لقاء السيد القائد مقتدى الصدر ( اعزه الله ) مع طلبة مدرسة السيد محمد باقر الصدر مُنضداً

اللهم صل على محمد وال محمد وعجل فرجهم والعن عدوهم
فيما يلي لقاء سماحة السيد القائد مقتدى الصدر ( أعزه الله ) مع طلبة مدرسة السيد محمد باقر الصدر للعلوم الدينية بتاريخ 7 جمادي الاولى 1426 للهجرة الموافق 13/ 6 / 2005 ميلادية ، منضداً

لقاء السيد القائد مقتدى الصدر (اعزه الله) مع طلبة مدرسة السيد الشهيد محمد باقر الصدر (قدس) للعلوم الدينية
احد الطلبة : من المقدمات اللي تعودنة عليهه في دراستنة للحوزة راح نحجيهه بشكل دراسة :
المقدمة الاولى: واحد سأل الامام الصادق (سلام الله عليه) او احد الائمة سلام الله عليهم فقال له الغناء حلال لو حرام فقال له هي خانتين خانة حق وخانة باطل فوين تخلي الغناء كلة أخليهه بخانة الباطل او خانة الحرام فكلة بعد ميحتاج الى دليل.
المقدمة الثانية : اللي ينبغي ذكرها على انو السيد الشهيد رحمة الله عليه باستفتاء مقدم له تقريبا قريتة ب1993 يجاوب على سبب ادعائه الاعلمية وسبب انه انا الاعلم اجاب بجملة من النقاط احداها او النقطة الرئيسية اللي ذكرها السيد رحمة الله عليه هي انه حتى نرجع حوزة النجف هي الام وتكون غيرها هي الفرع لحوزة النجف.
المقدمة الثالثة : تقريبا يذكرها السيد الصدر في احدى خطبه نسأل الله ان يقدس روحه وهي انه لابد ان نحافظ على الخط الصدري او نحافظ على خط الائمة سلام الله عليهم او نحافظ على استمراريته بل لعله او نحاول الابقاء على الخط الصدري او التيار الصدري مثل ما يعبرون عنه في بعض الاحيان فاذا تمت هذه المقدمات خوب كلهه صحيحة وكلهة تامة حسب اللي بالي ............
هسة تقريبا....
السؤال الاول: هنَّه مجموعة من الاسئلة اللي حضَّرتهن اني ومجموعة من الطلبة ( سبع.....ثمانيه) فاني راح اكون المتصدي للاسئلة نيابة عنهم حتى يصير تنظيم بالمسألة :-
السؤال الاول: التيار الصدري الموجود الحالي اللي يواجه الحملات الاستكبارية و حملات الاستعباد اللي الموجودة ، هذا الخط اللي شيد اساسه السيد رحمة الله عليه او احياه بالصحيح لانه امتداد خط الائمة سلام الله عليهم فالسؤال كالتالي انه من الناظر الان يعني لفظة الناظر نوعا ما يعني متشرعيا وفقهيا نوعا ما تكون بيها من الدقة فمنوالناظر على الخط الصدري سيد.
سماحة السيد القائد مقتدى الصدر: الله سبحانه وتعالى انشاء الله .
السائل:هاي من المسلمات .
سماحه السيد القائد مقتدى الصدر: كانما تقصد انت كمرجع .
السائل: نعم......هو المتكفل بشؤونه بغض النظر عن كونه مرجع
سماحه السيد القائد مقتدى الصدر:الحقيقة اللي عاشر السيد الشهيد الثاني يجب ان نتعلم منه نقاط عديدة خوب علمائنا الناطقين كانوا بحر احنة ناخذ قليل منه مو كلشي ناخذه بجلسة وحدة بس علمنه ان المرجعيه هي خط...هي نهج...هي عمل... هي تضحية وليست شنو...مركز او مكانة يرتأيها الشخص فيجلس فيها كان يقول الاجتهاد نور يقذفه في قلب من يشاء حبيبي لكنه ما صار مرجعا خوب احنه ندري الحرب اللي جانت ضده من اول يوم الى اخر يوم ما صار مرجعا الا بكونه قال انا خادم للحوزة العلمية حبيبي في احد دروسه اذا سامعين بيه اللي اتذكره مقدمة الكفاية اول درس قال اني خادم للحوزة العلمية حبيبي الان كثير من الذين يتصدون للمرجعية يريدون ان تكون الحوزة خادمة لهم ......لا......المرجع يجب ان يكون هو خادم للحوزة العلمية رئيس القوم........
الطلبه: خادمهم .
سماحه السيد القائد مقتدى الصدر: خوب هاي عقلا ونقلا بعد ما منهه فالمرجع رئيس الحوزة احنة نكول رئيس الحوزة......الحوزة رئيسة الجميع يعني رئيس الحوزة اذاً يكون خادمهم وهو قال انا خادم للحوزة العلمية ما كالهه (كوتره) حبيبي حجي وبس واذا كان خادم للحوزة العلمية يجب ان يضحي بماله ودمه من اجل الحوزة العلمية وفعلا ضحى بماله ونفسه من اجل الحوزة العلمية ولم يبخل بها ولبس الاكفان ووقف حبيبي سُأل احد المراجع لو صح التعبير انه قالوا له ليش متجي تصلي معاه كللهم اذا اوكف نفس وقفة محمد الصدر يمكن يصير بيه سكتة واموت هذا حبيبي اللي يستحق ان يكون مرجعا والا جالس في بيته ويريد ان يكون مرجعا ويقدم المصلحة الشخصية على المصلحة العامة هذا ليس مرجعا .......... هذا واحد.
والشيء الثاني ان ينبذ الانانية ، حبيبي ترة الانانية مو سهلة ان ينبذها الشخص، ان لا يقول انا يعني لا يُشعِر الناس بوجوده اطلاقا كانما فعلا هو واحد من الحوزة العلمية واحد من طلاب الحوزة العلمية هل رايت محمد الصدر يتميز بطعام او بشراب او بملبس او بمكان او بمجلس ، يجلس مجلسنا ياكل مأكلنا يشرب مشربنا يلبس لبسنا كانما حاله حال جميع الطلاب الموجودين ولا يفرق من هاي الناحية ، الان لا حبيبي اللي يريد يتصدى للمرجعية شوية يخلي كرسيه عالي يمد يديه للتقبيل يجعل مثلا برانيته او اللي يستقبل بيها الناس كشخة ومدري شنو كذا ليش (يابه) الشوية المجتمع تغير كون اني هم اتغير المستوى الاقتصادي صعد شوية للفرد الدخل الاقتصادي صعد مو المستوى الاقتصادي فانا هم يكون شنو اصعد وياه لا حبيبي المرجع كلما صعد المستوى الاقتصادي يجب هو ينزل.......امير المؤمنين يجلس مع الصعاليك حبيبي ، ها ، مع اقل الناس مع افقر الناس ، الذي يتشبه بامير المؤمنين سلام الله عليه هو مرجعنا والذي يتشبه بكذا هذا مثل اللي مرجع مثلا يركب اخر موديل سيارة لو كذا او كذا هذا اذا نريد نسوي مرجع يعني كون كل الناس نركبهم سوبرات حبيبي كل الناس نأكلها اطيب ماكل مرجع هوه شنو المرجع ان نرجع له اذا وجدت هسه ما اطول عليك اذا وجدت هيجي مرجع انت اتبعه اني ما كايلك شي ولا اني كايلك تعال اتبعني لان اني اصلا ما متصدي للمرجعية لو اقول باجتهاد نفسي لا هذا ولا هذا ولا ارجع لاحد السيد الصدر خوب كلك ميخالف وصيته موجودة ان السيد كاظم الحائري هو الاعلم هذه الوصية نافذة لكن نريد من يقود الحوزة هو خوب السيد هم كال انه لعلكم ترجعون الى شخص وتأتمرون بشخص اخر مو شرط وحتى على سيد كاظم الحائري (الله يديم ظله) قال انه لا يتسنى وقد لا يتسنى له الرجوع الى العراق وانا لله وانا اليه راجعون هسة يجوز ظرفة يجوز كذا انا ما اريد اناقشة في رجوعه او عدم رجوعه لكن نحتاج من يقودنا الى بر الامان الحوزة العلمية صارت حبيبي مدارسها فارغة صارت النجف الاشرف فعلا مدينة قبور لا اكثر ولا اقل فاسعوا الى تكامل انفسكم دينا ودنيا حتى نسعى الى بناء حوزة جديدة من(جدة وجديد) حبيبي لان كل ما نبني هُمَّه يفلشون وسبحان الله كانما نسينة قول السيد المرجعية الرساليه صار كل واحد يجي يدعي مرجع يفلش ويبني هاي فلش وابني اذا كانت المرجعية اللي قبله شنو باطلة ساكتة مدري كذا من هالصفات اللي بكيفكم تصفوها اما اذا هيه مرجعية حقة يكول اني صدري ويفلش اللي بناه محمد الصدر ويجي يبني فوكاه ليش هوه مو اساس قوي جا انت هساه مكان مدتفلش كون تبني مرة لُخ مصعد كذا ساف من الطابوك لو صح التعبيرليش حبيبي محمد الصدر قدم دمه من اجل الجمعة تجي تريد تفلش اللي بناه ماكو داعي اصلا صحيح لعله انه نبذ اهل الباطل فتصير له عداوات امير المؤمنين هم سبحان الله هلك فيك اثنان محب غال ومبغض قال هذا كل رجل عظيم يصير له هيجي امور فعليه تمسك بمن تجده لدينك او لدينه صائنا حبيبي اول شي بعدين لدينك صائنا فد هجمات عجيبة غريبة حبيبي بس شنو مثلا اني هسة احجي بس انتخابات كون يتدخل مثلا يروح يغمس اصبعه بالحبر ويجي يخلي اصبعه بالحبرويخلي اصبع
الحجة المنتظر ملطخ هي هاي حوزة وصلاة جمعة ، امامة الجمعة تصير وسب علني على امير المؤمنين وعلى رسول الله وعلى مدري منو وهذي ماكو ميدخل بيهه اصلا ياهو اهم انو تتدخل في الدفاع عن رسول الله(صلى الله عليه واله وسلم) واهل البيت لو تتدخل في تغميس ايدك بحبر احمر مدري اخضر (وين هاي وين هاي) المهم فانت ميز انشاءالله انتو عدكم فد مرتبة تميزون بين الباطل والحق.
احد الطلبة : قبل ايام سمعنة يكول اللي ماأنتخب عدالته ساقطة .
سماحة السيد القائد مقتدى الصدر : خوب اكو هم من يكول بالعكس اللي انتخب عدالته ساقطة لا هذا ولا هذا حبيبي الماي اذا شربتة انت عادل او فاسق ما ادري والماي اذا ما شربته انت لا عادل ولا فاسق هذا مالا علاقة.
احد الطلبة : اريد اوضح هويتي الك اسمي الشيخ محمد الحلفي.
سماحة السيد القائد مقتدى الصدر : اهلا وسهلا.
الطالب : طالب مرحلة سادسة في المنهجية الحوزوية التابعة للشيخ قاسم الطائي على جوابك سيدنة اكو ملحوظتين الملحوظة الاولى انت انطيتنة هسة كأمر كلي فعلى هذا انو اني شوكت ماأريد ارجع المن للي منطبقة عليه الشروط ومجتمعة بي الشرائط والصفات بيني ما بين الله سبحانه تعالى وامشي وراه واسير تحته ما دام شنو مخالف لهواه مطيع لامر مولاه فعلى العوام ان يقلدوه خوش ، النقطة الثانية ....
سماحة السيد القائد مقتدى الصدر : مو هيج هاي درجة من الدرجات ميخالف كتلك نبذ الانانية ، التضحية ، الكذا ، الكذا
الطالب:اعتقد لمسناهه كلنة نبذ الانانية موجودة عند بعض الاشخاص بس اللي نعرفهم اني وياك ، النقطة الثانية : انت انطيتنه كأمر كلي في مسألة تسليم الحقوق ليش لأن رجعتهه الة لهاي الجهة بالخصوص.
سماحة السيد القائد مقتدى الصدر: الاعلم....اني متابعلي محمد الصدر حبيبي ما تابعلي فلان وفلان
الطالب: ليش هسة ما رجعتهه .
سماحة السيد القائد مقتدى الصدر: على شنو
سماحة السيد القائد مقتدى الصدر : كتلك سيد كاظم الحائري اعلم لم اسقط اعلميته، كتلك وصية السيد نافذة ما حجيت اجنبي لو صح التعبير، كتلك وصية السيد الصدر نافذة ولا زال السيد كاظم الحائري اعلم ولكن نحتاج من يقودنا ويجوز كتلك لعلكم تقلدون شخص وتأتمرون بشخص اخر اني ما كلت مناقض لذلك شيء لقول السيد الشهيد او وصيته تبقى نافذة واي واحد يدعي انه اعلم من السيد الحائري يجب ان يثبت بدليل .
احد الطلبة : الاحتمالات الثلاثة الموجودة في الوصية السيد كاظم الحائري لحد الان اوالشيخ الفياض التفوا حوله لكونه طيب القلب او احد طلبتي ان استمرت الحياة ...
سماحة السيد القائد مقتدى الصدر: هاي شنو هاي شنو هو كل واحد لقاء ماله علاقة والالتفاف حول الشيخ الفياض ليس على نحو الاجتهاد وانما على نحو القيادة وانا اول يوم رحتله حبيبي ما صارله دم محمد الصدر لعله اثنا عشر ساعة ورحتله حتى هو نفسه روح اساله لعله مادري يجاوبك بنعم او لا ، كلي ما معناه الورع منك انو انت اجيتني ما صارله اربع وعشرين ساعه محمد الصدر ميت او والدك ميت وعليه اني كتله تعال اجيبلك الخمس اجيبلك الكذا رفض ، محمد اليعقوبي هم ابشرك كتله كعدناه واحنة خمس عشره او عشرين واحد حتى منهم الله يرحمه شيخ علي الكعبي وغيره وغيره موجودين الى الان بالسجون البعض بعضهم موجودين روح اسألهم كتله شيخ تجي تاخذ البراني كال لا ، تجي تصلي جمعه كذا رفض هم ماريد اكول لفظته شلون رفض باي قول المهم شلي علاقة اني مرة ركبت تكسي حبيبي ورة استشهاد السيد باسبوعين او ثلاثة هو ميدري منو اني كلي صدك ابن السيد يقود الحوزة وراء ابوه مدري ابجي مدري اضحك اذا هوة مقتدى يجي يقود الحوزة.....لعد المراجع وين صاروا حبيبي اني مو ذنبي اذا المراجع ميقودون الحوزة اني شنو ذنبي ، يعني اذا ماكو مرجع اكعد واسكت لو احاول ان اصلح كآمر بالمعروف وناهي عن المنكر ذاك اليوم قبل ثلاثة ايام اربعه ايام واحد من جماعه شيخ محمد يجي يدعوني الى التوبه وتعال طبق قول الحاكم الشرعي مدري شنو كتله حبيبي شنو اني كاعد بالبيت جاي استقبل ضيوفي اذن حاكم شرعي هم للضيوف يراد هم تعال خل اخذلك اذن حتى استقبل ضيوف او ما استقبل ضيوف شعدك وياي طالبني بطلابه اني كاعد(هنانه) امر بالمعروف وانهي عن المنكر احجيلي حجايتين تعتبره خرط لا تاخذ بيها تعتبره خوش اخوذهه وروح في امان الله في امان الله ويفوتك من الجذاب صدك جثير.....
احد الطلبة : من رخصة الشيخ احنة تقريبا خمسين طالب من مدرسة سيد محمد باقر الصدر ، ياحبذا كون نتقاسمه وقت السيد ....
سماحة السيد مقتدى الصدر : اهلا وسهلا خادمك ممنون ممنون ....
انة بس اريد اكول فد شي انو حتى سبحانه الله كتله للسيد مكتب السيد الحائري انه دم السيد الشهيد لتودوا بلاش حبيبي لا تقسمون حوزته وتثرموهه تثرم ماكو داعي له، كل واحد اجه اخذ انو اني مجتهد واني مجتهد ليش ميتحدون خو مجتهد مجتهد ملازم لماذا لا تتحد أليست وصية السيد موجودة انو السيد كاظم الحائري هو الاعلم وين توديهه بالله ان الاعلم من بعدي على الاطلاق شوف على الاطلاق السيد كاظم الحائري احد الطلبة : الان .
سماحة السيد القائد مقتدى الصدر : سقطلياهه جبلياهه الان طلعلياهه لان خو متدعي الان ، الاعلم من بعدي على الاطلاق السيد كاظم الحائري احسنت جناب السيد كاظم الحائري الان منين جبتهه حبيبي الان .....
احد الطلبة : هو يحجيهة بالبداية لحد الان يعني السيد كاظم الحائري هو الاعلم من بعدي على الاطلاق .
سماحة السيد القائد مقتدى الصدر : زين الان استصحاب نستصحب بقاءه مجتهد فاذا جبت بدليل اخر انه غير مجتهد اهلا وسهلا غيره اعلم المفروض مو مجتهد تره كون اعلم سيد كاظم الحائري اللي صارله ثلاثين اربعين سنه مجتهد يجي واحد ثلاث سنوات يصير اعلم منه تره مراهم حبيبي كل اللي يدعون اني أكُلَك مو طعنا بيهم لا شيخ قاسم ولا شيخ محمد ولا الصرخي ما مكملين ربع دورة عند السيد فقهية اصولية ربع دورة مكمل يريد يصير لي مجتهد بدل عقلك اقلهه يكمل دورة فقهية وحدة .
احد الطلبة : ممكن حضر عد هذا المجتهد وهذا المجتهد وكمل دورة منو يكمل دورة سيدنة اذا هيه خمس وعشرين سنة ......
سماحة السيد القائد مقتدى الصدر : حبيبي هذا هم عيب عليك كون انت تحجي حجي مو طيع محمد وقاسم علمود محمد الصدر، محمد الصدر كال اللي اني حضرت يم محمد باقر الصدر دوره كاملة فصرت اعلم انت مو تكعد تشكل (منا و منا) اللي عند محمد باقر الصدر حضرت صرت اعلم فمدرسة محمد باقر الصدر هي اللي تنتج اعلم حبيبي مو اي مدرسة فاللي ماخذ منا ومنا ميصير بمدرسة محمد باقر، مدرسة محمد الصدر ما كملت حبيبي ربع دورة كملت فوك التسع سنين اصول يا الله يكمله ،خوب تكون مثمرة بس مو ........
احد الطلبة: كثير من الطلبة خل نسميهم مال البحث الخارج او كذا موجودة الادلة يمكن رؤيتهم ويمكن مناقشتهم لو يضربهه عرض الحائط
سماحة السيد القائد مقتدى الصدر : انا ما ادعي اني من اهل الخبرة او من الفضلاء حتى اناقشهه خل يروح يناقشون اللي يشاء خلي يناقشهه .
احد الطلبة: باعتبارنه طلبة حوزة علمية فعدنه فد برنامج كلمة سماحة السيد ، بعض الاسئلة اذا صار مجال، اعوذ بالله من الشيطان الرجيم بسم الله الرحمن الرحيم وصلى الله على خير خلقه محمد واله الطاهرين
جميع الحاضرين: اللهم صل على محمد وال محمد وعجل فرجهم والعن عدوهم .
احد الطلبة: سيدنة فد كلمة بسيطة تعبر عن مشاعرنا جزاك الله خير الاخ السيد مقتدى الصدر السلام عليكم ورحمة الله وبركاته نقول الاخ ونتجاوز كل ما قد توصف او تنادى به من نعوت او اوصاف ولعدة اسباب نتجاوز هذه المسالة الاول: الاشتراك بالانتماء الى دين الله العزيز وهو الاسلام وهو قمة الفخر لاثنين ان يشتركا بالله فيكونا اخوين .
الثاني الاشتراك بالانتماء الى اب واحد ملؤه الحنان والعطف اخذ بايدينا نحو الله وهو محمد الصدر رضوان الله عليه .
الثالث الاشتراك بالانتماء الى عقيدة خاصة قد لايشاركنا بها الغير وقد ينكر علينا الغير وهي عقيدة كلا ....كلا وان كلفتنا دمائنا اذن كل هذا وغيره دعانا ان نأتي الى الاخ ليس الا وما اجمله من شعور لو عشناه حقيقه في داخلنا من غير ان نضع عليه بعض الرتوش التي قد تسيء الى حقيقة الشيء وجوهره وعلى العموم فإن ما يشد الناس بعضهم الى بعض او كلهم الى شخص واحد هو شيء وراء الرتوش والتزويق قطعا والادلة على ذلك كثيره ويكفينا ان نذكر مثالين مما ادعينا :-
الاول/ السيد محمد باقر الصدر (قدست روحه الطاهره) فالكل منا يشعر انه مدين لهذا الرجل العظيم ويقف متصاغراً امام شخصه وذكره مع ان الاعم الاغلب منا لم يعش معه فما هو السر في ذلك فان قلت العلم الذي بقره هذا الرجل ترد ان الكثير لم يقف على مبتكرات السيد العلمية وان قلت الشهادة ايضا ترد غيره قد استشهد لكن لاتحس نحوه بالمديونيه ابدا اذن هناك شيء وراء هذا كله واعتقد انه الابوة ولكن بمعناها الحقيقي .
والثاني/ السيد محمد الصدر (قدست روحه) وما ان انبزغت شمسه حتى ادركنا ان الابوة اقوى رباط ممكن ان يربط الناس ويشدهم ان لم نقل انها الرباط الاوحد بل كل الوشائج والروابط الاخرى وقتية ووضعية وقابلة للزوال واقوى ما قد استدل به على ذلك علاقتنا بمحمد وعلي (عليهم السلام) فانها لم تكن قط علاقة النبوة والامامة بل هي علاقة الابوة والبنوة بدليل قول الرسول (صلى الله عليه واله وسلم) ( ياعلي انا وانت ابوا هذه الامة) وان قلت فما سنخ علاقة الناس بمقتدى الصدر قلت انها علاقة الاخوة ليس الا ولكن الاخوة الواقعة في طول علاقة الابوة وللمتأمل الامر ليس صعبا ولا أُطيل فها هم ثلة طيبة من اخوة مقتدى الصدر جاءوا لزيارته بعد فراق دام اشهر ولانعرف سببه وليكن معرفة سببه احد الاسئلة المطروحة ، سيدنة يعني عدنه بعد هذا التقديم ارجوا ان يكون يليق بالمقام عدنة مجموعة اسئلة بغض النظر عن المسائل الاخرى نحتاجها في حياتنا كرساليين نسأل الله ان نكون رساليين وكمبلغين للدين الاسلامي وكطلبة حوزة وننتمي للحوزة الناطقه نحتاج لهذي الاسئلة :-
السؤال الاول/ وهذا طبعاً يطرح علينا كثيراً في الشارع ماذ يعني مقتدى الصدر للخط الصدري ؟
سماحة السيدالقائد مقتدى الصدر/ السؤال المفروض مو اليه الكم .
الطالب/ احنا عدنا اكثر من وجهة نظر في هذه المسأله ولكن .....
سماحة السيدالقائد مقتدى الصدر/ اذا تقبلون تعتبروني خادم اعتبروني
الطالب/ جزاك الله خير هذا السؤال طرحه يترتب عليه أسئلة كثيرة اخرى من جملة هذي الاسئلة ، الان الخط الصدري بشكل او باخر كأنما مرجعه و مستنده سيد مقتدى الصدر الله يحفظه انشاء الله زين فهل يتحمل السيد مقتدى الصدر بعض الاخطاء التي قد تحصل من بعض الافراد المنتمين لهذا الخط ؟
سماحة السيد القائد مقتدى الصدر/ اني شنو اتحمله انا راسي شيب من وراهم شسويلهم
الطالب/ طبعا واضحين بهذي المسألة....
سماحة السيدالقائد مقتدى الصدر / وانا لله وانا اليه راجعون بس العافية بالتداريج ، شوية النصائح والتوجيهات .........
الطالب/ هذي النصائح نجدها قد اتت في وقت متأخر نحن ابناء الخط والنصائح إنة اولى ، يقولون ان التربية الالقاء في قلب الحدث كالالقاء في الارض الخصبة سُرعان ما ينبت فالخط الصدري ايضا بعد استشهاد السيد الصدر رحمة الله عليه وبالاخص بعد سقوط اللانظام اصبح له توجه جديد اصبح له ثوب جديد وان كان هو ضمن المسار الاول الذي خطه السيد محمد الصدر رحمة الله عليه ولكن أصبح له مسار جديد بحكم الظروف والملابسات التي عاشها العراق فنكدر نشبهه بالطفل الذي بدأ ينمو وفي يوم من الايام سوف يصبح رجلاً وإذا اصبح رجلا يترتب عليه مسؤوليات كثيرة هذا الطفل يحتاج الى تربية في اول ايامه ويحتاج الى نصح في اول ايامه ويحتاج الى ارشاد في اول ايامه حتى بالتالي تضمن انه عندما يكبر يكون صالحا الخط الصدري واحنة كلنة عشنا هاي المسألة كان محتاج الى هذه النصائح والى هذه الارشادات وهذه المواعظ في اول ايامه حتى يكبر ويكبر وهو شنو متربي وصاحب شعور بالمسؤولية والانتماء الى الله جل وعلا ودين الله ، لكن ما حصل انه كانما بعض النفوس المنتمية لهذا الخط بمعنى اخر وجدت فسحة او مجال وبالتالي العوامل الموجودة في داخلها اشتغلت وحصلت من عندها سلبيات كثيرة وهاي السلبيات بعد ان اصبحت متأصلة في نفوسهم اصبح من الصعب اقتلاعها ولا سيما هذولة الاشخاص يعني واقفين على مراكز مهمة جدا في الخط فاصبحت المسألة الان في غاية الصعوبة يعني نجلس وننتظر كيف نعالج يعني احنه بعقولنة القاصرة ندري العلاج صعب فهل لهذا الامر من كانما يعني شلون وراءه مصلحة يعني تُرِك ومن ثم الان بدأت النصائح.
سماحه السيد القائد مفتدى الصدر : هو خوب ما تُرك تُرك وانما صارت اكو فد فجوة ومشاكل ، حقيقية هو اني ما(اكلك) ماكو تُرك هجي بالمعنى الحقيقي بس هذي الظروف اللي أحاطت الحروب وحده وراء الاخرى انت كيف تريد انه لو صح التعبير ما انطونة فرصة هسة امير المؤمنين سلام الله عليه اول خلافته لأخر خلافته هو في حروب من حرب لحرب لحرب الى ان شنو استشهد سلام الله عليه ولم يستطيع خوما اكلك لم يصلح ..ألا..انه لم يستطيع الاصلاح الذي كان في باله لو صح التعبير فالان انا وجدت فد فسحة من المجال على انه اُصلِح لو صح التعبير اذا تمكنت انا ما ادعي ممو مقصر اني مو معصوم هذا واحد والاهم من ذلك انو هذا اللي خالة ببالي وكلتهة في احدى الاماكن انو وجدت فعلا اكو قاعدة مضحية بالدماء فلا بد انو هذا القاعدة المضحية تستحق هداية الجهاد الاصغر ثم الجهاد الاكبر خو ما تبدي بالجهاد الاكبر وهو اصلاح النفس بعدين الجهاد الاصغر تصير بالمكلوب فبعد ما استطاعوا ان يجاهدوا بالجهاد الاصغر حوَّلتْهم ان يجاهدوا بالجهاد الاكبر.
الطالب/ لكنه اصعب سيدي بدليل دعوات كثيرة للسيد مقتدى الصدر لم تنفذ او تؤخذ بعين الاعتبار.......
سماحه السيد القائد مقتدى الصدر/ الجهاد الاكبر أصعب .....
الطالب/ من قبيل الرجوع للدراسة ومن قبيل مسائل اخرى ....
سماحه السيد القائد القائد مقتدى الصدر/ هو لذلك سُمي الجهاد الاكبر لكن بدأت بالاصغر ثم الاكبر، جهاد الكافر و جهاد الفاسق ثم جهاد النفس ، وانشاء الله شوية شوية جهاد النفس نفسهة طويل لو صح التعبير طريقه طويل جدا ......
احد الطلبة/ اعوذ بالله من الشيطان الرجيم بسم الله الرحمن الرحيم توكلت على لله رب العالمين سيدنة احنة ما نعرف شلون نعبر عن شعورنة خاصة اكثر الطلبة اني معاشرهم حقيقية نعجز عن شعورنة تجاهك وتقصيرنة امام الله سبحانه وتعالى ومذهب اهل البيت سلام الله عليهم ومذهب هذا الخط باعتبارنة انشاء الله نحن من اتباع الحوزة الناطقة ونسأل الله سبحانه وتعالى ان يجعلنا من اهل الحوزة الناطقة فبعض الاخوان حقيقية عدهم اسئلة كثيرة وبعض الاخوان ........
سماحه السيد القائد مقتدى الصدر اسأل كول بخدمتك .
الطالب/ يبلغوك السلام لان عددنة كان كثير مدرستنة 150 .
سماحه السيد القائد مقتدى الصدر/ انشاءالله اذا بقيت الحياة نتلاكه .
الطالب/ المطلب الاول سيدنة اذا الله سبحانه وتعالى وفقك وخرجت للدرس والوضع الامني تحسن .......
سماحه السيد القائد مقتدى الصدر/ انا بديت درس بالبيت ....
الطالب/اعرف اذا بالمستقبل تيسر هذا الامر زيارة لمدرستنة انشاءالله
سماحه السيد القائد مقتدى الصدر / انشاءالله. ممنون
الطالب/ سؤال لاحد الطلبة طبعا يكول توجد اطراف دينية عديدة في العراق لم تشارك في الانتخابات وترفض العملية السياسية بوجود المحتل وايدت المقاومة باستفتاءات عديدة مثل السيد احمد البغدادي والسيد علي البغدادي والشيخ قاسم الطائي والشيخ جواد الخالصي فلماذا مثلا لم يتم تشكيل مجلس مشترك حول ادارة الامور في العراق حتى يقللوا بعض الشأن عن سماحة السيد باعتباره مثَّل التيار الان والناس تقول ذلك ليس سيد مقتدى هو الذي دعا لنفسه اني حقيقية احجي عن نفسي واكثر الطلبة ماخذ رايهم بهذا الامر ، اعتبر اشوفة كانما من اشوف مسلسل الامام الرضا كانما الامام موجود لان الحقيقيه ماجاي اشوف هذا الشي ولكن التقصير حقيقيه يرجع النه كطلب’ حوزة هسة اني احجي بس هوه بالعموم يعني اول واحد اني ابدا بنفسي فالتقصير من عدنة تجاه المذهب لان مذهب اهل البيت واضح هو منهج مقتدى الصدر هو منهج اهل البيت سلام الله عليهم .
سماحة السيد القائد مقتدى الصدر/ انشاء الله .
الطالب/ فياحبذا يكول لماذا مثلا لا يتم تشكيل مجلس مشترك باعتبارهم تقريباً نكول قريبين لنا على العموم باعتبارهم ناس يدَّعون الاجتهاد فياحبذا تشكيل مثلا مجلس شورى او سمعت بالاونة الاخيرة والله العالم ما متأكد من هذا الامراكو تشكيل هيجي باعتبارة عراقي مجلس شورى عراقي يتكون من السيد احمد البغدادي والشيخ .......
سماحة السيد القائد مقتدى الصدر/ لا تزعل المرجعية يمعود اني اتصور مثل هيجي امور تكون دنيوية لا تكون اخروية فانا اكون في معزل عنها حتى وان كانت حوزوية الدنيا حتى في الحوزة موجودة وطلب المناصب في الحوزة ايضا موجودة واكو امور اخرى ما اكدر اصرح بيهة تعذرني قد تسبب الى غِيبة واذية .....
احد الطلبة / سيدنة من رخصتك شلون احنة نعرف هاي مناصب دنيوية
سماحة السيد القائد مقتدى الصدر/ من لم يحصن نفسه عن الدنيا وعن الشهوة فأولى ان يترك هذا المنصب .
الطالب/ زين سيد محمد الصدر مثل ما احنه انّصُب على هذوله نكول هم طلب الدنيا بيهه ....
سماحة السيد القائد مقتدى الصدر/ شنو......
الطالب/ سيد محمد الصدر(قدس سره).
سماحة السيد القائد مقتدى الصدر / سيد محمد الصدر خاض بعلوم الاخلاق وبعلوم الباطن سنوات طويلة حبيبي ......
الطالب/ بس احنه ما سوينة استقراء وعرفنة هؤلاء طالبين دنيا...
سماحة السيد القائد مقتدى الصدر / ميخالف انشاء الله كلكم واحد.
الطالب/ احنه جايين نستفهم .
سماحة السيد القائد مقتدى الصدر/ اكو علم باطن واكو علم ظاهر مَن خاض علم الباطن يستطيع ان يصون نفسه عن الدنيا حبيبي احنة واحدنة ياكل ثريد وياكل كذا وكون يكعد على التبريد وحتى بالمدارس الدينية ، اذا خاض وجاهد نفسه بالجهاد الاكبر استطاع ان يكون بمنأى عن الدنيا . ها . فاذا انت كنت مجاهد بالجهاد الاكبر اسعى الى مناصب اياً كانت .
احد الطلبة / السلام على قائد القواعد الشعبية لجيش الامام المهدي سماحة حجة الاسلام والمسلمين السيد مقتدى الصدر دام عزه .
سماحة السيد القائد مقتدى الصدر / كال الاخ حلوة جانت ، عليكم السلام
الطالب/ نرجو من سماحتكم توجيه قواعدكم الشعبية بالخصوص جيش الامام المهدي دراسة وتفقه كتاب الامر بالمعروف والنهي عن المنكر لانهم بحاجة اليه وبالخصوص بالامور السلبية اللي صارت .....
سماحه السيد القائد مقتدى الصدر/ كلتهه هاي انشاء الله شوية شوية
احد الطلبة / سيدنة فد سؤال اذا امكن .......
سماحة السيد القائد مقتدى الصدر/ بس برد اعصابك.
الطالب/ السؤال هنا يكول بعض ائمة الجمعة ـ يعني احنة هاي نشتكي من عدهه ـ يتخبطون في افعالهم واقوالهم حول صلاة الجمعة عندما يسأل واني بالذات سائل احد من ائمة الجمعة عن الصلاة هل تقام بنحو الولاية ولاية السيد الحائري ام بنحو ما قاله منهج السيد الصدر عندما نسالهم هذا السؤال يقولون نحن نرجع بولاية الفقيه للسيد الحائري .
سماحة السيد القائد مقتدى الصدر/ تسألني إلِيّه عنهم لو اجاوبك عنهم لو أجاوبك عن نفسي .
الطالب/ ائمة الجمعة من المكتب عندما نسألهم هذا السؤال يقولون هكذا ، ما رأيك في هذه المسألة ؟
سماحة السيد القائد مقتدى الصدر / وضح سؤالك تريد أجاوبك بمسألة فقهية لو تريد انقدهم ، انقدهم اني ما اكُلك ائمة الجمعة معصومين وكل واحد يخطأ ، تريد تسألني عن الجمعة واجبة الان بشنو اكلك واجبة بخمسة احدهم الامام تجب بفتوى السيد محمد الصدر .....وجوب بالفتوى
احد الطلبة / قبل فتره مادري الك علم بيه صدر بيان او استفتاء ...
سماحة السيد القائد مقتدى الصدر/ مثل هاي اني شفته وكتلة لابو هاجر حقيقية نقدته وكتله هاي معناه دم الصدر راح ابلاش....لا هو ميعرف فتوى السيد جاهل من هذي الناحية بفتوى السيد .
احد الطلبة / غيروهة .
سماحة السيد القائد مقتدى الصدر / بعديش غيروهة ما تزيد عندي.
احد الطلبة / شيخ ابو هاجر راويته المنهج بس جان تفسيره غير تفسير.
سماحة السيد القائد مقتدى الصدر/ لا...حقيقيه تفسيرات تعبانة اللي فسرلياهة يكولي خمسة احدهم الامام اذا صاروا ستة بعد متجب هاي يرادلهة كون واحد عمره ست سنين يحجيهة اصدكة لا مو صحيح .
احد الطلبة / سيدنة ما يخفى عليكم بأنه سيد محمد الصدر اسس حوزة أخلاقية انطلق من عدها من باب الفقه لأنه كان اكثر تركيزه على الاخلاق حتى بالدرس .....
سماحة السيد القائد مقتدى الصدر/ اكيد . صحيح .
الطالب/ المحاضرات الاخلاقية ويأكد على الاخلاق هذا شي واضح لكنه الان سيدنة الحوزة فارغة من هذا الجانب ....
سماحة السيد القائد مقتدى الصدر/ محد يعرف... جا شسويلك...ميعرف يعني هسة بالله ليش الحوزة الثانية متصلي جمعة متعرف تخطب ، خطابة متعرف ميعرفون بالاخلاق ميخوضولك بالاخلاق هو هذا هسة اللي كلته ما عدهم علم باطن ، السيد كان خبير بعلم الباطن والاخلاق يشرحهه
احد الطلبة / مالنة علاقة بحوزتهم .....
سماحة السيد القائد مقتدى الصدر/ حوزتك هم فارغة جا حوزتك معصومة خو مو معصومة جان محمد الصدر (لا ممهه) ويعرف شلون ....
الطالب/ بما انه ينتمي الى محمد الصدر يكون دليله شنو
سماحة السيد القائد مقتدى الصدر/ كلمن يدعي بالعمل حبيبي يدعي بي خو مو بالقول ، بالفعل مو بالقول .......
الطالب/ اني مثلا مجتهد بالفقه يعني نريد مثلا نمثل جانب الاخلاق للسيد محمد الصدر ما خله مثلا ناس رباهم .......
سماحة السيد القائد مقتدى الصدر/ كتبه ... فقه الاخلاق عندك بيه هواي تطلع بيه مواضيع........
الطالب/ بحاجة الى ارشادات توضيح السيد كانما يكول الولي او العارف لا يمر بالموت الطبيعي هسه اني ما افتهمهة سيدنة........
سماحة السيد القائد مقتدى الصدر/ هو هذا الموت الاخلاقي والموت الطبيعي ، الانسان من يتحول من مرحلة الى مرحلة يموت حبيبي ، المقامات من يتحول من مقام الى مقام يموت اكو فد برزخ بين كل مقام ومقام ميفوت الى المقام الثاني اذا هوة ميموت عن المقام الاول هاي هية.
احد الطلبة / اعوذ بالله من الشيطان الغوي الرجيم بسم الله الرحمن الرحيم وصل يا رب على محمد وعلى اله الطيبين الطاهرين توكلت على الله رب العالمين رب اشرح لي صدري ويسر لي امري واحلل عقدة من لساني يفقهوا قولي انك على كل شيء قدير سيدنة ماذا اقول حقيقة اتشرفت بمجيئي الى هذا البيت تقريبا بوجود السيد الوالد رضوانه الله تعالى عليه وكان يقدمنة الجاي والماي حقيقة بيده رضوانه الله عليه فالاعصاب ربما ما عدنه هسه احنه رايدين ماي من باب الملاطفة سيدنة جزاك الله الف خير المسألة الثانية سيدنة الله يرضى عليك حقيقة نشكرك جزاك الله الف خير على كلامك وية ائمة الجمع والوكلاء ، كثير من الناس الذين بعيدين عن التيار الصدري والذين ربما يكونون العداء للسيد مقتدى الصدر
سماحة السيد القائد مقتدى الصدر/ ولو اقاطعك بس اكو سيديات اقوى من السيديات اقراص لقاءات ميرضون ينشروها لان بيهة حجي عليهم التكتيم الاعلامي ضدي حتة من جماعتي .
سماحة السيد القائد مقتدى الصدر/ حقيقة أثلجت قلوبنا سيدنة جزاك الله الف خير حقيقة لربما احنة ندافع عن سيد مقتدى الصدر لان كثير من الناس واجهة ولكن لا تنقل الصورة الحقيقية للسيد مقتدى الصدر وبالتالي اصبحوا اعداء كثيرين من حيث يشعرون او لا يشعرون وحسب ما السيد رضوان الله تعالى عليه .........
سماحة السيد القائد مقتدى الصدر/ هو يصير مقتدائي هو يصير عدوي.
الطالب/ هذا اولا سيدنة ثانيا سيدنة الحوزة تشكو من عدم وجود اساتذة بحيث اكثر من مدرسة غُلِقت لعدم وجود اساتذة وخصوصاً مثلاً اساتذتنة احنة التابعين إنة لحد الان ماكو درس لربما حسب اطلاعي القاصر دروس لمنهج السيد ما موجودة تقريباً ثانياً بزمان السيد رضوان الله عليه في أواخر حياته وحسب علمك انو السيد انشأ فد منهج دراسي حوزوي وبالتالي هيأ حتى اساتذة وبدت غيابات صحيح جان ينطي راتب الضعف علمود الغيابات للاستاذ كذلك وغيابات للطلبة فياحبذا بجهودك .....
سماحة السيد القائد مقتدى الصدر / مال الغيابات اني اللي مشيتهة ، السيد أقرهة يعني نظام الغيابات بالجامعة ، جامعة الصدر بالبداية .......
الطالب/ الله يحفظك سيدنة واحنة بالمنهجية بأخر فترة هم كامو يسجلون اسماءنا ، سيد حازم الاعرجي جان ينطينه شرائع فكان يسجل ........
سماحة السيد القائد مقتدى الصدر / تشجع لا باس من اقامة هيجي ....
الطالب / فياحبذا سيدنة كثير من الطلبة بصراحة العمل الجماعي افضل من العمل الفردي كثيرا فياحبذا تنظرنه بعطفك هذا ......
سماحة السيد القائد مقتدى الصدر / انشاء الله .
الطالب / ثالثاً بالنسبة لمخطوطات السيد وتراث السيد الصدر رضوان الله تعالى عليه كثير من كتب السيد هي عبارة عن مخطوطات وكثير نشر عن السيد ان هناك كتاب لمنة المنان جزء ثاني وجزء ثالث لربما بعض الكتب مخطوطات للسيد فياحبذا تُنشرمثلاً او بعض كتب السيد نفسيتها يا حبذا لو تعاد طباعتها وكثير من الناس محتاجة الى .......
سماحة السيد القائد مقتدى الصدر / سلمناهة الى هيئة تراث السيد الشهيد جاي يطبعون بعضها بس المادة شوية تقصر.....
الطالب / الله يحفظك وجزاك الله الف خير بالنسبة الى التيار تيار محمد صادق الصدر رضوان الله تعالى عليه حسب توجيهاتك انه الان سنجد ان هناك اكثر من جمعة في مكان واحد كلها ترجع لمحمد صادق الصدر هل هناك ممكن يعني استطاعينة كطلبة موجودين في تلك المنطقة باحتواء هذه الجمع الثلاث على سبيل الفرض وتكوين جمعة موحدة لهذه الثلاث جمع لانها ترجع لمرجع واحد محمد صادق الصدر وبتشكيل الخطبة لا تخرج عن المنهج الصدري ولا تخرج عن منهج محمد وال محمد والمنهج الذي استشهد من اجله محمد صادق الصدر رضوانه الله تعالى عليه هل بالامكان يعني نستطيع حسب توجيهاتك لابد وان ننفتح ......
سماحة السيد القائد مقتدى الصدر / شلون يعني هناك الحائري واليعقوبي ..............
الطالب/ يعني ممكن الخطبة ، العفو اقصد مو بكل المناطق هذي موجودة مثلا حسب المتيسر، يعني السيد رضوان الله تعالى عليه فتح قلبه لابناء السنة ........
سماحة السيد القائد مقتدى الصدر/ هسة دكول مثلاً الحائري ومكتب ممكن جمعهة بس اخرى اذا ضدك ........
الطالب / بس بعضهم ما قبلوا سيدنة اني كنت امام جمعه لأن كلتلهم ارجع لمكتب السيد الحائري رفضوا هذي المسألة وحتى كتبتلك بالانترنت وكتبتلك رسالة خطية ........
سماحة السيد القائد مقتدى الصدر / بالديوانية واحد .
الطالب / اني بالديوانية صاحب الرسالة .
سماحة السيد القائد مقتدى الصدر / اني جاوبت كتلك أُبقة .
الطالب / ماوصلني الجواب سيدنة وحتى سيد كاظم وصَلِتلة عن طريق ...
سماحة السيد القائد مقتدى الصدر / لكن دير بالك على مركزية مكتب السيد الشهيد
الطالب / بلي اني كلت عند التعارض ، اذا تعارض بحكم شرعي أقدم قول المرجعية فقط ماقبلولي كالو لازم إحنة مقتدائيين وانتم حائريون كلتلهم اني محمد صادق الصدر........
سماحة السيد مقتدى الصدر / مركزية المكتب لا تكسرهة .
الطالب / خوب ماكو إشكال سيدنة ما وصلني الجواب صراحةً وكتلك أكثر من مرة بالانترنيت ......
سماحة السيد القائد مقتدى الصدر / أكثر من اربعة اشهر.
الطالب / قبل الانتخابات باسبوعين تقريباً سيدنة واني أتألم لأنو شخص ، انسان ينسبني انو اني مو صدري لأنو اني كتلة منتمي لحد الان حقيقة لربما نتعبد بالنص شوية كلام محمد الصدر هو اللي قيد عَلَيَّه بس السيد رضوان الله عليه وَجَهنة لمرجعية لابد ان نرجع لمرجعية فآني كتلة اني بالتقليد لابد ارجع الى مرجع ......
سماحة السيد القائد مقتدى الصدر / السيد يكول مو واجبة .
الطالب / الاشكال اني ناقشتة الشيخ اشكالة حول وجوب الجمعة يكول هنالك حكمين لربما اكو حكم لاقامة صلاة الجمعة كحكم اولي والحكم الثاني بعد ان أقيمت صلاة الجمعة ناقشته كتلة الان مُقامة صلاة الجمعة فاذا أقيمت وجبت على رأي السيد رضوان الله تعالى عليه اما لو تقام بنحو البداية خطوة أولى واجب تخييري عند السيد رضوان الله تعالى عليه .
سماحة السيد القائد مقتدى الصدر / كلامة بالاستفتاء ماكو ، عند السيد الحائري والسيد الشهيد وكان بزمنة بالولاية والان لا ولاية ...... معنى السيد سبحان الله في لقاء الجمعة وسماحة السيد كال هسه يكولكم الولاية نفذت وراحت ، فكال لا صلوا خمسة احدهم الامام يعني هاي فتوى ، مالهه علاقة بالولاية بعد اكثر من ذلك والاهم من ذلك انو سابقا حتى السيد الحائري جان ميوجب الجمعة حبيبي الان وجب الجمعة سواء السيد السستاني او السيد الحائري ما وجبوا الجمعة هذا اللي الاشكال القوي عليهم .
احد الطلبة / ما هو رأي السيد مقتدى الصدر باسلوب تحول الدراسة الحوزوية الى دراسة منهجيات .
سماحة السيد القائد مقتدى الصدر / يعني شنو منهجيات.
الطالب/ بالمساجد صارت المنهجيات نفس الاكاديمية مثل جامعة الصدر الدينية .
سماحة السيد القائد مقتدى الصدر / اذا على غرار جامعة الصدر الدينية جان مقرة من السيد اذا مقرة ماكو اشكال بس هذا اللي اكولة لتصير حوزات حوزة فلان وحوزة فلان حافظوا على الحوزة من التقسيم .
احد الطلبة / مفهوم عند طلبة الحوزة وكنت اتمنى اطرح على جنابك المفهوم هو النزول الى المجتمع نزول طالب الحوزة الى المجتمع كثير ما يُساء هذا المفهوم اني طالب حوزة اريد انزل للمجتمع اترك دراستي انصهر ويه المجتمع بايجابياته وسلبياته واني هدفي اطلع للمجتمع في حين انو شنهوه يجرفني بالتسافل يعني يا ريت توجه كلمة .......
سماحة السيد القائد مقتدى الصدر / شلون النزول يعني قصدك اي نزول منه ، اذا مثل ما جاي يصير تاركين الحوزة وكاعدين بمكاتب السيد الشهيد هيجي مثلا
الطالب/ النزول السلبي قصدي مو الايجابي .
السيد/ خو النزول السلبي لتنزل للمجتمع ، ليش احنة سبحان الله نريد المعمم الذي وصل الى مراحل معتد بها بالدراسة ينزل للمجتمع هو اني دا اكلك صائناً لنفسه ، انو يكدر من يخوض بالدنيا ميكون منها وبيها حبيبي من تخوض بالدنية تكون كعلي بن يقطين حبيبي مو فقط من تخوض بالكذا والكذا تكون كعلي بن يقطين يعني صائناً لنفسك ، لتنجر وراهة لتصير مثل الذين فلان وفلان اللي عود يابة احنه مصلحين وهُم مفسدين لا مو صحيح.
احد الطلبة / باعتبار احنة بالحوزة ،هسة أكثر الدروس العقائدية مفقودة ....
سماحة السيد القائد مقتدى الصدر / هي يادروس ما مفقودة ، حتى العقائديه ما مفقوده ، كلها مفقودة.
الطالب/ ممكن فتح مركز بسيط لدراسة البحوث العقائديه عدنة اساتذة متمكنين من هذا الامر ......
سماحة السيد القائد مقتدى الصدر / لا بأس ماكو اشكال .
احد الطلبة / طبعاً سؤال لتن مجاوب عليه سابقاً بس لذا اكو مستجدات ......
سماحة السيد القائد مقتدى الصدر / كول ..كول .
الطالب / الان وبعد فترة طويلة من الانقطاع عن امامة صلاة الجمعة المباركة في مسجد الكوفة المعظم هل هنالك امل بالعودة وامامة المصلين في صلاة الجمعة المشار اليها جزاكم الله خيرا ؟
سماحة السيد القائد مقتدى الصدر / خوب انشاءالله الله يوفق بس مو شرط انو يصلي مقتدى الاهم منه انو الامام المهدي عجل الله تعالى فرجه يظهر ويصلي بالكوفة حبيبي مقتدى صلى ام ما صلى ميزيد.
احد الطلبة / العفو سيدنة هناك دائماً سؤال ننسأل سواء من الاخوة الموجودين بالمحافظات او الموجودين في بغداد على سبيل المثال لكون احنة من طلبة منهجية الشيخ قاسم اكثر الناس المقلدين يكولون بانه الشيخ قاسم دائما هو يدعو الى صلاة الجمعة مثلا ويدعو الى مكتب السيد الشهيد ومُناصر الى جيش المهدي حتى قال ما قال في جيش المهدي عجل الله تعالى فرجه بأنه محد قال هذا القول ، يمكن وصلتك الاصدارات سيد بانه هم أفضل من اصحاب الامام الحسين حتى الشيخ الكراوي جاوبه مع اخلاص النية طبعا هذا بالاضافة الى اقراص السيدي اللي صارت بالكاظمية وبالشعلة وبغير مكان فيكولون بانه هو يدعم المقاومة يدعم التيار الصدري ويدعم السيد مقتدى الا انه مسكوت عليه من الجانبين من جانب السيد مقتدى ومن جانب السيد كاظم الحائري ، السيد كاظم طبعا اجاب على الشيخ اليعقوبي وكُليتنة نعرف بيهه .......
سماحة السيد القائد مقتدى الصدر / ميؤمن باعلميته السيد الشيخ قاسم هيجي كلي......
الطالب/ لحد الان ما جاوبنة احنة عجزنة دزينة بالانترنت الى المجابهة الشخصية .........
سماحة السيد القائد مقتدى الصدر / ادري شتريد يجاوبك يعني .
الطالب/ العفو سيدنة نريد موقفك من جانب الشيخ مع العلم يعني كُليتنه نذكر ببداية الاحداث الشيخ زارك في ...........
سماحة السيد القائد مقتدى الصدر / مالهه علاقة اكو شيئين مهمة اولاً الاجتهاد اذا أثبته بدليل ممكن انه نكون واحد اما انه السيد يكول اذا واحد ادعى الاجتهاد وهو ليس فيه مع احترامي يكون فاسق أياً كان لا يستثنى من ذلك أحد .
الطالب / سيد كاظم بما انه احنة نعتقد انه مجتهد وهو الاعلم حسب قولكم وقول السيد الشهيد إلا انه لحد الان لم يجب يعني يدرون الاخوان عشرات الاسئلة حتى يعني إحنة كعدنة وياه ........
سماحة السيد القائد مقتدى الصدر / اني مابيدي ما أعرف .
الطالب / هذا السكوت ، بس نريد نعرف موقفكم حتى نبين للناس انو موقفكم .
سماحة السيد القائد مقتدى الصدر / موقفي آني أكُلَّك هي هاي اللي يسموه معظوظ الحية يخاف من الحبل حبيبي آنة ياهو اللي يجي يركب فوك ظهري يمشي بيه ياخذ الشهرة وياخذ المركز ياخذ الكذا ، ذبة لمقتدى ويمشي لوحدة جربتهة ويه غيره فلان الفلاني ماأريد أجيب اسم .
الطالب / جم مرة زرت اليعقوبي سابقاً الا انو لحد الان احنة نشوف الشيخ قاسم هو دائماً اللي يبدي بالزيارة او يبدي بالمبادرة .......
سماحة السيد القائد مقتدى الصدر / مرة وحدة زرته شيخ محمد بس رمضان اول العام ماكو جم مرة .
الطالب / لحد الان ماكو تصريح واضح الناس تريد تعرف دائماً احنة مُعرضين لهذا السؤال موقف السيد مقتدى من الشيخ قاسم ماهو ؟
سماحة السيد مقتدى الصدر / موقف محايد لا سلبي ولا إيجابي .
طالب آخر / سيدنة ولو أخذنة كثير من وقتك .
سماحة السيد القائد مقتدى الصدر / بخدمتك .
الطالب / الامام الحسين اسم ذات واسم علم لكن تحول الى مفهوم بمرور التاريخ ، مفهوم للتضحية وللعطاء ونحن ننظر للسيد القائد مقتدى الصدر ما ننظُرله كذات وانما كمفهوم وانه كمصداق حقيقي لتمثيل ثورة الامام الحسين في العراق انشاء الله ، سيدنة الان احنة في موقع دفاع دائمي وأبدي من الذين يجهلون أمرك سيدي يقولون ان السيد مقتدى يؤمن بالمقاومة المسلحة فلماذا يعطلها وكإنهم لا يقرؤون .......
سماحة السيد القائد مقتدى الصدر / هو اني وجبت المقاومة حتى آني أعطلهة حبيبي ، ما وجبت المقاومة .... حبيبي اللي صار ميسموه مقاومة يسموه حرب دفاعية والدفاع واجب بلا اذن حاكم شرعي نهائياً واللي يريد يقاوم مقاومة عقلاً وشرعاً جائزة ماكو اشكال بس اني اكول الان الزمن متطلباته ان نقاوم مقاومة عقلية فكرية ثقافية عقائدية ، الناس كتلك نجح نسبياً في اختبار الجهاد الاصغر يحتاج اختبار بالجهاد الاكبر .
احد الطلبة / مسألة شخصية .
سماحة السيد القائد مقتدى الصدر / كول
الطالب / اني مِدَّيِن منك قبل الاستشهاد الشريف خمس وعشرين الف سددت منهن الف فما صارت فرصة ........
سماحة السيد القائد مقتدى الصدر / بالعافية .
احد الطلبة / بادئاً ذي بدء نشكر الله ان من علينا بسادتنا الناطقين القضية التي اود ان اطرحها تتكون من شقين شق يهتم بالجانب الداخلي والحوزة الناطقة وشق بالشأن الخارجي اذا جاز الوصف ، ما يتعلق بالشق الاول انه كما تعلمون ما آلت اليه اوضاع الحوزة العلمية في الفترة الاخيرة وما تمثل من تنازل خطير وتعرفون طبعا اسباب ذلك ، من قبيل اغلاق المدارس وتهجير الاف الطلبة يا حبذا سماحتكم الان تقريبا في فترة تعطيل صيفي يا حبذا اذا بقيت الحياة انه توجهون الطلبة للرجوع الى الحوزة العلمية الشريفة ونحن طبعا نعاني الان من ركود علمي ......
السيد/ يكُلك نريد مدارس هُمة وفرنا مدارس نرجع ومادة ماكو.
الطالب/ توجيهاتكم سيدنه يعني .......
السيد/ مادة ماكو حبيبي منين اجيبلك ااجر عمارات يجي يغليهة اكثر حتى ابطل منها مثلا وهكذا .
الطالب/ الجانب الاخر ايضاً تراث ومصنفات الشهيدين الصدرين سمعنا بتكوين هيئه لاحياء تراث ........
السيد/ الشهيد الثاني بس ، الشهيد الاول ابنه موجود اني مالي حق ادخل بيهه.
الطالب/ الشهيد الصدر الثاني رضوان الله تعالى عليه يا حبذا لو تنضد مؤلفات ومصنفات السيد الشهيد الصدر على شكل اقراص مدمجة لكي يتسنى لطلبة الحوزة والطلبة الاكاديميين وعامة المجتمع الاطلاع على مؤلفات الشهيد الصدر رضوان الله عليه هذا ما يتعلق بالشان الداخلي، الشأن الخارجي والقضية الاعلامية والحوزة الناطقة الشريفة كما تعلمون اننا لا نمتلك وسيلة اعلامية متطورة كالاذاعة والتلفزيون وسمعنا اجابتكم حول الاقراص حول هذه المسالة وكما تعلمون ايضا شدة الحرب الاعلامية الموجهة ضد هذا الخط الشريف نحن لا نمتلك هذه الوسيلة لكن هنالك وسائل اخرى يمكن استغلالها واستثمارها من اجل نشر فكر وأجندة واستراتيجية الخط الصدري للعالم تعلمون هناك جالية عراقية كثيرة خارج العراق يتطلعون لاهداف الخط الصدري ، فسيدنة القضية انشاء موقع صدري رسمي على شبكة الانترنت لا يوجد لحد الان موقع رسمي للخط الصدري وللحوزة الناطقة الشريفة نرجو انشاء موقع رسمي ومن خلاله ايضا تنشر مؤلفات السيد الشهيد الصدر وايضا نتاجات الخط الصدري واخباره ونشاطاته الاجتماعية والسياسية والاقتصادية انا طبعا قمنا مع الاخوة في الخارج بانشاء موقع الممهدون اذا سماحتك اطلعت عليه الممهدون للامام المهدي المنتظر وراجعت الهيئة الاعلامية وجناب الشيخ عبد الهادي الدراجي حفظه الله بارك هذا العمل واشترط انه لا يتكلم بشكل رسمي باسم الخط ونحن سرنا وسيد جليل ايضاً كان يعمل بالهيئة الاعلامية نرجو الاهتمام بهذا الامر اكيدا والا سيكون قصور وتقصير سيدنة العالم يتطلع مع الاسف هناك مفهوم ثقافة لدى البعض من ابناء الخط الصدري انه الخط الصدري محصور فقط في العراق او فقط في مدينة الصدر وهناك اشكاليات كثيرة هذا امر ، الامر الثاني نرجو ان يكون لدى سماحتكم بريد الكتروني يطلع عليه جميع الناس لكي يتم من خلاله الاجابة على بعض الاستفهامات .......
سماحة السيد القائد مقتدى الصدر / جيب وقت فراغ ما عندي وقت فراغ.
الطالب/ اذا ما عندك ما مجال ......
سماحة السيد القائد مقتدى الصدر / اني فتحت درس وما عندي مجال اراجع درس اصلا .
الطالب/ نعلم انه لا يوجد لديك وقت بعض الثُقاة .......
سماحة السيد القائد مقتدى الصدر / ماكو ، محد قبل هواي عرضت على جم واحد محد قبل .
الطالب/ هذا امر مطلوب ومؤثر ......
سماحة السيد القائد مقتدى الصدر / كون يعرف فتوى يعرف كذا عنده علمية عنده خلفية خوب مو هيجي شلون ما جان محد قبل ....
طالب اخر/ سيدنة اني عندي شغلة مهمة بالمنطقة اخليهة للاخير لو ....
سماحة السيد القائد مقتدى الصدر / يعني داخل نطاقنة لو خارج...
الطالب/ لا منطقة في بغداد.
سماحة السيد القائد مقتدى الصدر / اذن خليهة غير وكت اصلا بغير الجلسة ، خليلي اوراق واني اطلع عليهة .
الطالب/ هوه انته سيدنة مطلع عليه ، لكن اني اريد اشوف هذا الاطلاع مالك.......
أحد الطلبة / عوداً على سؤال الشيخ النوري سماحتك كلت الرجوع للسيد الحائري بأعتباره هو الاعلم زين هيه القضية ممحصورة بمسألة الاعلمية ، بعدين من خلال الحجي مثلاً مسألة صلاة الجمعة اكو تناقض مع فتوى السيد اذن كيف ارجع .........
سماحة السيد القائد مقتدى الصدر/ ترجع بالمستحدثات حبيبي مترجع بما عملت به .

الطالب / احسنت هو الاشكال اللي يصير انه ليش ديصير تناقض مع التيار الصدري في هذا المجال كيف اني ارجع لمرجع .....
سماحة السيد القائد مقتدى الصدر / يعني هسة فتاوي الشيخ قاسم الطائي مطابقة للسيد الشهيد ؟؟؟
الطالب / لا مو شغلة فتاوي .....
سماحة السيد القائد مقتدى الصدر / ها ، خوب اذا تخالف فتوى الشيخ قاسم فتوى الشيخ الصدر شتسوي ؟؟؟؟ ، خو مثل ماتسوي هنا سوي وية سيد كاظم الحائري هم
الطالب / سيدنة القضية مو قضية فتوى شرعية ، القضية قضية خط احنة عرفنة ومن خلال المقاومة وفي الفترة الاخيرة ومعركة النجف الاخيرة مسألة سحب الوكالة واعطاءها لفرقد القزويني حيث اثارت عدنة هواي اشكالات ......
سماحة السيد القائد مقتدى الصدر / منو تقصد فرقد القزويني هاي شِلك بيهه لا يابه شوفلك غير سالفة لا . دعايات وحتى لو انطة شلي علاقة خلي ينطي واني شلي دخل ، حبيبي اني دا أكُلك سيد كاظم الحائري أعلم وصية السيد لا زالت نافذة اذا انطة وكالة لسيد فرقد القزويني صار مو أعلم مالهة علاقة.
الطالب / مو الاعلمية سيدنة ، مدخل ثاني .
سماحة السيد القائد مقتدى الصدر / جا شنو .
الطالب / مسألة اعطاء الوكالة لهيجي شخصية .
سماحة السيد القائد مقتدى الصدر / إحترم روحك .
الطالب / مو من سيد كاظم الحائري .
سماحة السيد القائد مقتدى الصدر / مع ذلك إحترم روحك ، لا تتعدى حدودك .
احد الطلبة / وأخيراً وليس أخراً انشاء الله نسأل الله عز وجل جزاك الله الف خير وعسى الله يحفظك قرة لعيوننا وانشاء الله حقيقة من نشوفك نشوف السيد الوالد...................
سماحة السيد القائد مقتدى الصدر / الله يوفقك انشاء الله ، الله يحفظكم ، ممنون.
احد الطلبة / ونشكرك على هاي الجلسة .
سماحة السيد القائد مقتدى الصدر / اني الصحة مو كلِش تسمح المفروض أكعد وياكم بعد......
احد الطلبة / احنة نطمع مرة ثانية بعد ......
سماحة السيد القائد مقتدى الصدر / انشاء الله بالخدمة ، هذا واجب.
احد الطلبة / وصلى الله على محمد واله الطيبين الطاهرين.
الجميع / اللهم صل على محمد وال محمد وعجل فرجهم والعن عدوهم .
احد الطلبة / نصيحة سيدنة تتفضل بيهه سماحتكم لطلبة الحوزة .
سماحة السيد القائد مقتدى الصدر / مال ، الحوزة هيه هم أخذت منحى سياسي ومنحى علمي هم مُتدني فلابد ان تنحون المنحى الاخلاقي لو صح التعبير المنحى الباطني الذي نهجه لنا الشهيد الصدر الثاني الله يقدس نفسه الزكية وهذا لا يُنحى الا بنزع حب الدنيا لدكول اني آني من اخوض بالدنية اني مو للدنية مع ذلك تنازل حبيبي الاكل القليل والشرب القليل والملبس القليل امام الله احسن ، امير المؤمنين يكول استحييت من مرقعتي حبيبي يركع بهدومة لا تستحي من هذا الشيء اذا كان يقربك من الله احسن من يقربك الى الشيطان والى لناس هذا اذا تنحاه وتنجح بيه تفلح ان تصون نفسك عن مغريات الدنيا ، جزاك الله خير جزاء المحسنين .
احد الطلبة / توصية خاصة لمدرسة محمد باقر الصدر .
سماحة السيد القائد مقتدى الصدر / الانعزال عن الدنيا ، وسلوك العلم اذا انت تدعي من اتباع محمد باقر الصدر ، محمد باقر الصدر كان منحاه علمي بحت حبيبي ، انت كِب نفسك على الدراسة ، محمد الصدر يكول اني ثمانية عشر ساعة أدرس باليوم حبيبي في بداية عمره يعني شكد بقاله لأكله وشربه ونومه ولعائلته ولطلعته وطبته عليك الحساب ، نومه ، اذا تكدر تدرس ثمانية عشر ساعة أدرس حتى بلكت يطلعنة مجتهد واحد مو عشرة .
احد الطلبة / العفو سيدنة فد نصيحة من الحوزة لاهالي النجف احنة جاي نعاني معاناتين معاناة من الهذا ومعاناة من اهالي النجف واحنة طلبة معدودين حسب تعبيرك........
سماحة السيد القائد مقتدى الصدر / ماكو غير الصبر أصبر وما صبرك الا بالله كما انت اصبر .... ممنون

اللهم ضل على محمد وال محمد وعجل فرجهم والعن عدوهم
مجهود رائع
وفقكم الله لكل خير

اللهم صل على محمد وآل محمد وعجل فرجهم والعن عدوهم
بوركت الجهود الرائعة
جعلها الله في ميزان أعمالكم وتثبيتا لكم ولنا
بحق محمد وآل محمد

بوركت اخي الغالي على هذا المجهود المبارك جعله الله في ميزان اعمالك