قصيدة بحق الإمام الحسين ((عليه السلام))

( الحسين مصباح الهدى وسفينة النجاة)
قصيدة بحق الإمام الحسين ((عليه السلام))
على راس الرمح من راسك أنشال أبد مو صدفه كانت جتي بحســاب
حتى تظل على الكل شامخ الراس يل نلت الحيـــاة وموتك أسبـــــاب
مو ميت أكــول ويخسه من كـال فوك الألف عـــام وذكره ماغـــاب
بجنحين القصيــدة حلقت بيــــك ومن سمعت بأسمك مرت أسراب
أسراب من القـوافي رايدة تنـول شرف خدمة مقامك بأبسط أسباب
بقى دين الرسول بدمك الســـــال وأهل بيتك وطبعاً بعض الأصحاب
يالمرجف السيــف بثورة دمــــاك وبقواطعهم بدمك راسم أنكـــاب
بطرف عيني من أذكرك دمعة أيتام ومثل معضد عليك أجتمعوا أحزاب
بعاشور أحنه نصبح مأتم جبــير وكل عام أيتـزايد عدنه المصــاب
يحل بينه الحزن نتوشح بليـــــل وتغيـم عيوني آآآآه وتمطر بـــآب
شما يحصل أبد منعوف الحسين وعلى دربك نظل لو كطعوا ركاب
نفوت أحنه بطريقك لو جمر صار مثل خيط بثقب راس أبره ننـساب
رفضت الظلم أنته وكتله هيهات مثل سيف وخرج من حضن الكراب
ماهزك كــــــلام ولاحرب يــوم أشتظن الجبل يهتز بالهوه الهـاب
رغم أنف الطفاة بكل الأزمـــان بقى أسمك شمـــوخ وذكرك كتاب
ينذل ويمـــــــوت الحاربك دوم وتظل رمز الإبــــاء الأهل الألباب
الكلمــات / محـمد العَـــلوي