منتدى جامع الائمة الثقافي - بسمار الثـــقافة

بسمار الثقافة هوايه شال اثيــــــاب
عليه كلمن يخاف ايعــــلك اثيــــابه
تره بعين الجبان السيف قاسي هواي
بس عين السبـــــــــاع اتشوفه لعابه
مفهوم السلم مايعني ذلة وخــــــوف
ولا معــنا الشجاع مكــــــــــشر انيابة
ولا معنا التــــــطور نهــــــــمل التاريخ
جمال البل ورد من طيـــــــبة اترابه
ولا تحكمهه كلهه بذنــب بعض الناس
شنو ذنب الطيور التســـــــــكن الغابة
مو صوج الشرع بس صوج بعض الناس
عدهه الدين صوره ولون جلبــــــــابه
محمد مو مســـــــــــاجد عمر انه كلوب
كلب سلمان مســـــــجد لله وكتـــــابه
الجامع لا ترفعة ويمه كوخ ايتــــــــام
ربك يرضا تكسر خـــــــاطر احبابه
اني اطلب فقه بس للفقـــــير ايكون
حتى من الجروح انطـــــــهر اثيابه
حتى العيد احرمه الما يجيب اهدوم
وشيل الفرحه منه وكطع اسبـــــــابه
بعضهم بس شعار ويمشي فوك الكاع
ويبقه ابلا وجه من تنــــــزع انكابه
شعارات بشعارات وصـــــــلنه الحال
بعضهم نجهل اسمه ونعرف القابه
يسكن ؟ما نعــــــرفه هواي عنده بيوت
يعمل ؟فوك مدري الياجهه احسابه
بعد كافي وعجزنه اشكد طرقنه اوجوه
اشوكت عود الضمير وينطرق بابه
ياريح اشعجب ويه القصر حباب !!
وتصطر بالصريفة اشعندك اطلابه