والتقرّب منهم بصورة او اخرى.

نقطة اخرى مهمة، انا اتصور ان هناك ميزات كثيرة لصلاة الجمعة، بس اريد اسلّط الضوء على ميزتين مهمتين لصلاة الجمعة:

اولا: صلاة الجمعة طاعة لله سبحانه وتعالى، كول لا، ويجب ان تبقى طاعة لله سبحانه وتعالى، ولا يجب ان تتحول الى امرٍ دنيوي، او فيه معصية لله سبحانه وتعالى، اُسست بدماء شهيدنا لتكون طاعة لله سبحانه وتعالى، ويجب علينا ان نُبقيها كذلك، طاعة لله سبحانه وتعالى، فحينما يصعد إمام الجمعة يجب ان يطرح ما فيه طاعة لله سبحانه وتعالى، وليس معصية، والعياذ بالله.

مثلا، الشتائم وكثرة التعدي على الاخرين، مثلا التنافس الغير مشروع مع قرنائه وائمة الجمعة وما شاكل ذلك، والتسقيط بينهم، هذا كلها شيحولها؟ من طاعة الى معصية، كول لا، مثلا اكو بعض الامور الاخرى، يصعد على المنبر وتنبؤات يطي، راح يصير فلان شي وراح يصير فلان شي، هذا أصلاً حرام، حرام صريحاً يعني، لانه كذب المنجمون، مهما تقول ومهما تتنبأ، حتى وإن كان صحيحاً، فمثل هذه الامور اذا طُرحت في منبر الجمعة ستُصغّر من شأن الجمعة وستُنفّر الناس وستحوّل الجمعة من طاعة الى معصية.

او يصعد على الجمعة، على منبر الجمعة، وكوم شنو؟ شفت بالحلم هيج وشفت بالطيف هيج، حتى الخزعبلات، لا حجية للطيف، شنو انت نبي مثلا، معصوم، إمام، رسول، وشّفت بالطيف؟! وشنو يعني، لا حجية فيه نهائياً، لا تتعلمون من فلان وفلان، ما الكم علاقة، احلام واطياف وما ادري شنو، اكو هوايَ كتب، اكو علماء، اكو فقهاء، اكو انواع الكتب اللي تستخلص منها مصادرك وخطبك، عوف هذه الأمور، هاي الترهات والتفاهات، اسف اتركها، وأكثر شيء اضوج منه بعد من هذه، يجي يصعد على منبر الجمعة وكال شهيدنا هيݘ ونقل فلان هيݘ وهي كلها ݘذب، واضح؟ وحتى عن العائلة ينقل اشياء وعن الشهيد وعن الكذا، كلها اشوفها بعض المقاطع ترى ، ترى ما عبالكم ما اتابع مثلاً، اذا ما شايفيني صار لكم ݘم سنة مو معناته ما اتابعكم، واحد واحد اتابعكم، ما لك علاقة، اذا ماكو سند صحيح عن شهيدنا الصدر حرام عليكم تنقلون شيء، مو اي واحد يجي ينقل لكم من الشارع وتصدكوه، ماكو هيݘ شي، يجب ان تكون هذه القصة، هسه ما راح اكول الرواية او الحديث، هذه القصة مروية بسند، اذا اكو سند الها صحيح انقلها، ماكو لا تنقلها، فهذه الأمور تجنبوها رجاءً، لأجلكم اولاً ولأجل شهيدنا ثانياً ولأجل مجتمعنا ثالثاً، هاي المجتمع ما راح يستفيد منها، شنو تصعدله حلم لو قصة مو صحيحة لو فد شي، اندمج وي المجتمع تعرف شيريد، وإلا يصعد مثلاً مشكلة المحافظة الفلانية هي مثلاً مشكلة معينة في قضاء معين كذا وانت تحݘيله بالفقهيات، احݘي فقهيات بس لا تتخلى عن مشاكل المجتمع، مشاكل المجتمع الآن لعله اهم، حاول تلم بيها حتى تعرف اشلون تطرحها وتعرف شلون تحلها بصورة او بأخرى.

إمام الجمعة لا يجب ان يكون فقط لمنبر الجمعة، منبر الجمعة إلمن؟ للمجتمع، للناس، للفقراء، للمؤمنين، للضالين، للفاسقين، للفاسدين حتى تهديهم، مو فقط اتطبلك ساعتين بمحافظتك وبعدين تنزل تركب سيارتك وترجع لأهلك، مو صحيح، كون يشوفوك كون يكعدون وياك كون يعرفون منو انت كون تعرف منو همه. نقطة اخرى مهمة : احنا مقبلين على خطرين: خطر بالمعنى الحقيقي، لا بل لسنا نحن، المجتمع، الدين، العقيدة، المذهب، واحنا بعضنا خالي الراس على المخدة وما يفكر بمشاكل المجتمع، (من لم يهتم بأمور المسلمين فليس منهم)، وهذا مو بس واجبكم، اصلاً الكلام هذا عام وراح اكوله: مقبلين على فقرتين خطرة جداً جداً، تمس بالإسلام نفسه، بالعراق، بالوطن، بالجمعة، بالنهج اللي احنا رافعيه، بالعقيدة، بالمذهب، شنو هنَّ؟

اولاً: شبيها اسرائيل؟ التطـ .بيع مع اسرائيل، اذا ما ننشط احنا خل اكلك فد شي، هيجي كلش، يعني باللغة الدارجة، غير الصدريين ما يوكفون ضد التطـ .بيع ترى، لأنه يجوز يوصل فد يوم من الايام الوقوف وقوف مسلح، اكلك هيݘي علناً، هسه يجوز الآن لا، يجوز الآن بالتثقيف بالمنبر بالخطب بالتويتر بالفيس بوك ميخالف، بالمظاهرات بالاحتجاجات بالاعتصامات ميخالف، بس ترى اكو إلحاح شديد على ان يكون العراق من ضمن المطـ .بعين، وهذا تحذير مني، حتى السفير موجود عليه اللعنة، كلها محضريها بس يريدوكم انتو تختلفون فيما بينكم تتفرقون، حتى هذا المعارض الوحيد والمقاوم الوحيد والشجاع الوحيد يتفرق، فاذا تفرقتم وتشتتتم واختلفتم صار التطـ .بيع شنو؟ أمر سهل ويسير عندهم، فالرجاء اكيداً وتكليفكم الشرعي أمام الله، اكررها تكليفكم الشرعي أمام الله انه تتوحدون وتنتبهون الى الخطر المستقبلي اللي هو التطـ .بيع مع اسر*ائيل ممنوع وحرام الى يوم الدين، ولا مجال لغير ذلك، بل يجب ان نرخص نفوسنا واموالنا من أجل ذلك، مو بهالمرحلة يجوز نوصل الى مرحلة لا سمح الله، فاذا ما نريد نوصل لهذه المرحلة المسلحة يجب أنه نثقف أنفسنا، نوحد صفوفنا، جمعتنا، غير جمعتنا، أفرادنا، كل منتمين التيار، كل هيئاته كل فروعه كل مكاتبه كل مؤسساته، سياسيين، مرشحين، وإن كان أنا ما ردت أكول هيجي شي بس مضطر الى ان أكول شي، لأنه الخطر كلش محدق، بعدين إذا قصرنا مو تكولون مقتدى قصر، الأيد الوحدة ما تصفق جيبولي أيد وحدة ثانية حتى أصفق، حتى أنتج، فأحذركم شديد التحذير من التطـ .بيع، أوقفوا وقفة شجاع موحدة، حتى أولاً لا نوصل للقتال، ثانياً حتى نمنع التطـ .بيع مع إسر*ائيل بأي صورة من الصور، وأنتم ملزمون بذلك، وأي واحد يُقصر سأعاقبه، سأعاقبه، مو بعدين تجيه الكصكوصة يزعل، لأنه هذا تكليف شرعي بعد ما بيه كاف لام، قرار هذا، انتهى.

الأمر الثاني شنو هو؟ الفساد، مو أنت تتصور هسه تكلي الفساد صارله من السقوط لِهسه، ما قبل السقوط لِهسه، فشنو استجد؟ لا مو بس فساد السياسيين، حتى فساد الشعب، حتى الفساد العقائدي، حتى الفساد الإلحادي، حتى الفساد المنتشر في كل شبر من أرض الوطن، أنتم تكليفكم الشرعي انه تحيّدون منه بالتثقيف، قبل شجان يسوون، ربعنا منهم، شيله وضربه شيله وزينله، هذه السوالف شسوت؟ زيدت الفساد حبيبي، ينفر المجتمع من هيج أمور، لا تكررون هيج مأساة مهما كانت، فالأسلوب الحلو يكسب، الأسلوب العنيف يُنفر الآخرين ويُزيد من الضلال ويُقلل من الهداية، هم كول لا! فإذن هناك فساد، فساد حكومي موجود، فساد سياسي موجود، فساد في داخل التيار وخارج التيار موجود، في عموم العراق موجود، فساد أخلاقي أيضاً كون ننظرله، الفساد الديني أيضاً والعقيدي والأفكار المنحرفة والمغالاة والمدري كذا، أشياء كثيرة في المجتمع تنتشر كون تتنبهولها كون تقرون شلون تردوها، كون تعرفون شلون تردوها، طبعاً هم جان السيد الوالد أيضاً يركز، ما أدري كايلها لأئمة الجمعة آني سامعها من خارج جلسة أئمة الجمعة، انه مو تطرح الشبهة في خطبة الجمعة وبعدين ما تردها، هاي تلوصها ترى، أو تردها بصورة غير صحيحة، هاي بعد طامة كبرى تصير، كون دقيق كون بمنهج علمي، بمنهج مرتب منظم، بحيث الآخر يقتنع، شو تعرف شنو الأساليب التي تقنع الشباب في عصرنا هذا وفي مجتمعنا هذا، وإلا إذا طرحناها بصورة خاطئة ستكون مسبب لزيادة الضلالة، فالحذر الحذر من هذا الأمر.

فأكرر نحن مقبلون على خطرين، الفساد بصورة عامة، ولا أقصد الفساد فقط الحكومي والسياسي، فكيفما تكونوا يولّى عليكم حبيبي، لو ما كانت الحاضنة فاسدة ما جان صاروا السياسيين فاسدين، فخل نصلح أنفسنا ومجتمعنا يلله نصلِح الآخرين، أكولها هم بيني وبينكم، لعله ما نجح مشروع الاصلاح والخيمة والمظاهرات والاعتصام ليش؟ لأنه فينا من هو فاسد حبيبي، أكولها والحزن يعتصرني، لو كنا صالحين بالمعنى الحقيقي لأصلحنا، لكن مع الأسف أكو هواي حشرات بيناتنا تسيئ إلنا فما استطعنا أنه.. ففاقد الشيء لا يعطيه، فالفساد يجب أن نوقفله بطريقة تثقيفية منظمة عالية المستوى، وكذلك التطـ .بيع، يجب أن نقف وقفة واحدة وصف واحد من أجل منعه وإنهائه، وإلا إذا طُـ .بعَ، طبعاً اسر*ائيل والغرب يدرون مركز العالم وين؟ بالعراق، مركز العراق وين؟ النجف الأشرف، ما أريد بعد أكلك وين، بعد أكو مراكز مراكز الى أن أوصلك الى نقطة، فهم يعرفون وين، فآني من ذاك اليوم كتلك لعلي أقتل أو أموت أو أستشهد ما دا ألعب ترى أو أضحك عليك، أو أريد دعاية انتخابية، لا يقنعوكم بهذا الشي، بما أنه توكف ضد الفساد وتوكف ضد التطـ .بيع راح الخطر يصير عليَّ وعليكم أيضاً حبيبي، إذا مستعدين انه يصير الخطر عليَّ وعليكم أهلاً وسهلاً بكم، نقف معاً، ولست قائد أقف جندي إذا صار تطـ .بيع آني.

الخطر يزيد يوم على يوم، وإذا خسرتوا مقتدى التطـ .بيع يصير سهل، وإن كان يجوز شويه حبيبي بيها كلمة تكبر بس هاي حقيقة، إذا مقتدى مات أو قُتـ .ل إقرأوا على التطـ .بيع السلام إن جاز التعبير، بكل سهولة يطـ .بعون، وبكل سهولة بعد شي إصلاح ماكو إصلاح، لأنه مع الأسف هواي من الناس مكيفة على الفساد حبيبي، فاحنا لا نصير منهم، احنا مدرسة محمد الصدر، تربية محمد الصدر ما يريدنا هيج، لا طالبين دنيا ولا طالبين مال ولا طالبين كذا، نطلب الآخرة فقط، اطلبوها قربة الى الله تعالى يُنجحكم ويُصلح أموركم، إن تنصروا الله ينصركم، خل ننصره حتى ينصرنا، ما ننصره ما ينصرنا.

والحمد لله رب العالمين، وشكراً لكم

احسنتم النشر