يا اعظم درس بالخوه موجود
بس زينب تعرفه وتقره معناه
زينب عاتبت ما صدك بهاي
وفرض عاتبت بس ما فهمناه
زينب بالعتب كالتله عباس
فدوه الماي خويه تريد يمناه


موانته اليجبرك موت عباس
جبت عمرك تجبره بسيفك الموت
من تغضب تشد عيون السيوف
وبس سيفك يشوف ويسمع الصوت
وسيفك ماولد فد يوم مجروح
لئن سيفك يخلف بس الاموات
عباس البعض تستكثر عليك
تكول الاف يكتل سيفه هيهات
وسيفك بالحرب مايكتل افراد
ترسلهه الجهنم جنت بعثات
جان اسمه الكمر يم زينب ايصير
بس يم اليضدة يصير عباس
كلش تختلف يم زينب هواي
بكد روس التكصهه تقطر احساس
اضن لمن مشت لو تكدر تكوم
طفيت الشمس لو عندك انفاس
غلط جرف الشريعة دوسه رجلين
حرم هذا الجرف مفروض ينباس
لئن لمن ولوهه وحركو اخيام
نزف راس الكمر ساعتها نوماس
لذلك عالشريعة اتمنه يبنون
مقام الغيرتك ينزار عباس
ولمن للخيم ماوصلت ماي
عذر ما قدمت قدمت الجفوف
تضحيتك جبيره بيوم ضحيت
بعينك والجفوف وهذا معروف
بس اكثر بعد ضحيت عباس
من يحدي الشمر وعيونك اتشوف
مطروح القدر خلاك عباس
والتفتت عليك ونادت بصوت
مو انته اليجبرك موت عباس
جبت عمرك تجبره بسيفك الموت


مصطــــفى الصـــــدري