النص المُنَضَّد للقاء سماحة القائد السيد مقتدى الصدر اعزه الله مع الهيئة السياسية للتيار الصدري ونواب كتلة سائرون بتاريخ 10 / 7 / 2021

اعوذ بالله من الشيطان اللعين الرجيم

توكلت على الله رب العالمين

وصلى الله على خير خلقه محمد واله اجمعين

بسم الله الرحمن الرحيم

السلام عليكم ورحمة الله وبركاته

اهلا وسهلا ومرحبا، وشكرا لحضوركم، الا انني مع الاسف دائما شويه صريح، فاني لم اتعود على مدح السياسيين كثيرا، لكن مع ذلك دورتكم البرلمانية اكدر اكول انها ناجحة، فلا اقلها من وقوفكم مع شعبكم، والدورة الوحيدة التي غُيّرَ فيها رئيس وزراء، هم جزاكم الله خير جزاء المحسنين، ولعلي لم التقي بكم سابقا ظنا مني انكم تعتمدون على انفسكم، باعتبار الكثير منكم مستقلين حاليا، بعد منا وغادي ماكو شي اسمه مستقلين، مو كسرة بالمستقلين، ماله علاقة، بس هاي سياسة مستقبلية لعله بعض المستقلين كانوا انجح من التياريين، ما اكول يعني ما .. مو في معرض التقييم او المدح او الذم، السياسة السابقة جنت اعتمد على المستقلين، السياسة اللاحقة لا مستقلين، زين، ولعل الذي يربط بيننا وبينكم او يربطكم بي او بالتيار التزام اخلاقي، بعضكم، والبعض الاخر التزام بالنهج بمحمد الصدر الله يقدس نفسه الزكية، ومع الاسف اجد ان هذا الالتزام الاخلاقي والالتزام الشرعي في بعض الاحيان بعضهم ضربوه عرض الحايط، وراحوا رشحوا مستقلين وكأنما راسه چبير حبيبي ما يدري هو قام بينا وسيسقط بنا، قام بنا وسيسقط بنا، مال يركب على جتافنا، بعدين يعوفنا، هذا عار حبيبي، اما انه تصير سياسي على من كبّرك، هذا عيب، ثم اوصيكم ونفسي بالشعور بمعاناة الفقراء والشعب والمظلومين عموما، بلا تفرقةً بين طائفة واخرى، لعله اشكال يرد في اذهان بعضكم او اذهان البعض الاخر، انه ليش نشعر بمعاناة الفقراء ومقتدى عايش بقصور ويركب طيارات خاصة؟! مو اكو هيجي اشكال لو ماكو هيجي اشكال؟ لا حبيبي لا يقنعوكم، انتو افهم من ذلك واعقل من ذلك، لا طيارات خاصة ولا قصور ولا هم يحزنون، انا كل حياتي احاول ان اكون وسط، آني ما اسكنت بالخضراء حبيبي، لازال هذا بيت ابوي وانا كاعد يمه، والحمد لله الجيران والاخوة والاهل متحملين، اضافة الى انه آني دائما اروّض نفسي حتى اتسوون، آني اذكرها مو لانه رياء، لانه اذا كانت للنصيحة الرياء يسقط، اروّض نفسي بالحر، حتى اشعر شيحس الفقير، بالظلمة حينما ينقطع عليه الكهرباء شيصير، بقلة الاكل، بقلة الشرب، وهكذا، هذا ما اُدِّبنا عليه، فيجب ان تلتزموا بذلك، مو دائما كون نضرب تمن وقيمة وكهرباء ومكيفات وميوزة وكراسي، اكو علاقة بينك وبين شعبك وبينك وبين ربك كون اتصير زاهد وكون اتصير مع الفقراء، اكو انت كسياسي كون ملبسك وكذا وهيبتك بيها باب وجواب، بس مو اربع وعشرين ساعة، مرة هيج مرة هيج، زين. من الان فصاعداً، لانه السابق شنو جان؟ انه اليصعد آني فقير، آني ابن شهيد، آني مظلوم، تعالوا صعّدوني للبرلمان، بالله ليش؟ حتى يقبض راتب، مو هيجي؟ اطوني تعيين، حتى يقبض راتب، الحكومة مو مؤسسة خيرية حبيبي، الحكومة كون توصّل فلوس للفقراء والشهداء والمظلومين والفقراء، بس مو انه اصعّده للحكومة حتى ياخذ راتب، ماكو هيجي فلم، هذا شيله من بالك، اللي يوصل لهذه المراكز، مراكزكم ومراكز حكومية اخرى، يجب ان يكون مقدمة لخدمة شعبه لا خدمة نفسه وعائلته ومتعلقيه، كل من يطلب خدمة متعلقيه ونفسه فهذا مو وطني اصلا، ما يريد يخدم شعبه، ما يريد يخدم ناسه، فعليهم من الان فصاعدا سيكون الهدف الوحيد هو خدمة العراق، ومن يخدم نفسه يُبعدْ، بأي صورةٍ من الصور، لا بل نستطيع ان نقول في المستقبل يجب ان تكون الخدمة مجانية، اما انه شكد راتبي بالبرلمان، شكد راتبي بالمركز الفلاني، بالوزارة وبالكذا، هذه كلها خزعبلات دمّرت العراق حبيبي.

ثم انه نحن لازلنا في مشروع الإصلاح، وهذا ما لا نحيد عنه مطلقاً، الى الممات، ما منها، هكذا اُدبنا، هكذا عُلّمنا، هكذا شرعنا، هكذا اخلاقنا، كلها، فاذا حِدنا عنه وتركناه فقد تركنا الشارع والأخلاق والدين وكل شيء، والعقيدة، أمير المؤمنين كان سيد المصلحين، اذا آني شيعي وانت شيعي يجب ان نبقى على الإصلاح. زين.

ولذلك شوف، شنو فرقنا عن الباقين، قد يدّعي البعض ان هناك فساد في التيار، نعم هناك فساد في التيار، لكن شنو الفرق عن الباقين؟ راس التيار الجبير من يشوف اكو فاسد ينزّل بيه فد شي، يطرده، يبعده، يعاقبه، بالله منو من الاحزاب انتو حسب إطّلاعكم اكو واحد فاسد وكالوا هذا .. من جماعتهم طبعا، كالوا هذا فاسد وبعّدوه، ماكو هيجي شي، لذلك من هنا وبوجودكم ادعو جميع الاحزاب والكتل والسياسيين انه يبعدون الفاسدين الذين ينتمون لهم بأي صورة من الصور، كصكوصة مو كصكوصة، مالي شغلة، بس مستحيل اكو جهة معصومة من الفساد، هسه يجوز مو كلها فاسدة ... لو خليت قُلبت، لكن مليار بالمية اكو فيهم فاسدين، فليبعدوهم كما ابعدناهم، ادعو السياسيين لمحاسبة اتباعهم الفاسدين بأي طريقة كانت.

ثم نأتي الى امر مهم آخر، بالله العملية السياسية الجديدة ما بعد سقوط الطاغية من 2003 الى 2021، يعني ما يقارب راح يصير 20 سنة، 18 سنة، شنو صار؟ ما النتيجة؟ برلمانات، نواب وحكومة ووزراء ورؤساء، شنو النتيجة؟ آني أكلك، فقط جوع، خوف، نقص خدمات، صراعات، تسقيط، بعد شنو؟ لا ماء، لا كهرباء، لا صناعة، لا صحة، لا تعليم، لا نفط، لا حدود، لا وطن، لا سيادة، بس تبعية، احجيها وبكل صراحة، بس تبعية، اذا انت سني كون تتبع للجهة الفلانية، واذا انت شيعي كون تتبع الجهة الفلانية او الدولة الفلانية، منا وغادي هم بوجودكم نعلن ان اي دولة سواء من دول الجوار او غيرها اذا لم تحترم العراق فلن نتعامل معها بطريقة إيجابية، كائناً منْ كانت، اي دولة من الدول، صغيرها وكبيرها.

لا وطن، لا سيادة، مجرد مو*ت، خطـ .ف، ميليـ .شيات، ابتز*از، صرا*عات عشائرية، سرقات، فسا*د، إحتـ .لال، وقتا*ل بالنيابة، روح فلان دولة نقاتل عن كذا وكذا، لا تخلّونه هم نغمّج هوايَ.

زين وعليه هاي شوكت ترجع للشعب العراقي؟ شوكت العراقي يكعد ابّيته، عنده الماي، عنده الكهرباء، عنده الكرامة، عنده صحة، عنده ضمان اجتماعي، عنده امن.

يعني اذا 17 سنة والعراقيين ما استطاعوا فهاي الفضيحة والعار امام الاخرين حبيبي، شيء مبكي كثيرا ومحزن، كلٌ يجر النار الى قرصه، كردي كون ايسقّط الشيعي، والشيعي كون ايسقّط السني، والسني كون ايسقّط الكذا، شنو داخلين حلبة مصارعة احنا؟ شو كلهم عراقيين وكلهم يريدون لكمتهم وكرامتهم.

انت اعمل بالمستطاع لكي تُرجع هيبة العراق، لكي تُرجع هيبة الدولة، لكي تُرجع استقلاليته، لكي تُسقط تبعيته، الدول تتلاعب به وتنهب من هنا وهناك، قصف وقضم وما شاكل ذلك، الى متى؟ شنو العراق ضعيف؟! العراق ما يكدر مثلا، ما عنده ناس زينين ونزيهين وغير فاسدين؟ عجيبة، 17ـ 18 سنة والشعب يتضور جوعا وحرا وخو*فا وتفجـ .يرات وار*هابيين وقصف واحتـ .لال والى متى؟ والله تحملنا اهوايَ، والله اتحملنا اهوايَ، على كولتهم هرمنا، كافي، هسه سوي فد نتيجة معينة، اطلع اكشف ملفات الفساد، اطلع احجي، وكله هذا وين واكع، كله انتو، كله آني، كول لا، لحد يستحي، كول أي كول. زين.

فعليه، نتحمل هذا الحجي ونسكت؟ مو انه كون تطلع بالاعلام وترد وتدافع عن نفسك، لا، الرد عملي، الرد عملي، خوب همه يدرون، الكهرباء شكد صارلها بالعراق تنكطع بالله، من استلم ابو الكهرباء الاخير اللي هو عود صدري؟! من 1980، من ولدنا ولحد، حينما ولدنا والى يومنا هذا، تنقطع الكهرباء، ليش وكعوها براسكم بالله؟

فقط من يُرمى بالحجر هو الشجر المثمر، وانا وانتم ان شاء الله مثمرين، بس شوية شدو حيلكم. زين.

فعليه يجب ان ندحض اقوال الاخرين لا بالقول ولكن بالفعل. زين. هسه احنا مبتلين بشي وهو محاربة الفسا*د، فعلنا ما نستطيع امام الله، امام ضمائرنا، امام انفسنا، اني خو هم اكولها كدامكم: انا سأذهب وضميري مرتاح حبيبي، انه اني دافعت عن الاصلاح، وحملت راية الاصلاح، وفعلت ما اقدر ان استطيع عليه من محاربة الفساد، فأمام الله وأمام شعبي انا ضميري مرتاح حبيبي، هناك تقصير، هناك بعض المنتمين الي فاسدين، هذا مو صوجي، فما علمي بما يفعلون، ان اتبعك الا الارذلون، وما علمي بما يفعلون ، شلي علاقة بيهم، المهم من يخطأ واحد منكم ما اسكت عنه ولا ادافع عنه، راسا الكصكوصة والعقاب موجود، وهذا شرف الي في الدنيا وفي الاخرة، اللي اكثر شيئين اتشرف بيهم: هي محاربة الفسا*د، ومحاربة الاحتـ .لال، وهذا شرف لي في الدنيا وفي الاخرة. زين.

هسه احنا جنا بواحد راح انصير باثنين، شلون بالله؟ جنه بالفا*سدين هسة اجانه ملف اجديد اسمه التطـ .بيع وي اسر*ائيل، وانا اركز عليه عن علم وعمد ترى، فاذا لم ينتصر فسطاط الاصلاح في الانتخابات المقبلة ان وجدت وان قررنا الدخول بها، ان لم ينتصر فسطاط الاصلاح سيكون العراق عرضة لنهب الفاسدين والمطـ .بعين ، واذا صار تطـ .بيع مع اسر*ائيل، العراق واسر*ائيل، فهذه بداية النهاية، لا ، بل نهاية النهاية ، يعني كلشي يخرب. فلو نشد حيلنا ونوكف وكفة رجل واحد سياسيا وثقافيا وحكوميا واصلاحيا، لكي نمنع التطـ .بيع ونمنع الفسا*د، والا اقرءوا الفاتحة.

نقطة اخرى، اكررها لمحت عليها قبل شوية واكررها، كل الاخطاء اعلاميا جاي تركز عليكم وعليّ آنا بالتحديد، ولعلهم انتم جاي تتحملون ضريبتي ان جاز التعبير، اكررها هذا ضريبة الوقوف ضد الفسا*د، كون نتحمله، واكررها يجب ان يكون الرد عملياً لا اعلاميا فقط، الخطأ الصغير منكم، خطأ صغير واحد يسووه من الحبة كبة. زين. شو هم صلي اخطاء وما احد يحاجيهم؟! شنو على راسهم شعرة مثلا؟! شنو، او احنا مثلا كون ما نخطأ وهم اربعة وعشرين ساعة يخطئون، احنا مثلا دعينا العصمة وهم ما يدّعون العصمة، بالله اكلك فد شي، لو احنا محاصرين الخضراء شنو جان صار؟ حتى نطلع فلان واحد لازميه سجين، بالله احنا جاي نقصف مطارات اربيل وبغداد ومدري وين وبعض المقرات، مو جان صار الاحتـ .لال يمكن نبي من الانبياء!!، شلون تقصفوه، شلون كذا، نوب سوونا ارها*بيين وجابوا علينا الطيارات والدبابات، بالله قصفهم مال اربيل وما اربيل شنو صار؟ اضاف الاحتـ .لال اربعة الاف جندي، بدال ما جان يريد شنو؟ ينسحب، فعليه هناك مستفيد من وجود الاحتـ .لال، اذا طلع بعد لكمتهم تروح، اكو لكمتهم بالسياسة لان هم صفر بلا سياسة، اكو لكمتهم بالمقا*ومة لأنه شنو؟ هم صفر بلا مقا*ومة، هاذي اذا هي جانت مقا*ومة فعلية اصلا.

بالله احنا لو مدافعين عن فاسد من فاسدينا، فلان او فلان او فلان، الم تقم الدنيا ولم تقعد؟ بالله احنا لو صا*لبين واحد بالوثبة لو بغير الوثبة بمظاهرات الاصلاح مالتنا السابقة بـ 2016 شنو جان صار؟ انا اتصور يعني اقل تقدير يعني فد تحالف جديد يصير دولي كون يجون علينا حتى يسوونا ارها*بيين وهكذا وهكذا، اقل التقادير.

بالله احنا لو هددنا بحر*ق صناديق الاقتراع مال الانتخابات، وان لا يكون هناك انتخابات اصلا، ومهددين، وطالع مقتدى لو انتو واحد من النواب، شجان صار؟ ها عدو الديموقراطية عدو الحرية وما شاكل ذلك، انتو لا تظلون سمّاعين لهذا الأمر، انتو عندكم طريق اسمه طريق الاصلاح وطريق ممنوع التطـ .بيع، تمشون به وخلص، ما يُرمى الا الشجر المثمر.

تدري شيء اخر، اصلا هو ماكو وجود لغيرنا حتى يحجون عليهم، ذولاك انقلعوا من جذورهم حبيبي، اصلا شجرة ماكو، ثمر ماكو حتى يكطفوه، اصلا جذور ماكو، فالمتواجد الوحيد في الساحة العراقية منو؟ منو المعروف خارجيا وداخليا بالعراق هو الموجود الان؟ اكو واحد انّذكر بالله؟ فلان وفلان السابقين ما اريد اجيب اسمائهم، الهم ذكر؟ ما الهم ذكر، بالسوء وبالخير، لأن اصلا غير موجودين همَ.

فالحملة الاعلامية ضد التيار الصدري سببها واحد، لأنه هم الموجودين الوحيدين في الساحة، وانت شوكت تعرف روحك جاي تمشي زين لو مو زين؟ من تسمع المو منصفين متأذين، يعني انت اوجعتهم، يعني انت جاي تمشي صحيح، فخل يضوجون ما الكم علاقة بيهم، على راحتهم.

اكثر ملفين شنو هو الزموه على التيار الصدري حاليا او ثلاث ملفات بالأحرى، الصحة حر*ق المستشفيات وما شابه ذلك، الكهرباء وانقطاعها وما شاكل ذلك، والدولار وارتفاع اسعاره، هسه آنا ما اريد احل المشكلة هنا في هذه الجلسة، لأنه خصوصا مسألة الدولار حرجة، بها فوائد وبها مضار، والقرار الاخير اقول لا زلت، انا اذا على نفسي انا متعاطف مع الشعب، والافضل ان ينزل سعر الدولار، لكن الحكومة جاي تجد ان هناك فوائد اخرى وانا ادري انتو كثير منكم ايضا وقف ضد ارتفاع سعر الدولار بصورة او بأخرى، انا ما اريد اناقش هيجي أمر.

3 ملفات، الصحة والكهرباء والدولار، باعتبارها وزارة المالية ووزارة الصحة ووزارة الكهرباء، على أساس تابعة للتيار الصدري، أنا فد يوم من الأيام اذا اكتشفت فعلاً تابعة الى التيار الصدري أكو فد شي أشد من الكصكوصة أسويه، أعاقب كل منْ كان له صلة بهم، لأن آني لازلت أعتقد لو كان هؤلاء الوزراء الثلاثة من التيار لما كان هذا مصيرهم، لأنه جان عرفنا شلون نجرجر آذانهم وخليناهم يمشون عدل، بس لأنه مو تياريين أما صار عدهم قصور وأما صار عدهم تقصير والله العالم، هسه بغض النظر قد يكون بعضهم أكل الحجار بالخطأ، هذا مو ذنبي، بس لو كانوا تابعين للتيار الصدري جان عرفنا شلون يمشون عدل، ولعله الوزارات السابقة كانت على الرغم من أنه فيها ما فيها من السوء لكنها كانت أفضل من غيرها من الوزارات التابعة لغير أحزاب، للآن أقول، زين.

فعليه، يجب أن نتنبه لهذه الأمور وإذا كان مستقبلاً عدنا نية لدخول الانتخابات ولرئاسة الوزراء يجب أن لا تتكرر هذه المآسي وهذه الأخطاء، أنت تدري أن التيار الصدري الوحيد للآن ما مسك رئاسة وزراء سابقاً، يعني شنو؟ يعني إذا مسك رئاسة وزراء مستقبلاً وفشل، بعد هاي أخير ورقة تُحرق، أخير ورقة تُحرق، فمن الصعب أن نزج أنفسنا ونخسر، بيها سوء لسمعة المذهب وسمعة العراق وسمعة الوطنيين وسمعة الاصلاح، فأما أن ننجح واما أن نكعد ببيتنا ونسكت أحسن إلنا، شلون ننجح؟ هاي ينراد الها كلام طويل، إن شاء الله في جلسة أخرى، هسه قد يكون جلسة وياكم وداعية لأنه انتو في آخر أشهر، بس مو معناتها تروح تكعد ببيتك وتسكت، انت إذا مخلص لمرجعك ولنهجه ولخطه ولعقيدتك ووطنك مو إلا كون برلماني يلله تشتغل أو كون وزير يلله تشتغل، لا، أبواب العمل مفتوحة وخدمة الوطن مفتوحة وخدمة الدين مفتوحة وخدمة العقيدة مفتوحة، فمو بسرعة لو تروح ترشح مستقل أو تروح تكعد ببيتك وتسكت أو تسافر أو ما شاكل ذلك، لأن هاي مشكلة هم ماشية بالتيار كوّن نفسك وافلت، لا، تريد تكوّن نفسك تحت هاي الخيمة؟ على راسي، تريد تكوّن نفسك بره؟ جرب وشوف، ما أدري.

فلا ينبغي أيضاً أن نستعمل هذه المناصب من نواب وغيرها من المناصب الحكومية للتجارة وللدنيا، إحنا جايين من أجل الخدمة، من أجل خدمة الوطن، خدمة الدين والمذهب، خدمة الفقراء، خدمة المظلومين.

يبقى توضيح أمر أخير، ما أريد أطوّل عليكم، بالمستقبل شنو كلنا؟ ماكو غير القح، لو صدري قح لو ماكو، بس كون انتو تعرفون شنو القح حتى تنظّرون للآخرين، حتى من يجون الأقحاح في المرحلة السابقة مو اتركوهم وتكعدون، انتو أصحاب خبرة صرتوا أربع سنين، أكو بعضكم أكثر، الزموا بايديهم، مشّوهم علّموهم، القح هو النزيه، القح هو الثابت على خطه، القح هو الذي يقدّم مصالحه العامة على مصالحه الخاصة، هذا مهم، كون تعلموهم هاي القواعد العامة والقواعد الخاصة، بعضهم جدد لعله بالسياسة قليل الباع، فأيضاً عليكم أن تأخذوا بيدهم وأن لا تتركوهم وأبواب الخدمة للوطن ولغيره مفتوحة فلا تغلقوها، إللي يريد يكعد ببيته ويسكت هسه هذا أمر آخر، بس آني قد أعتبرها خيانة ترا، أعتبرها خذلان لأنه الخطر المقبل أشد من الخطر السابق، ترا ياكلوكم من الفج للفج، فاتحدوا واستمروا على الإصلاح، ولنقف وقفة واحدة مشرّفة، واللهم صل على محمد وآل محمد، وشكراً لكم.

احسنتم النشر