حالة إجتماعية

حالة إجتماعية
بدت ليــش المدارس وإنته متروح ***** شفت طفل وسألته وگلي محتاج
أروح المدرستنه ومامش أهدوم ***** وتدري بجيبي شايل للفقر بـــاج
شسوي آخذ ادروس وآنه الاستاذ ***** بمدرستة الحياة وعوزي السراج
لا تنغر طفل مغشوشة العيون ***** بخيط چفانه گلبي من الزغر واج
بعدني زغيّر وشفت آنه لوعات ***** ومسيرة عمري ضيم بأحسن إنتاج
أحب المدرسة تنسيني الهموم ***** علم بيهه وثقافة وأحلى منهاج
لكن هذا حالي وحال العراق ***** الشعب طافي إعله خير وكله محتاج
انكسر گلبي وشلت فد مصرف انطيه ***** رفض شفته بإباء وبالعَجل ضاج
طلع بي كبرياء بعلو الاجبال ***** وشايلهه الكرامة من المهد تاج
كلماتي / محمد العَـلوي البغدادي