ياحسين بمشاعرنه
ياحسين بمشاعرنه وصحنه انته بضمايرنه
ماعدنه رياء وزور نستذكر جسد منحور
هذي من عقائدنه
وصرخة كل جوارحنه
*********************
لمسنه الهايم بدربك لايركع ولاينذل
وعرفنه نتبع العتره لايخشى ولايجفل
بذلنه لمنهجك ارواح وعشكنه لوحه المقتل
ياشمعه درب الاحرار يأول بعد الاول
منك مانمل يحسين
يمثبت اصول الدين
صيحة كل مآذنه وصرخة كل جوارحنه
**************************
تصدينه بعزم وإصرار وخلي الماجره يجره
وتمسكنه بقضيتكم بيكم وضحت الفكره
تربه كربله عنوان بيها مودعه العتره
رسمت كل جروح حسين عبره تسابك بعبره
مانخشى وابد منلين
انموت ونصيح حسين
صدحت كل منابرنه وصرخه كل جورحنه
******************
ياحسين ارتبطنا وياك وغيرك سيدي منريد
ياحسين بشهر عاشور تنزل لاطمه هل أيد
الكل ثأئر صرت مولاي أقرب من حبل لوريد
ياحسين بحزنه اليوم ثوره وعاشر من جديد
ماهزنه هذاك الصوت
انحبك نضل للموت
نخوة كل عشايرنه وصرخت كل جوارحنه
***********************
ياحسين وشنو الاحكام نمشي نزورك ومنعوف
دفعنه لشوفتك اموال رسم زيارتك وجفوف
تحدينه الظلم والجور وعنك ما منعنه الخوف
وزرعنه بخنصرك خنصر وبدماكم قهرنه سيوف
زوار ونظل للدوم
متهمنه شرار الكوم
دمعت كل مآتمنه وصرخت كل جوارحنه
******************
على سيرت اهالينه نحبكم يانسل الاطياب
تعلقنه بمحبتكم ومثل شمعه الكلب هم ذاب
هذا الحب على الفطره نقله بعالم الاصلاب
على هاي المحبه نسير وماتثكل علينه صعاب
كل يوم المحبه تزيد
عنك مانروح بعيد
ضجت كل مجالسنه وصرخت كل جوارحنه
************************
للشاعر
سعد محسن جايان