حسين مصباح وانت كمر

عجيبه الكمر طايح على الارض
والاعجب بالارض ما ماتت الناس

بعض البشر اجفوفه تعبدهه
وعد بعض البشر اقدام الكمر تنباس

وياوسفه كمرنه امكطعه اجفوفه
طفو ضواه ابكطعة الراس

وانكسر ظهر ابو السجاد وظهر طه
وموسى وعيسى والياس

وطلعت الشمس المخدره تلطم
صدرهه اتصيح آآ يلخوتك ماتنقاس

الفرات يبجي بدموع امواجه
يتمنه يتحول صخر قاس

يصيح ياريت لا شربت مني البشر
وياريت مايي بعدك فلا ينجاس

يتحسر لان ذبت اجفوفك الماي
ومن مايه تغرف جفوف الانجاس

عجيبه البشر ما تملك ضمير
وانهار وصخر تملك احساس

مدري النهر ابجفك اتأثر
من شافه يخط للخوه اساس

اشحال خيك من شافك طريح
وبصفك جفوفك والدرع والطاس

فكرك يم خيك المظلوم
اتفكر ابحاله وانت بأخر الانفاس

والنعم من غيرتك يا ابا الفظل
اتشرف ابنوماسك النوماس

كمر انت بالكون ساطع ضواك
ومنثوره علنورك ورود وياس

حسين مصباح وانت كمر
ومن مصباحه صارلك نبراس

عمي بالعاده ينذم الكمر من يطيح
بس انمدح من طاح الكمر عباس


والتحيه والسلام

شعر جميل
احسنت اخي العزيز
موفق بإذن الله ... لك مني أجمل تحية .

اوصاف جميلة لصور شعرية تنم عن مقدرة في التعبير عن خلجات النفس شعراً
اتمنى لك دوام التوفيق
مودتي

شعر جميل
احسنت اخي العزيز
وجعله الباري في ميزان اعمالك
ببركة الصلاة على محمد وال محمد